Navigation

Inhaltsbereich

Dumonda Cavegn concernent la transparenza dals salaris per las emploiadas ed ils emploiads chantunals

Sessiun: 05.12.2018

Da lur commembras e commembers han las associaziuns grischunas da persunal, tranter quellas er l'associaziun da la polizia chantunala dal Grischun, survegnì reacziuns ch'ellas ed els – sco emploiadas ed emploiads dal chantun Grischun – na surve­gnian, sin dumonda, naginas infurmaziuns pli davart lur engaschament resp. davart lur classificaziun en la classa da salari e davart il stadi relativ dal svilup individual dal salari (pli baud stgalim da salari) sco er davart eventuals supplements da func­ziun. Sco motivaziun èsi vegnì menziunà che quai sa basia sin ina directiva da l'uffizi chantunal da persunal.

Sche quai constess, fiss la transparenza dals salaris restrenschida en moda insupportabla per las emploiadas ed ils emploiads dal chantun. Per las emploiadas ed ils emploiads dal chantun na fissi betg pussaivel da controllar en atgna chaussa lur salari mensil, p.ex. al cumenzament da l'onn.

Las sutsegnadras ed ils sutsegnaders dumondan perquai la regenza:

1.     Per tge motiv e sin fundament da tge basa giuridica vegn refusà a las emploiadas ed als emploiads dal chantun il dretg da s'infurmar davart l'agen salari?

2.     È la regenza pronta d'inditgar puspè las infurmaziuns necessarias per determinar il salari sin il rendaquint dal salari da mintga singula emploiada e da mintga singul emploià?

Cuira, ils 5 da december 2018

Cavegn, Zanetti (Landquart), Niggli-Mathis (Grüsch), Alig, Atanes, Berther, Bettinaglio, Bigliel, Bondolfi, Brandenburger, Brunold, Cahenzli-Philipp, Caluori, Casty, Casutt-Derungs, Caviezel (Cuira), Caviezel (Tavau Clavadel), Censi, Crameri, Danuser, Degiacomi, Della Cà, Deplazes (Cuira), Deplazes (Rabius), Derungs, Dürler, Ellemunter, Engler, Epp, Fasani, Favre Accola, Felix, Florin-Caluori, Flütsch, Föhn, Gasser, Geisseler, Giacomelli, Gort, Grass, Hartmann-Conrad, Hitz-Rusch, Hof­mann, Holzinger-Loretz, Horrer, Jenny, Jochum, Kohler, Kunfermann, Locher Benguerel, Loepfe, Maissen, Märchy-Caduff, Michael (Donat), Müller (Favugn), Niggli (Samedan), Noi-Togni, Papa, Paterlini, Perl, Pfäffli, Preisig, Rettich, Rüegg, Salis, Sax, Schmid, Schneider, Schwärzel, Tanner, Thomann-Frank, Thöny, Tomaschett (Breil), Tomaschett-Berther (Trun), Ulber, von Ballmoos, Widmer (Favugn), Widmer-Spreiter (Cuira), Wilhelm, Brändli Capaul, Bürgi-Büchel, Decurtins-Jermann, Gujan-Dönier, Heini, Spadarotto

Resposta da la regenza

Tar la dumonda 1: Mintga collavuratura e collavuratur dal chantun ha da tut temp la pussaivladad da consultar en il portal online ses rendaquint dal salari. En il renda­quint persunal dal salari vegnan mussads er tut ils supplements. Mintga midada en il rendaquint dal salari chaschuna automaticamain ch'il rendaquint dal salari vegn tra­mess er per posta a la collavuratura u al collavuratur. Uschia èsi garantì ch'er colla­vuraturas e collavuraturs senza access a l'internet èn infurmads davart lur salari. A las emploiadas ed als emploiads dal chantun na vegn il dretg da s'infurmar davart l'agen salari refusà en nagina maniera.

Tar la dumonda 2: La regenza è pronta da tractar il giavisch e d'incumbensar l'uffizi da persunal d'inditgar sin il rendaquint dal salari las infurmaziuns decisivas per de­ter­minar il salari resp. supplementarmain la classa da salari ed il stadi en il svilup indivi­dual dal salari entaifer la classa da salari. L'adattaziun dal rendaquint dal salari duai vegnir fatga per il 1. da fanadur 2019.

Il sistem da salarisaziun è in instrument directiv. Per il svilup individual dal salari vegnan resguardads la prestaziun ed il cumportament da la collavuratura u dal colla­vu­ratur. I n'exista nagin dretg u nagin automatissem areguard il svilup dal salari fin al maximum d'ina classa da salari. Pervia da prestaziuns divergentas pon perquai resultar differents salaris.

13 da favrer 2019