Sche umans vegnan explotads sut sforz en la prostituziun, sco forzas da lavur u sco batlegiaders, sa tracti da commerzi cun umans. Il causal ch'è reglà en l'art. 182 dal Cudesch penal svizzer (CP; CS 311.0) vegn designà da l'Uffizi federal da polizia (fedpol) sco "sclavaria moderna". La mobilitad simplifitgada, l'entretschament global ed ils novs meds da communicaziun influenzeschan l'extensiun ed il proceder en il sectur dal commerzi cun umans e fan ch'il commerzi cun umans è ina furma da crim internaziunala. Er sch'ils martgadants d'umans activs en Svizra èn per regla per­su­nas singulas, èn activas en il commerzi cun umans tranter auter er raits criminalas pli grondas (criminalitad organisada) cun colliaziuns a gruppas famigliaras u etnicas. Ch'il commerzi cun umans è finanzialmain attractiv, mussan las stimaziuns da l'Or­ga­nisaziun internaziunala da la lavur (OIL). Tenor las cifras actualas vegn generada sin l'entir mund ina svieuta da 150 milliardas dollars americans per onn cun il commerzi cun umans.

Tar la dumonda 1: Il commerzi cun umans è in tema er en il chantun Grischun. Ils posts da servetsch chantunals ch'èn confruntads cun tal (Polizia chantunala, Uffizi da migraziun e da dretg civil, Uffizi per industria, mastergn e lavur, Uffizi dal servetsch social [Agid a victimas]) èn conscients da la problematica e tiran a niz il spazi d'agir ch'els han a disposiziun per cumbatter il commerzi cun umans. Cun agid d'ob­ser­va­ziuns e da controllas en hotels, en studios, en la prostituziun sin via, sin plazzals, en restaurants e.u.v. vegn analisada la situaziun. En cas da suspect vegnan verifitgads ils indizis tras investigaziuns, vegnan barattadas e discutadas infurmaziuns exi­sten­tas tranter las autoritads (sin plaun chantunal e naziunal), vegnan instradadas me­si­ras pussaivlas, e las persunas inculpadas ed ils delinquents vegnan persequitads e chastiads consequentamain. En il sectur da la prostituziun èn actualmain activas principalmain lavureras da sex da la China e da la Tailanda en ils studios ed en ils hotels, en la prostituziun sin via dunnas da la Bulgaria, da la Rumenia e da l'Ungaria. A chaschun da las controllas resultan adina puspè indizis ch'i saja avant maun in'ex­plotaziun pussaivla d'ina situaziun d'urgenza. Cumprovar ils elements necessaris per il causal dal commerzi cun umans è dentant fitg difficil e cumplex. La procura publica ha fatg ils onns passads tut en tut in pèr paucas investigaziuns. Actualmain na maina ella dentant naginas proceduras sut il titel dal commerzi cun umans u da geners da delicts che stattan savens en in connex fitg stretg cun tal.

Tar la dumonda 2: Per il sectur tematic dal commerzi cun umans dispona la Polizia chantunala da collavuraturas e collavuraturs cun scolaziuns spezialas. Questas col­la­vuraturas e quests collavuraturs han in contact regular cun auters posts da ser­vetsch che s'occupan dal tema "commerzi cun umans". Ellas ed els na barattan lur infurma­ziuns betg mo entaifer il chantun, mabain er sin plaun interchantunal cun spe­zialistas e spezialists da la polizia, cun collavuraturas e collavuraturs da l'Administraziun fe­de­rala da duana sco er dal fedpol. Er l'Uffizi per industria, mastergn e lavur (UCIML) dispona da spezialistas e spezialists en tut ils secturs d'execuziun. L'Agid a victimas na dispona – pervia dal fitg pitschen dumber da cas actuals – betg da collavuraturas e collavuraturs spezialisads. Ellas ed els collavuran cun posts spezialisads naziu­nals. La Procura publica ha concentrà sias enconuschientschas specificas e sias cumpetenzas tar ina procuratura publica. Quella discutescha cun procuraturas publi­cas e procuraturs publics extrachantunals spezialisads e po sa procurar las enco­nu­schientschas spezialisadas.

Tar la dumonda 3: Las datas e las infurmaziuns vegnan barattadas en il cas singul tranter ils posts da servetsch chantunals e naziunals pertutgads. En cas da basegn vegnan ils posts da servetsch chantunals plinavant clamads ad ina maisa radunda, nua ch'i vegn discutà davart ils princips da la collavuraziun e – sche necessari – deci­dì davart pussaivladads d'optimaziun. Entaifer ils chantuns da la Svizra Orientala ha lieu mintga onn sin il stgalim polizial ina dieta specifica davart il tema "commerzi cun umans". Ina discussiun naziunala ha lieu d'ina vart sur la Gruppa da lavur naziunala Commerzi cun umans; da l'autra vart existan ulteriurs instruments, sco p.ex. quels dal fedpol per cumbatter la criminalitad organisada (COC: Countering Organised Crime) che servan al barat d'infurmaziuns, da discussiuns e d'experientschas.

Tar la dumonda 4: Victimas pon sa drizzar da tut temp a la polizia u a la Procura pu­blica. En il rom d'ina procedura penala vegni dà gronda attenziun a la situaziun da la victima ed a sia periclitaziun pussaivla. Tranter auter survegn ella in'assistenza giu­ridica gratuita u en cas da persunas estras vegn giuditgada la situaziun da dimora ensemen cun las autoritads da migraziun, per eventualmain pussibilitar a la victima vinavant la dimora e per uschia porscher protecziun ad ella. Tar il Post da cusse­glia­ziun per l'agid a victimas chattan las victimas alura ulteriura assistenza ed ulteriur sustegn, er sch'ellas na vulan betg far ina denunzia.

Tar la dumonda 5: La collavuraziun tranter ils posts da servetsch chantunals sco er il transferiment d'infurmaziuns davent e tar ils servetschs federals funcziunan. Actual­main vegni dentant examinà, sche la maisa radunda, che vegniva convocada fin ussa mo en cas singuls, duai sa radunar almain ina giada per onn.

1. da settember 2021