Tar la dumonda 1: Per il pajament d'agid d'urgenza vala il dretg chantunal tenor l'art. 82 al. 1 da la Lescha d'asil (LAsil; CS 142.31). Tenor l'art. 82 al. 4 LAsil sto l'agid d'urgenza sche pussaivel vegnir prestà en furma da prestaziuns realas en ils lieus designads dals chantuns. Tenor l'art. 2 al. 7 da la Lescha chantunala da sustegn (DG 546.250) dastga vegnir concedì a persunas estras unicamain agid d'urgenza, en cas che questas persunas n'han betg il dretg da dimora u èn en Svizra pervia d'ina dimora che na dovra betg ina permissiun. Tenor la strategia da la Regenza vegnan las persunas basegnusas che dumondan agid d'urgenza e che n'adempleschan betg lur obligaziun da bandunar voluntarmain il pajais, per regla collocadas en il center d'expulsiun Flüeli a Valzeina (vischnanca da Grüsch). Là vegn concedì mo pli in sustegn che sa referescha a la partenza da la Svizra, e quai en furma d'agid d'urgenza material. Sco prestaziun da servetsch supplementara per las persunas pertutgadas stat a disposiziun la Cussegliaziun per il return da l'Uffizi da migraziun e da dretg civil.

Tar la dumonda 2: Tenor las recumandaziuns vertentas da la Conferenza da las directuras e dals directurs chantunals dals affars socials (CDAS) duain las prestaziuns tenor l'art. 12 Cst. (CS 101) per regla esser pli bassas che quellas per requirentas e requirents d'asil en proceduras ordinarias. La midada da l'agid social a l'agid d'urgenza duai esser visibla e perceptibla. L'agid d'urgenza cumpiglia l'agid, l'assistenza ed ils meds ch'èn indispensabels per in'existenza en dignitad. Il gener e la dimensiun da l'agid d'urgenza duain sa restrenscher a quai ch'è absolutamain necessari e na duain betg dar in impuls per restar vinavant en Svizra. L'onn 2019 ha il Secretariat da stadi per migraziun (SEM) retschertgà las datas davart la pratica en ils chantuns. Il resultat davart las datas retschertgadas n'è anc betg vegnì publitgà fin ussa. Perquai che las vischnancas èn responsablas en singuls chantuns per pajar l'agid d'urgenza, vegnan applitgads differents concepts. En la gronda part dals ulteriurs chantuns vegnan pajadas prestaziuns finanzialas minimalas en l'agid d'urgenza.

Tar la dumonda 3: La Regenza ha gia menziunà repetidamain ch'ella vul mantegnair il princip da la collocaziun dependenta da la procedura. Ils differents basegns vegnan resguardads commensuradamain cun differents geners d'alloschis collectivs. La pratica vertenta è sa cumprovada en quel senn, ch'i po vegnir garantì – grazia a la consegna da prestaziuns materialas – in provediment suffizient da las persunas pertutgadas cun victualias e cun artitgels d'igiena. La ristga che per exempel persunas periclitadas da dependenza na dovrian betg ils meds finanzials pajads per cumprar ils meds indispensabels, po vegnir reducida considerablamain uschia. La Regenza è pronta d'examinar en moda critica la pratica vertenta, suenter ch'ils resultats da la retschertga da datas menziunada en la resposta 2 èn avant maun. Il pajament da prestaziuns cun valur monetara avess per consequenza che bain er il lieu dal center d'expulsiun stuess vegnir examinà.

Tar la dumonda 4: Duas persunas singulas survegnan tut en tut agid d'urgenza dapi 14 ½ resp. 13 ½ onns. La durada da retratga mesauna da quellas persunas che retiran actualmain (stadi: 15 da november 2021) tut en tut agid d'urgenza, è 461 dis.

Tar la dumonda 5: Persunas che retiran agid d'urgenza sa trategnan en Svizra senza permissiun da dimora valaivla. Questas persunas pon bandunar da tut temp la Svizra, sch'ellas coopereschan cun las autoritads cumpetentas per preparar la partenza. Per differents motivs n'è in'execuziun sfurzada betg adina pussaivla. Ina dumonda da survegnir ina permissiun per cas da direzza tenor l'art. 14 al. 2 LAsil po vegnir inoltrada il pli baud suenter ina dimora nuninterrutta da 5 onns en Svizra. Per questa dumonda ston esser ademplidas differentas cundiziuns, per exempel ston esser avant maun documents da viadi valaivels. Davart ina regulaziun per cas da direzza decida la finala il SEM en il cas singul concret, sa basond sin ina proposta motivada dal chantun. La Regenza è dentant conscienta dal fatg che persunas che retiran dapi blers onns agid d'urgenza, na sa laschan strusch pli motivar da bandunar la Svizra. Perquai s'engascha la Regenza tar la Confederaziun, che la pratica vertenta vegnia reponderada.

12 da schaner 2022