Navigation

Inhaltsbereich

Incumbensa Widmer (Favugn) concernent l'Educaziun sexuala 2.0 en la scola populara

Sessiun: 08.12.2021

A chaschun dal 4. Parlament da mattas dals 11 da november 2021 han las 67 participantas en la vegliadetgna dal stgalim superiur surdà ina petiziun cun il titel «Educaziun sexuala 2.0» a la Regenza. Concretamain vegnan pretendidas tranter auter las suandantas mesiras:

«L'educaziun sexuala en las scolas duai daventar obligatorica a partir da la scolina e cumpigliar en moda cumplessiva tut ils aspects da gender e d'orientaziun sexuala. Per quest intent ston vegnir consultadas persunas dal fatg externas; per garantir la persistenza duai vegnir integrada la persuna d'instrucziun da classa. L'educaziun sexuala sto cumpigliar tut las schlattainas, tut las furmas d'orientaziun sexuala sco er tut ils cumportaments sexuals e cumbatter cunter stereotips binars […]»

En spezial proponan ellas da realisar las suandantas pretensiuns:

  • La dimensiun da l'instrucziun sexuala vegn extendida.
  • Cun ina campagna vegnan ils geniturs ed autras persunas creschidas sensibilisads per il tema da las schlattainas.
  • Las persunas d'instrucziun vegnan scoladas en furmaziuns supplementaras specificas davart il tema schlattaina e diversitad da las schlattainas.

En il temp dad oz èsi pli impurtant che mai da concepir conscientamain ed eventualmain en moda ludica ils temas da l'orientaziun sexuala e dal tractament da quella en l'instrucziun en scola, perquai che nossas furmas da societad èn sa transfurmadas en moda decisiva e sa sviluppan permanentamain vinavant. Dapli protecziun cunter discriminaziun pervia da l'orientaziun sexuala ed er l'admissibladad da pliras furmas da convivenza èn mintgatant schizunt vegnidas legitimadas da las votantas e dals votants.

Cumbain che temas da l'educaziun sexuala èn francads en il Plan d'instrucziun 21, para il tractament pedagogic da quests temas però savens insuffizient, quai tenor las atgnas experientschas da numerusas votantas dal Parlament da mattas. Tscherts temas na vegnian gnanc tematisads u vegnian tabuisads. En general pon ins constatar che l'instrucziun sexuala duess vegnir priorisada en scola uschè baud sco pussaivel cun il sustegn d'expertas ed experts, da posts spezialisads e d'organisaziuns. Quai senza negar l'obligaziun dals geniturs. L'integraziun da persunas scoladas n'è la finala betg mo utila, perquai ch'i po esser difficil per las persunas d'instrucziun d'elavurar en moda moderna tals temas intims cun lur classa. Per las scolaras ed ils scolars n'èsi segiramain er betg agreabel da discurrer davart il corp, davart l'identitad e davart la sexualitad cun la medema persuna d'instrucziun, cun la quala vegnan uschiglio schliads pensums da matematica u scrits dictats da tudestg.

Sut quests aspects vegn la Regenza incumbensada:

  1. Da tractar cun l'urgenza necessaria la petiziun «Educaziun sexuala 2.0» dal Parlament da mattas 2021 en collavuraziun cun ils gremis ch'èn cumpetents en chaussa.
  2. Da rinforzar il tema instrucziun ed educaziun sexuala en la scola populara a partir da l'emprima classa primara e da dar in'attenziun pli intensiva a l'instrucziun respectiva.
  3. d'intermediar las metodas d'instrucziun modernas pussaivlas per quest tema a las persunas d'instrucziun responsablas.
  4. D'obligar las direcziuns da las scolas e las persunas d'instrucziun da porscher dis tematics davart il tema educaziun sexuala per tut las scolaras ed ils scolars a partir da la 1. classa primara, quai integrond expertas ed experts sco er posts spezialisads, e da consultar ils geniturs en ina moda adattada (p.ex. sairadas da geniturs) avant questas occurrenzas.
  5. D'examinar, sche e co ch'ina strategia chantunala d'introducir l'educaziun sexuala gia en scolina (protecziun d'abus) è pussaivla e raschunaivla – malgrà u cun l'integraziun dal Plan d'instrucziun 21.

Cuira, ils 8 da december 2021

Widmer (Favugn), Hofmann, Favre Accola, Atanes, Baselgia-Brunner, Berther, Brunold, Cahenzli-Philipp, Caviezel (Cuira), Degiacomi, Deplazes (Rabius), Epp, Florin-Caluori, Gartmann-Albin, Gugelmann, Kunfermann, Lamprecht, Maissen, Müller (Favugn), Niggli-Mathis (Grüsch), Noi-Togni, Preisig, Rettich, Rutishauser, Schmid, Schwärzel, Tomaschett (Breil), Tomaschett-Berther (Trun), Ulber, von Ballmoos, Widmer-Spreiter (Cuira), Brändli Capaul, Conrad-Roner, Costa, Fetz,Pajic, Spadarotto, Tomaschett (Cuira)

Resposta da la regenza

L'educaziun sexuala rinforza la conscienza da sasez e l'autodeterminaziun dals uffants e dals giuvenils ed ha uschia er in effect preventiv cunter violaziuns da l'integritad sexuala/violenza, cunter gravidanzas nunplanisadas/nungiavischadas e cunter malsognas sexualas. L'educaziun sexuala è ina incumbensa da cooperaziun da las persunas responsablas per l'educaziun, da las persunas d'instrucziun sco er d'expertas ed experts externs.

Tar il punct 1: La Conferenza da las presidentas e dals presidents dal Cussegl grond ha concludì da tractar las petiziuns dal 4. Parlament da mattas 2021 l'emprim da tut en il Cussegl grond. L'incumbensa qua avant maun ha ussa anticipà la tematica da la petiziun dal medem num.

Tar ils puncts 2 e 4: En il Plan d'instrucziun 21 GR vegn tractà il tema "Identitad, corp, sanadad – s'enconuscher ed avair quità da sasez" gia a partir dal stgalim da la scolina. Il med d'instrucziun "NaTec" è vegnì declerà sco obligatoric sin il stgalim primar. Sin il stgalim superiur chatta quest med d'instrucziun – cun "NaTec 7, 8 e 9" – ina cuntinuaziun raschunaivla. Quest med d'instrucziun actual garantescha ch'ils temas ch'èn menziunads en l'incumbensa, vegnan tractads resguardond la vegliadetgna ed en moda pli detagliada. Il chantun Grischun sustegna plinavant la purschida da pedagogia sexuala da l'uniun Adebar en las scolas dal chantun Grischun.

Tar il punct 3: Il tema educaziun sexuala è ina part da la scolaziun da basa a las differentas scolas autas da pedagogia ed el è er vegnì integrà en las furmaziuns supplementaras tar il Plan d'instrucziun 21 GR. Uschia han lieu actualmain en l'entir chantun occurrenzas obligatoricas da furmaziun supplementara per ils teams da chasas da scola dal stgalim primar. Questas occurrenzas accumpognan l'introducziun dal med d'instrucziun "NaTec". Quest med d'instrucziun cumpiglia l'instrucziun da l'educaziun sexuala.

Tar il punct 5: Sin plaun interchantunal vegnan rimnads ils giavischs per adattaziuns dal Plan d'instrucziun 21, e quai per tut ils trais tips da la scola populara. Er l'educaziun sexuala n'è betg en emprima lingia in tema singular specific per il Grischun. Per quest motiv duai el vegnir tematisà er en cooperaziun cun auters chantuns ed eventualmain integrà sin questa via en il proxim repassament dal Plan d'instrucziun 21.

Sa basond sin questas explicaziuns propona la Regenza al Cussegl grond da midar questa incumbensa sco suonda:

Punct 1: La petiziun Educaziun sexuala 2.0 en la scola populara vegn tractada cun l'urgenza necessaria, sch'il Cussegl grond l'accepta per mauns da la Regenza.

Puncts 2 e 4: L'Uffizi per la scola populara ed il sport (USS) sensibilisescha ils purtaders da scola cun agid da circularas sco er a chaschun da las sesidas da quartal cun tut las direcziuns da las scolas dal chantun Grischun, per il tema "educaziun sexuala" en la scola populara a partir da la scolina. Il USS infurmescha plinavant davart las purschidas d'expertas ed experts externs sco er davart las pussaivladads da furmaziun supplementara per persunas d'instrucziun. La finala infurmescha il USS che las scolas pon porscher dis tematics davart l'educaziun sexuala integrond expertas ed experts, e ch'ils geniturs duain vegnir consultads avant questas occurrenzas en ina moda adattada (p.ex. sairas da geniturs).

Punct 3: La Scola auta da pedagogia dal Grischun vegn a sviluppar ina purschida da furmaziun supplementara confurma als basegns, che po vegnir tratga a niz dals purtaders da scola en il rom da la furmaziun supplementara obligatorica entaifer la scola.

Punct 5: Il USS infurmescha il stgalim da la scolina davart l'effect da la pedagogia sexuala, er areguard la protecziun cunter abus sexual, e davart las purschidas d'expertas ed experts externs sco er davart las pussaivladads da furmaziun supplementara per las persunas d'instrucziun.

9 da mars 2022