La regenza è sa fatschentada en il passà gia pliras giadas cun las pussaivladads da promover la mobilitad electrica. En consequenza a duas incumbensas parlamentaras è vegnì elavurà il rapport "Chancen der Elektromobilität für den Kanton Graubünden" dals 26 da zercladur 2015. Cun il conclus dals 8 da settember 2015 (protocol nr. 784) ha la regenza decidì d'approfundar vinavant resp. da realisar las mesiras d'emprima prioritad che vegnan proponidas en il rapport.

Tar las mesiras d'emprima prioritad tutgan la promoziun da l'infrastructura da char­giar, l'adattaziun dals criteris d'acquisiziun per remplazzar vehichels electrics da l'administraziun, la construcziun da posts da chargiar tar edifizis chantunals sco er l'organisaziun d'occurrenzas e da sairas d'infurmaziun. Las mesiras da l'emprima prioritad èn colliadas cun pitschens custs supplementars e sa laschan realisar en­taifer l'execuziun existenta e cun ils instruments existents sco il plan da mesiras per l'igiena da l'aria e la strategia chantunala da clima. Il chantun realisescha ultra da quai in management da mobilitad manaschial (MMM) per l'administraziun chantunala che duai gidar cun in'optimaziun dal traffic da lavur e da fatschenta a cuntanscher la via concludida per reducir il consum da carburants e las emissiuns dal parc chantu­nal d'autos da persunas. La promoziun da l'infrastructura da chargiar è vegnida ap­profundada vinavant cun il "plan da basa davart l'infrastructura da chargiar per l'electromobilitad". Cun il conclus dals 16 d'october 2017 (protocol nr. 872) ha la regenza decidì da persequitar vinavant trais recumandaziuns dal plan da basa. La­tiers tutga er la promoziun da l'infrastructura da chargiar che vegn examinada en il rom da la revisiun parziala currenta da la lescha chantunala d'energia (LEG). En la consultaziun han las propostas correspundentas però chattà mo pauc sustegn. La missiva tar la revisiun parziala da la LEG vegn probablamain deliberada da la regen­za l'atun e la debatta respectiva en il cussegl grond è previsa en la sessiun da prima­vaira 2020.

En segunda prioritad èsi vegnì proponì en il rapport menziunà d'ecologisar e d'in­tro­ducir in sistem da bonus/malus tar la taglia chantunala sin ils vehichels a motor, da promover finanzialmain autos electrics e l'e-carsharing sco er da stgaffir zonas spe­zialas per la mobilitad electrica e per indrizs da chargiar. Las mesiras da segunda prioritad èn vegnidas suspendidas per part perquai ch'ils meds finanzials mancan u perquai che l'effect è contestà. Tenor il conclus da la regenza dals 8 da settember 2015 (protocol nr. 784) na vegnan mesiras en il sectur da las taglias sin ils vehichels a motor betg persequitadas vinavant. En il Grischun èn immatriculads bundant 118 000 autos da persunas. Da quels han 454 (stadi dal schaner 2019) in motor puramain electric. In vehichel da quel gener survegn oz in rabat sin la taglia da traffic dad 80 pertschient, e quai illimitadamain areguard il temp. Da quai resulta per l'auto da persunas cun in pais total da maximalmain 2000 kg ch'è il pli frequent tar nus ina chargia fiscala annuala da 90 francs. Per in vehichel da 2700 kg da la classa supe­riura èn quai 110 francs. In'ulteriura distgargia ("bonus da 100 pertschient") n'arriva – en vista a quests imports modests – betg d'influenzar il cumportament da cumpra e da sviluppar uschia in effect directiv. A questas enconuschientschas è gia arrivà in studi ch'è vegnì fatg ils 22 da favrer 2013 per incumbensa da l'uffizi per la natira e l'ambient. En quel èsi vegnì constatà che la reducziun da la taglia sin ils vehichels a motor n'ha betg pudì influenzar en il Grischun la cumpra d'in auto da persunas che producescha pauc CO₂. Ina liberaziun cumpletta da la taglia da traffic sto er vegnir refusada per quel motiv, perquai che las entradas nettas da las taglias da traffic èn liadas ad in intent e vegnan duvradas per construir e per mantegnair las vias e perquai che vehichels electrics na strapatschan il corpus da la via betg main che vehichels cun motors convenziunals.

La regenza vegn a la conclusiun ch'ils elements ils pli impurtants da l'incumbensa Kappeler èn gia realisads en l'ina u l'autra furma u èn sin il precint da vegnir reali­sads. Quai duess succeder en moda pli intensiva en il rom dals instruments existents sco il plan da mesiras per l'igiena da l'aria u da la strategia chantunala da clima u en il MMM. Ultra da quai sa porschan en il rom da l'incumbensa Wilhelm "Green Deal per il Grischun – profitar da las schanzas da la midada dal clima" ulteriuras pussai­vladads per realisar mesiras en il sectur da la mobilitad electrica.

Sin basa da questas explicaziuns propona la regenza al cussegl grond da refusar l'incumbensa qua avant maun.

18 d'avrigl 2019