Navigation

Inhaltsbereich

Dumonda da la fracziun da la PPS concernent la politica d'energia dal chantun Grischun e la Repower (emprim sutsegnader Gort)

Sessiun: 27.08.2021

Pervia da la nauscha situaziun finanziala è vegnì augmentà l'onn 2016 il chapital da la Repower e novs investiders èn sa par­ti­cipads. Ils acziunaris existents han per consequenza pudì sa participar a l'augment dal chapital. La quota dals acziunaris che n'èn betg sa participads è uschia vegnida indeblida.

Sch'ins persequitescha pia l'istorgia da las aczias da la Repower dals onns 2015–2020, pon ins constatar il suandant:

Acziunaris

31-12-2015

31-12-2016

31-12-2017

31-12-2018

31-12-2019

31-12-2020

Ovras electricas dal chantun Turitg (EKZ)

-

28,32%

29,83%

29,83%

32,12%

33,96%

Chantun Grischun

58,30%

21,96%

21,96%

21,96%

21,96%

21,96%

UBS Clean Energy Infrastructure KG
(UBS-CEIS)

-

18,88%

18,88%

18,88%

18,88%

18,88%

Axpo Holding SA

33,70%

12,69%

12,69%

12,69%

12,69%

12,69%

Ulteriurs

8%

18,15%

16,64%

16,64%

14,35%

12,51%

Per resumar pon ins dir che la participaziun da las EKZ è creschida cuntinuadamain, entant che la participaziun dals auters acziunaris principals è restada tala e quala. Sin l'emprima egliada na po quai betg esser uschè dramatic, perquai che anc nagin n'ha per il mument la maioritad absoluta da las aczias. Ma sch'ins resguarda ch'in fond po er adattar sias investiziuns sin basa da sia strategia d'investiziun, pari tuttina dad esser pussaivel che quest fond sortia x insacura puspè da sia participaziun u ch'el vegnia schlià. Uschia fiss sia quota da 18,88 pertschient puspè disponibla. Sche las EKZ surpigliassan questa quota, arrivassan ellas (stadi dals 31-12-2020) sin ina quota da 52,84 pertschient ed avessan la maioritad absoluta da las aczias. L'onn 2016 na fissi – cun 47,20 pertschient – anc betg stà pussaivel da surpigliar la maioritad absoluta da las aczias. Però, nossa percepziun subjectiva ans mussa qua in maletg d'ina surpigliada «ostila» planisada gia daditg.

Lain dentant bandunar il mund da las cifras e tematisar in'autra chaussa remartgabla, numnadamain l'administratura dal fond UBS Clean Energy Infrastructure KG (UBS-CEIS), pia da quel fond ch'è – sco menziunà qua survart – participà dapi l'onn 2016 cun 18,88 pertschient a la Repower. L'administratura è la firma Fontavis SA, ed en ses cussegl d'administraziun sesa er l'actual cusseglier dals chantuns e commember dal cussegl d'administraziun da la Repower, dr. Martin Schmid, e quai – tenor il register da commerzi – gia dapi l'onn 2013. Cun leger tras il register da commerzi resortan anc dus auters nums: Roland Leuenberger, tenor il register da commerzi apparentamain commember dal cussegl d'administraziun da la Fontavis SA ils onns 2011–2018 ed oz CEO da la Repower, e Beat Huber, commember da la direcziun da la Fontavis SA e successur da Roland Leuenberger en il cussegl d'administraziun da la Repower.

Nus avain las suandantas dumondas a la Regenza:

  1. Lain partir dal fatg che la Regenza era conscienta da las colliaziuns tranter la firma Fontavis SA, il cusseglier dals chantuns dr. Martin Schmid, il CEO actual da la Repower Roland Leuenberger ed il commember dal cussegl d'administraziun da la Repower Beat Huber. Po la Regenza excluder che la firma Fontavis SA e ses cussegl d'administraziun hajan pudì profitar d'avantatgs, sco p.ex. d'infurmaziuns d'insiders?
  2. En vista a las enconuschientschas menziunadas qua survart sco er a la constellaziun tranter la firma Fontavis SA, il cusseglier dals chantuns dr. Martin Schmid, il CEO actual da la Repower Roland Leuenberger ed il commember dal cussegl d'ad­mi­ni­straziun da la Repower Beat Huber sa tschenta la dumonda, sche la Regenza considerescha quest fatg sco giuridicamain e moralmain nunproblematic?
  3. Tgenins commembers u tge commember dal cussegl d'administraziun represchenta ils interess dal chantun Grischun? Sin basa da l'istorgia menziunada qua survart excludain nus dr. Martin Schmid.
  4. Co garantescha la Regenza ch'ils interess dal chantun, da las vischnancas e da la populaziun grischuna, sco la segirezza energetica, plazzas da lavur, tschains d'aua e.u.v., vegnian represchentads en il cussegl d'administraziun? Surdat la Regenza incumbensas concretas a ses represchentants, u co pon ins s'imaginar quai?
  5. Datti contracts d'obligaziuns per acziunaris che reglan la repartiziun da las aczias en cas d'ina eventuala sortida dal fond UBS ed excluda la Regenza ch'il chapital d'aczias giaja a las EKZ e che la controlla da la Repower bandunia noss chantun en cas d'ina sortida dal fond UBS?

Cuira, ils 27 d'avust 2021

Gort, Favre Accola, Della Cà, Brandenburger, Grass, Hefti, Hug, Salis, Adank-Arioli, Roner, Stocker

Resposta da la regenza

Pervia da la situaziun ordvart difficila sin il martgà d'electricitad èn ils acziunaris da la Repower SA stads sfurzads l'onn 2016 d'augmentar il chapital. Il motiv primar per quest augment dal chapital è stada la necessitad da procurar per avunda liquiditad. En quest connex ha la Repower SA survegnì dus novs acziunaris gronds, numnadamain las Ovras electricas dal chantun Turitg (EKZ) ed il fond UBS Clean Energy Infrastructure Switzer­land SA (UBS CEIS). Pervia dal dretg da finanzas n'ha il chantun Grischun betg pudì sa participar a l'augment dal chapital.

Al chantun èsi enconuschent dapi in temp pli lung che las EKZ han acquistà aczias sup­plementaras or da la part da las aczias da la Repower SA (free float), che vegn vendida libramain a la bursa. La Regenza giuditgescha quai en moda critica, ed ella ha crititgà pliras giadas quest proceder. Al chantun Turitg sco proprietari da las EKZ è quai enco­nu­schent. La Regenza è en discussiun cun la Regenza dal chantun Turitg e cun il cussegl d'administraziun da las EKZ. Il chantun Turitg e las EKZ han empermess il fanadur 2021 d'acquistar naginas aczias supplementaras pli or dal free float.

Tar la dumonda 1: La Repower SA sto garantir en il rom da la lescha ch'i vegnian evitads conflicts d'interess entaifer sia organisaziun e dar gronda attenziun a quest tema sin basa dal dretg. Ella enconuscha er las prescripziuns da recusaziun correspundentas. Il diever d'infurmaziuns d'insiders per l'avantatg persunal (e per il dischavantatg da la societad) è ultra da quai suttamess ad ina smanatscha da sancziun penala. Avant l'augment dal cha­pital era la Repower SA anc quotada a la bursa. En il rom da l'augment dal chapital hai dà in prospect d'emissiun detaglià ed accessibel publicamain. Cur che las EKZ ed il fond UBS CEIS (al qual er la Cassa da pensiun chantunala dal Grischun è investida) èn sa participads, hai dà in augment public dal chapital. A quel han tut ils acziunaris e terzas persunas pudì sa participar per il medem pretsch. Plinavant hai dà in commerzi public cun dretgs da suttascripziun che ha pussibilità a tut las ulteriuras persunas interessadas da sa participar per il medem pretsch al chapital d'aczias.

Tar la dumonda 2: Tenor la Regenza correspunda la constellaziun al dretg. Dr. Martin Schmid exequescha ses mandat en il cussegl d'administraziun da la Repower SA en l'interess dal chantun, e quai sin basa da la strategia da proprietari dal chantun e sin fundament d'in contract da mandat. En la firma Fontavis SA, che administrescha il fond UBS CEIS, n'exequescha dr. Martin Schmid naginas activitads operativas. Beat Huber è il commember dal cussegl d'administraziun ch'è vegnì delegà dal UBS CEIS. Roland Leuenberger è CEO da la Repower SA dapi l'avrigl 2020 (ad interim dapi il settember 2019); da la Fontavis SA è el sortì dal tuttafatg gia il settember 2018 en reguard operativ, ma er sco commember dal cussegl d'administraziun e sco acziunari. Tras sia nominaziun sco CEO da la Repower SA è el sa retratg dal cussegl d'administraziun da la Repower SA sin la radunanza generala 2020.

Tar la dumonda 3: Tenor il contract d'obligaziuns vicendaivlas dals quatter acziunaris principals dals 25 da matg 2016 han il chantun Grischun e las EKZ mintgamai il dretg da dus sezs, ed il UBS CEIS e l'Axpo mintgamai il dretg d'in sez en il cussegl d'administra­ziun da set persunas da la Repower SA. Ils quatter acziunaris principals nomineschan cuminaivlamain il settavel commember, che presidiescha il cussegl d'administraziun. Il chantun Grischun ha delegà dr. Martin Schmid e Claudio Lardi en il cussegl d'admini­straziun da la Repower SA.

Tar la dumonda 4: Dapi l'onn 2014 vegnan las represchentanzas chantunalas nominadas en ils cussegls d'administraziun da societads d'ovras electricas tenor in mussavia, e quai observond la public corporate governance (PCG). Cun mintga commembra u commem­ber che vegn delegà dal chantun en in cussegl d'administraziun vegn plinavant concludì in contract da mandat en scrit ("incumbensa"). Quel definescha las obligaziuns da la per­suna incumbensada e circumscriva las aspectativas dal chantun. Las persunas incum­bensadas èn pia obligadas d'exequir lur funcziun sco commembras u commembers dal cussegl d'administraziun en l'interess da la societad sco er tenor las aspectativas dal chantun. Il dretg scumonda als acziunaris da far prescripziuns unilateralas liantas ad ina commembra u ad in commember dal cussegl d'administraziun en il sectur da sia cumpe­tenza centrala.

Tar la dumonda 5: Il contract d'obligaziuns per acziunaris dals 25 da matg 2016 regla la procedura che vegn applitgada, sch'in dals quatter acziunaris principals venda aczias. Quest contract cuntegna in dretg da l'emprima offerta e da precumpra che pussibilitescha a tut ils acziunaris principals da sa recumandar per ina surpigliada da las aczias, en cas che talas vegnan vendidas. En cas da plirs interessents vegnan las aczias attribuidas en proporziun da la part da las aczias.

27 d'october 2021