Navigation

Inhaltsbereich

Incumbensa Stiffler concernent ina strategia turistica dal Grischun

Sessiun: 21.04.2021

La pandemia dal coronavirus e las consequenzas economicas e socialas che resultan da tala vegnan a tangar anc ditg fermamain il Grischun sco chantun turistic. La pandemia na vegn betg simplamain ad esser a fin. I vegn fatg quint cun in lung temp transitoric tranter il status actual ed in status, en il qual nus vegnin a viver cun il virus en ina coexistenza acceptabla. «Suenter la pandemia» vul dir en il mender cas «avant la proxima pandemia». Il turissem vegn forsa ad esser dumandà adina puspè en moda sumeglianta en il futur.

En sia valitaziun da la situaziun concernent il futur dal turissem cun e suenter COVID-19 attestescha l'Universitad da Son Gagl al stadi vinavant ina rolla activa. Saja quai cun stgaffir cundiziuns generalas stabilas, cun reducir la birocrazia e las grevezzas finanzialas sco er cun simplifitgar e cun automatisar process, cun examinar impuls fiscals, cun sa focussar sin programs da promoziun per investiziuns en il futur e.u.v.

Differentas dumondas ed incumbensas èn vegnidas inoltradas l'ultim temp. Per part èn ellas gia vegnidas acceptadas (incumbensas Hohl, Maissen e Stiffler).

Pervia da quai è il temp madir per sviluppar ina clera strategia turistica per il Grischun. Las finamiras dal «Program da turissem dal Grischun 2014-2023» e dal «Cudesch alv per il turissem grischun» èn numnadamain per part antiquadas e la rolla dal Cussegl turistic sto vegnir messa en dumonda. En vista al fatg ch'ina nova strategia turistica vegn elavurada actualmain sin plaun naziunal, èsi impurtant ch'il Grischun sco chantun turistic fetschia er sias atgnas lezias e ses agens pensums en quest reguard.

Las sutsegnadras ed ils sutsegnaders incumbenseschan perquai la Regenza:

d'elavurar bainprest ed ensemen cun acturas ed acturs turistics eterogens en il chantun ina strategia turistica moderna ed adattada a la situaziun. Questa strategia cumpiglia ils suandants puncts centrals: visiun turistica, direcziun strategica dal turissem grischun cun cleras finamiras da svilup, accordada cun ils svilups en las regiuns/destinaziuns, suandada d'ina clera repartiziun da las incumbensas e da las rollas, basada sin in plan da finanzas e sin in urari. La finamira da questa strategia turistica è en quest connex ina consideraziun cumplessiva correlanta dals suandants champs d'activitad: svilup da las purschidas/dals products, stimulaziun da la dumonda, promoziun dal turissem e structuras.

Tavau, ils 21 d'avrigl 2021

Stiffler, Tomaschett (Breil), Wilhelm, Berweger, Bettinaglio, Brunold, Cahenzli-Phillipp, Caluori, Cantieni, Casutt-Derungs, Caviezel (Cuira), Caviezel (Tavau Clavadel), Censi, Crameri, Danuser, Della Vedova, Derungs, Ellemunter, Engler, Fasani, Felix, Flütsch (Spleia), Föhn, Gugelmann, Hartmann-Conrad, Hohl, Holzinger-Loretz, Horrer, Kienz, Kunfermann, Loepfe, Marti, Michael (Donat), Natter, Paterlini, Perl, Pfäffli, Preisig, Rüegg, Rutishauser, Schutz, Schwärzel, Thomann-Frank, Thür-Suter, Ulber, von Ballmoos, Waidacher, Wellig, Widmer (Favugn), Zanetti (Landquart), Adank-Arioli, Costa, Decurtins-Jermann, Flütsch (St. Antönien), Heini, Pajic, Spadarotto, Stieger, Tomaschett (Cuira), van Kleef

Resposta da la regenza

Da la pandemia dal coronavirus e da sias consequenzas resultan er per il turissem grischun sfidas fitg differentas. Uschia è mintga interpresa turistica dumandada d'examinar sia purschida e da s'adattar a las midadas dals basegns dals giasts. Ultra da quai vali d'observar il martgà da viadi internaziunal e da trair conclusiuns concernent la dumonda turistica. Destinaziuns turisticas fan bain d'analisar las tendenzas ed ils svilups ils pli giuvens e da surpigliar las conclusiuns en lur strategia d'interpresa. La digitalisaziun, la persistenza, il giavisch da regiunalitad, novas furmas da lavur e bler auter pli èn ferms motors dal svilup turistic futur, er en il Grischun.

Precis sco l'uniun Grischun vacanzas fixeschan er las singulas organisaziuns turisticas (organisaziuns per la gestiun da destinaziuns, organisaziuns turisticas regiunalas) e tut las interpresas turisticas (per exempel la Viafier retica, telefericas, hotels e.u.v.) lur strategia d'interpresa en moda autonoma.

La Regenza è pronta d'elavurar ina strategia turistica dal Grischun che vala en general e da dar in'attenziun particulara en spezial a la repartiziun da las incumbensas sco er da las rollas en il turissem grischun. Quai duai gidar a sclerir differentas dumondas ed a rinforzar il Grischun sco chantun turistic.

Ils puncts centrals d'ina strategia turistica dal Grischun formulads concretamain en l'incumbensa refusescha la Regenza però, perquai che l'enumeraziun è memia stretga e definitiva. I dovra ina moda da contemplaziun surordinada, bain savend ch'il chantun na po e na duai far a nagina destinaziun turistica ed a nagin furnitur da prestaziuns turisticas prescripziuns directas en vista strategica. Ina strategia turistica dal Grischun duai stgaffir in rom d'orientaziun e duai er pudair divergiar areguard la structuraziun dals puncts centrals enumerads.

Il Secretariat da stadi per l'economia SECO actualisescha per il mument la strategia turistica da la Confederaziun e fixescha en quella ils puncts centrals dal Cussegl federal per ils proxims onns. La strategia turistica dal Grischun duai resguardar questas adattaziuns.

Per la promoziun dal turissem en il chantun Grischun èn fixadas las basas en la Lescha per promover il svilup economic en il chantun Grischun (Lescha davart il svilup economic, LSE; DG 932.100). Per exempel è francada en la LSE ed en l'ordinaziun respectiva la finanziaziun da Grischun vacanzas, da la marca regiunala graubünden, dals stabiliments da sport e d'ulteriurs aspects ch'èn relevants per il turissem. En il rom da la Nova politica regiunala da la Confederaziun vegn er realisà il Program da turissem dal Grischun 2014–2023. Differents projects dal svilup turistic han pudì vegnir promovids decisivamain cun quest instrument durant ils ultims onns.

Sa basond sin questas explicaziuns propona la Regenza al Cussegl grond da midar questa incumbensa sco suonda: La Regenza elavura ina strategia turistica dal Grischun sco rom d'orientaziun per ils acturs en il turissem. En quest connex vegn la structuraziun dal cuntegn surlaschada a la Regenza.

29 da zercladur 2021