Tar la dumonda 1: Cun stgaffir il post da coordinaziun per violenza a chasa ha la re­genza definì dus champs d'acziun. Champ d'acziun 1: concentrar las forzas e crear sinergias; champ d'acziun 2: sclerir il champ zuppà, promover la prevenziun e la con­stataziun a temp. Las incumbensas èn: cooperaziun da tut las instituziuns e da tut ils uffizis en furma d'ina collavuraziun interdisciplinara; metoda proactiva d'elavurar e da tractar cas da violenza a chasa; segirar ina purschida da cussegliaziun nunbirocra­tica per victimas e per persunas violentas; sviluppar novas purschidas e projects per gruppas spezialas en mira, meglierar las datas statisticas; segirar il transfer da savì­da tar tut las persunas spezialisadas ed instituziuns che s'occupan da cas da violen­za a chasa; colliaziun cun conferenzas naziunalas; promover la prevenziun e la con­stataziun a temp (lavur da publicitad, cooperaziun cun gruppas spezialas en mira). Il post da coordinaziun per violenza a chasa e las organisaziuns partenarias participa­das adempleschan tut las incumbensas previsas da la regenza (realisaziun guarda dumondas 2 e 3).

Tar las dumondas 2 e 3: A chaschun da la conferenza naziunala per realisar la Convenziun d'Istanbul dals 13 da november 2018 èsi vegnì accentuà ch'il problem da la violenza a chasa stoppia vegnir tractà en moda integrala. Il focus principal eran ed èn en il Grischun la coordinaziun, ils partenaris participads e la moda d'agir inter­disciplinara. Integrads en la cooperaziun èn la polizia chantunala, la procura publica, l'agid a victimas, l'uffizi da migraziun e da dretg civil, l'autoritad per la protecziun d'uf­fants e da creschids, la fundaziun "Chasa per dunnas", l'uffizi per l'execuziun giudi­ziala, il post da cussegliaziun per persunas violentas, il medi chantunal, ils ospitals e las praticas da medi, il departament d'educaziun ed il post da stab per l'egualitad da las schanzas. Durant la perioda da mez 2018 fin 2020 vegn il focus da realisaziun da la Convenziun d'Istanbul drizzà sin plaun interchantunal sin set secturs tematics. 1. finanziar purschidas en il sectur da la violenza a chasa; 2. scolaziun en ils secturs egualitad, aboliziun da rollas, respect vicendaivel, schliaziun da conflicts senza vio­lenza, relaziuns tranter umans, violenza da dunnas e d'umens sco er dretg d'inte­gri­tad; 3. intensivar la lavur cun persunas violentas; 4. render pli enconuschent il post da cussegliaziun per l'agid a victimas; 5. garantir ils alloschis da protecziun per vic­timas da violenza a chasa; 6. garantir las documentaziuns da culps e da blessuras da victimas da violenza, ch'èn utilisablas davant dretgira per proceduras dal dretg penal, dal dretg civil u dal dretg da persunas estras; 7. sustegnair uffants ch'èn pertu­tgads da violenza e resguardar lur interess en las decisiuns che pertutgan il dretg da visita ed il dretg da tgira.

Il chantun Grischun è activ en tut ils secturs tematics. Uschia existan il post da cus­segliaziun per l'agid a victimas, il post da cussegliaziun per persunas violentas, il biro d'egualitad, la chasa per dunnas u er il post da coordinaziun per violenza a chasa, dals quals la finanziaziun è reglada. La communicaziun interchantunala è vegnida extendida ils ultims onns (internet, communicaziuns a las medias) e vegn intensivada vinavant cun ina nova pagina d'internet per l'agid a victimas en Svizra. La scolaziun da persunas spezialisadas, en spezial da studentas e students da la scola auta da pedagogia ha lieu en il Grischun dapi plirs onns. Ultra da quai sustegna il chantun las purschidas da prevenziun dal post grischun da cussegliaziun per planisaziun da fa­miglia, sexualitad, gravidanza e partenadi (adebar) en las scolas. El metta a disposi­ziun a partir da l'onn 2019 meds finanzials supplementars per la scolaziun da peda­gogia sexuala. Er garantì è il barat cun ils auters chantuns. Plinavant represchenta il chantun Grischun ils interess da l'agid a victimas en tut la Svizra en la gruppa ac­cumpagnanta tar il rapport d'in postulat da la fracziun da la PS (14.4026) concernent il tema da la violenza a chasa. Il post da coordinaziun per violenza a chasa e las or­ganisaziuns partenarias participadas vegnan a cuntinuar cun lur lavur en ils secturs numnads ed a sviluppar vinavant soluziuns sco er purschidas.

Tar la dumonda 4: Sin plaun naziunal è l'uffizi federal per l'egualitad tranter dunna ed um (UFEG) cumpetent per la realisaziun e per il rapport per mauns dal Cussegl da l'Europa. El coordinescha il rapport cun la conferenza da las directuras e dals direc­turs chantunals da giustia e polizia (CDCGP) e cun la conferenza da las directuras e dals directurs chantunals dals affars socials (CDAS). A partir da la primavaira 2019 vegn in comité cuminaivel a fixar, co ch'ils chantuns duain far en detagl il rapport per mauns dal UFEG. La cumissiun chantunala cumpetenta dastga da tut temp prender invista da las respostas dal chantun Grischun.

6 da mars 2019