Navigation

Inhaltsbereich

Incumbensa da la fracziun da la PCD concernent la distgargia fiscala per la classa mesauna tras in augment da las deducziuns per premias d'assicuranza

Sessiun: 13.06.2019

Las finanzas dal chantun Grischun èn solidas. Dapi passa in decenni scriva il chantun cifras nairas e dispona d'in grond agen chapital. Pervia da la buna situaziun finanziala è vegnida reducida considerablamain l'imposiziun da taglia sin interpresas ils ultims onns, ed er la chargia tras las taglias sin il relasch resp. sin l'ierta è vegnida sbassada.

Pauc fin nagut n'han fin ussa las persunas natiralas ed en spezial la classa mesauna sentì da questas reducziuns da la taglia. La classa mesauna è anzi confruntada dapi onns cun premias creschentas da las cassas da malsauns che engrevgeschan pli e pli il budget da las burgaisas e dals burgais. Bleras famiglias e cunzunt las persunas ch'educheschan sulettas na pon gia oz strusch pli pajar las premias da las cassas da malsauns. Per persunas assicuradas cun entradas bassas paja bain u l'agid social las premias, u ch'ellas survegnan prestaziuns supplementaras correspundentas. Per in ulteriur circul da persunas datti l'instrument da la reducziun individuala da las premias (RIP). Bleras persunas na pon dentant betg profitar da la RIP.

L'art. 36 lit. h da la lescha da taglia (LT) prevesa bain ina deducziun fiscala per premias d'assicuranza. Quella è dentant limitada e na correspunda – pervia da las premias creschentas da las cassas da malsauns – en blers cas betg a la chargia effectiva chaschunada da las premias. Quai na cuntenta betg. Per la fracziun da la PCD èsi impurtant dad ussa er distgargiar fiscalmain la classa mesauna.

Las sutsegnadras ed ils sutsegnaders incumbenseschan perquai la regenza da midar la lescha da taglia per il chantun Grischun uschia, che las deducziuns vegnan fixadas da nov sco suonda:

-        tenor l'art. 36 lit. h cifra 1 LT dad 8400 sin 10 000 francs per persunas maridadas che vivan en ina lètg giuridicamain ed effectivamain nunseparada,

-        tenor l'art. 36 lit. h cifra 2 LT da 4200 sin 5000 francs per ils ulteriurs pajataglias e

-        tenor l'art. 36 lit. h cifra 4 LT da 900 sin 1500 francs per mintga uffant minoren u en scolaziun professiunala.

Puntraschigna, ils 13 da zercladur 2019

Cavegn, Crameri, Schneider, Berther, Bondolfi, Brunold, Caluori, Cantieni, Casutt-Derungs, Deplazes (Rabius), Derungs, Epp, Fasani, Florin-Caluori, Föhn, Geisseler, Kohler, Kunfermann, Loepfe, Maissen, Märchy-Caduff, Paterlini, Ruckstuhl, Sax, Schmid, Tomaschett (Breil), Tomaschett-Berther (Trun), Ulber, Zanetti (Landquart)

Resposta da la regenza

L'incumbensa da la fracziun parta d'ina vart dal fatg che la situaziun finanziala dal chantun saja fitg buna e che las persunas natiralas, en spezial la classa mesauna, n'hajan sentì nagut da las distgargias fiscalas d'enfin ussa. Da l'autra vart s'augmen­tian las premias da las cassas da malsauns d'in cuntin e na sajan betg pli pajablas per bleras famiglias ed en spezial per persunas ch'educheschan sulettas.

La situaziun da partenza descritta sto vegnir relativada per part. I constat ch'il chan­tun ha finanzas saunas. Tras l'augment pretendì da la deducziun d'assicuranza re­sultassan però en il futur entradas pli pitschnas. Las perspectivas finanzialas per il futur sa preschentan dentant bler mender. Ils ultims onns n'han ultra da quai betg mo las persunas giuridicas pudì profitar da distgargias fiscalas. Er las persunas natiralas èn vegnidas distgargiadas considerablamain, perquai che las deducziuns per uffants e la deducziun d'assicuranza èn vegnidas augmentadas sco er perquai che la deduc­ziun per la tgira d'uffants è vegnida introducida ed augmentada. Plinavant è la guliva­ziun da la progressiun fraida vegnida concedida gia en cas d'ina chareschia da trais puncts procentuals. Quai ha chaschunà – gist per l'onn fiscal 2019 – in'adattaziun da l'index e pervia da quai distgargias per las persunas natiralas da var 12 milliuns francs. Ultra da quai stoi vegnir accentuà ch'il chantun Grischun è fitg progressiv en il sectur da la reducziun individuala da las premias (RIP) e che persunas en relaziuns economicas modestas vegnan distgargiadas en moda generusa.

Cumpareglià cun differents chantuns ha il Grischun – ultra dal chantun Tessin – gia oz las deducziuns d'assicuranza las pli autas. En questas cifras è gia cuntegnì l'aug­ment da las deducziuns, che vegn realisà u che duai vegnir realisà cun l'entrada en vigur da la RFFA.

 

-

La cumparegliaziun da las premias da las cassas da malsauns cun quests chantuns mussa ch'in augment da la deducziun na para betg necessari. Da resguardar vali er che l'augment pretendì avess per consequenza ch'il Grischun concediss deducziuns circa duas giadas uschè autas sco quellas dal chantun Turitg. Dal puntg da vista da la gulivaziun da finanzas interchantunala chattass quai pauca accoglientscha.

Da l'augment pretendì da las deducziuns resultassan perditas da var 5,3 milliuns francs per il chantun, da 4,8 milliuns francs per las vischnancas e da 530 000 francs per las baselgias. Questas perditas ston vegnir consideradas er en connex cun las mesiras da la politica sociala en il rom da la realisaziun da la RFFA, che n'èn però actualmain anc betg fixadas.

Sa basond sin questas consideraziuns propona la regenza al cussegl grond da refusar questa incumbensa.

23 d'avust 2019