Sa basond sin l'art. 9 al. 1 da l'ordinaziun davart las finanzas dal chantun Grischun (OFC; DG 710.110) ston credits d'impegn (CI) vegnir dumandads, sch'in project chantunal pli grond s'extenda sur plirs onns. Exceptads da quai èn projects da vias. Sco project pli grond vala in project a partir dad 1 milliun francs. La furma da la missiva per dumondas da CI è reglada en l'art. 9 al. 2 OFC. Tenor quel sto in CI vegnir dumandà dal cussegl grond stringentamain cun ina missiva separada, sch'el suttastat al referendum da finanzas obligatoric (expensas novas sur 10 miu.). En ils ulteriurs cas pon CI er vegnir dumandads cun la missiva tar il preventiv u tar il quint annual ("missiva curta"). La decisiun concernent la furma da la missiva prenda la regenza mintgamai en il cas singul. En quest connex ha ella savens tschernì ina missiva separada er per CI sut la limita da 10 milliuns francs, sch'ina "missiva curta" na pareva betg d'esser adattada pervia dal gener u pervia da la dimensiun dal project. La lescha da finanzas dal chantun Grischun (LFC; DG 710.100) na fixescha sapientivamain betg la furma da la missiva per dumondas da CI, quai en concordanza cun il model d'ina lescha da finanzas per il MAC2. La LFC prescriva en l'art. 33 al. 3 mo che conclus per expensas che pon vegnir definidas libramain e che cuntanschan la limita dal referendum da finanzas facultativ ston vegnir dumandads dal cussegl grond cun (ina) missiva. La furma da la missiva però è averta.

Durant ils ultims bundant 10 onns ha la regenza suttamess al cussegl grond tut en tut 48 dumondas per approvar credits d'impegn. En 20 cas è la dumonda vegnida fatga cun ina missiva separada. En mo 4 cas da quels è vegnì applitgà il referendum da finanzas obligatoric, en 9 cas il referendum da finanzas facultativ tar imports sut 10 milliuns francs ed en 7 cas èsi sa tractà d'expensas da per regla sur 10 milliuns francs ch'èn liadas resp. exclusas dal referendum da finanzas.
26 dumondas da CI ha la regenza fatg en il rom d'ina "missiva curta" ed en 2 cas urgents sur la cumissiun da gestiun ordaifer ina missiva. En quai che reguarda l'import sa dividan las 26 "missivas curtas" cun imports tranter 422 000 francs e 31,4 milliuns francs sco suonda:
3 dumondas da CI cun imports sur 10 milliuns francs (tut expensas liadas tras lescha)
4 dumondas da CI cun imports tranter 5 e 10 milliuns francs (tut expensas liadas)
19 dumondas da CI cun imports sut 5 milliuns francs

Il dumber da dumondas da CI en il rom d'ina "missiva curta" è s'augmentà fermamain dapi l'onn 2012. Fin l'onn 2012 èn quai stadas en media per onn 1,6 dumondas da CI ed a partir da l'onn 2013 en media 3 dumondas. Il motiv per quest augment è principalmain l'adattaziun da las prescripziuns concernent la furma da la missiva per dumondas da CI ch'è vegnida fatga a chaschun da la revisiun totala da la OFC per l'onn 2013. Fin la fin da l'onn 2012 n'èn betg mo stads exclus ils projects da vias da las dumondas da CI, mabain er las acquisiziuns cumpensatoricas en il rom da las prescripziuns concernent il plan da finanzas. Pertutgadas da quai èn stadas en emprima lingia las substituziuns da sistems d'informatica. Ultra da quai pon vegnir fatgas a partir da l'onn 2013 er dumondas da CI ch'èn suttamessas al referendum facultativ cun ina "missiva curta".

La regenza ha l'intenziun d'adattar l'art. 9 al. 2 a chaschun da la proxima revisiun da la OFC uschia che dumondas da CI sur 10 milliuns francs ston vegnir suttamessas al cussegl grond obligatoricamain cun ina missiva separada. Uschia vala questa limita per tut ils cas, independentamain da la classificaziun dal dretg da finanzas. Ina limita da 5 milliuns francs para in zic arbitraria e fiss sproporziunada oravant tut per acquisiziuns puramain cumpensatoricas. La regenza vegn a dumandar al cussegl grond er vinavant CI cun imports pli bass cun ina missiva separada, sch'ina "missiva curta" n'è betg adattada en chaussa e sche auters aspects che la garanzia dal credit èn impurtants.

Sa basond sin questas consideraziuns propona la regenza al cussegl grond da midar questa incumbensa sco suonda: La regenza vegn incumbensada d'adattar l'ordinaziun da finanzas uschia che credits d'impegn per expensas sur 10 milliuns francs ston vegnir suttamess obligatoricamain al cussegl grond cun ina missiva separada. En cas da credits d'impegn sut questa limita duai la regenza examinar en il cas singul, sch'ina missiva separada è inditgada.

19 d'october 2018