Navigation

Inhaltsbereich

Dumonda Favre Accola concernent la registraziun statistica da cybergrooming

Sessiun: 08.12.2021

La primavaira 2021 ha il post spezialisà Adebar alarmà, perquai che adina dapli uffants e giuvenils dal chantun Grischun vesan violenza sexualisada/cybergrooming sur las medias socialas.

«Il fenomen cybergrooming exista, sche persunas creschidas entran en contact cun giuvenils u uffants en raits socialas, forums da discussiun ubain sin paginas d'internet da gieus da video per preparar da far in abus pli tard. La finamira da las persunas pedosexualas (groomers) è quella da cuntanscher ch'il giuvenil u l'uffant fetschia acts sexuals vi da sasez per als suenter metter sut squitsch cun il material fotografic intim, als constrenscher u schizunt intimar ad in inscunter real per abusar sexualmain la victima.» (Definiziun tenor PSC, Prevenziun svizra da la criminalitad)

Perquai ch'i n'exista actualmain (anc) nagin causal penal respectiv, sa fa in delinquent che sa baratta cun in uffant en in chat mo lura chastiabel, sch'el confrunta l'uffant cun illustraziuns u texts pornografics, sch'el intimescha l'uffant da far acts sexuals vi da sasez e sch'el guarda quels – per exempel cun agid d'ina livecam, sch'el integrescha l'uffant en in act sexual cun far acts sexuals davant l'uffant resp. che l'uffant s'accorscha, senza ch'i vegnia latiers tar in contact fisic tranter delinquent e victima, ubain sch'i suondan fatgs concrets suenter la proposta da s'inscuntrar, per exempel sch'il delinquent cumpara al lieu fixà (emprova da far acts sexuals cun uffants u da far registraziuns da pornografia cun uffants).

Il post spezialisà Adebar fa attent ch'i NA vegn BETG realisà ina protecziun d'uffants e da giuvenils en il mund digital en tala maniera sco quai che nus enconuschain quai en il mund analog. Persunas minorennas èn perquai expostas ad ina periclitaziun speziala. Adina dapli persunas delinquentas nizzegian l'anonimitad en la rait per s'avischinar ad uffants da maniera sexuala, cun la finamira d'instradar resp. da realisar in act sexual.

La protecziun cunter violenza sexuala sto s'orientar pli fitg a la realitad effectiva dals uffants e dals giuvenils e perquai includer il mund digital. Quai è impurtant per che uffants e giuvenils possian far diever en moda segira da las pussaivladads multifaras en la rait e las valitar endretg, per ch'els daventian conscients da las ristgas existentas e per ch'els possian valitar las consequenzas da l'agen agir en la rait. En cas d'incidents èsi ultra da quai impurtant, ch'ils uffants ed ils giuvenils possian sa laschar cussegliar svelt ed en moda nuncumplitgada, senza stuair avair tema da consequenzas.

A chaschun da l'occurrenza da podium dals 8 da november 2021 «Nus discurrin da quai – Il delinquent sexual da vis-à-vis» èsi sa mussà, ch'ils incidents en connex cun cybergrooming vegnan denunziads en ils pli paucs cas. Uschia èn registrads en la statistica respectiva da la Polizia chantunala dal Grischun per ils onns 2020 e 2021 mo dus cas per onn. Perquai èsi da partir dal fatg ch'il dumber zuppà è fitg grond en quest sectur.

En il cumbat cunter cybergrooming vegni engrevgiantamain vitiers, ch'igl è fitg cumplex e cumbinà cun gronds custs d'ir suenter als fastizs dad uschenumnads «groomers», da far investigaziuns e d'obtegnair las cumprovas cunter tals. Per pudair generar success dovri l'engaschament da teams polizials d'investigaziun che sa cumponan da spezialists da cybercrime, d'analists da criminalitad sco er d'investigaders polizials spezials. Ultra da quai è necessaria ina stretga collavuraziun cun la procura publica.

Er il Parlament grischun da mattas è gia vegnì activ quest onn ed ha inoltrà a la Regenza ina petiziun correspundenta concernent maletgs erotics nungiavischads e grooming.

  1. È la Regenza pronta da stgaffir in post d'annunzia nunbirocratic, nua ch'er incidents anonims pon vegnir endatads online, saja quai da persunas pertutgadas, da scolas, da servetschs socials da las scolas, da servetschs da cussegliaziun sco Adebar, da la lavur cun giuvenils u sumegliants?
  2. La lavur da sensibilisaziun è enormamain impurtanta, tuttina na disponan betg tut las vischnancas da scola d'ina atgna lavur sociala da scola u incumbenseschan (alternativamain / supplementarmain) il post da cussegliaziun Adebar cun questa lavur. È la Regenza pronta da sensibilisar tut las vischnancas da scola per questa lavur impurtanta ed è ella er pronta d'incumbensar quellas da definir entaifer la vischnanca da scola in post da consultaziun nunbirocratic correspundent (p.ex. lavur sociala da scola e.u.v.) ed er da far enconuschent quel a las scolaras ed als scolars, per che uffants e giuvenils possian sa laschar cussegliar en cas d'incidents?
  3. Gist pervia da las resursas da persunal limitadas paran cooperaziuns interchantunalas d'esser necessarias en quest fitg cumplex ambient da la criminalitad da cyber. Tge cooperaziuns actualas datti ed è la Regenza pronta d'examinar ulteriuras cooperaziuns sco er l'augment da quellas cun resursas e cun know-how extern?
  4. È la Regenza pronta d'examinar l'augment da las resursas persunalas tar la Polizia chantunala, en cas ch'igl avess da sa mussar – sin fundament dal dumber da las annunzias (anonimas) che vegnan fatgas al post d'annunzia davart cybergrooming e.u.v. – ch'igl è necessari da rinforzar il proceder per cumbatter la violenza sexualisada cunter giuvenils ed uffants en il mund virtual?

Cuira, ils 8 da december 2021

Favre Accola, Gugelmann, Rettich, Berther, Brandenburger, Cahenzli-Philipp, Casutt-Derungs, Danuser, Degiacomi, Della Cà, Dürler, Ellemunter, Gartmann-Albin, Gort, Grass, Hartmann-Conrad, Hefti, Hofmann, Hohl, Holzinger-Loretz, Hug, Koch, Loepfe, Märchy-Caduff, Müller (Favugn), Niggli-Mathis (Grüsch), Noi-Togni, Papa, Preisig, Salis, Schmid, Schwärzel, Tanner, Thomann-Frank, Thür-Suter, Tomaschett (Breil), Tomaschett-Berther (Trun), Ulber, von Ballmoos, Widmer (Favugn), Conrad-Roner, Costa, Fasani-Horath, Pajic, Renkel, Stocker, Tomaschett (Cuira)

Resposta da la regenza

Tar la dumonda 1: In post d'annunzia che po vegnir consultà er en moda anonima po oravant tut esser in agid per survegnir in maletg approximativ davart la frequenza e davart la furma da «cybergrooming». Cas che vegnan annunziads en moda anonima èn dentant grevs da persequitar vinavant tenor il dretg da la procedura penala. Per quant ch'i stattan en discussiun p.ex. delicts che vegnan persequitads sin plant, na tanscha in plant penal fatg anonimamain u la remartga ad in post d'annunzia per regla betg per pudair iniziar investigaziuns. En quels cas che la delinquenta u il delinquent po vegnir identifitgada u identifitgà, ma ella u el snega, èsi il pli savens necessari che la victima vegnia enconuschenta per pudair registrar las cumprovas che pon vegnir duvradas davant dretgira. Ord vista da l'autoritad da persecuziun penala na para perquai in post d'annunzia betg da cuntanscher las finamiras, sch'ins ha er l'intenziun da stgaffir ina meglra efficacitad dal dretg penal cunter «cybergrooming». In post d'annunzia exista gia. Il Center naziunal per la cybersegirezza (NCSC) porscha gia la pussaivladad d'annunziar in cyberincident en in emprim pass en moda simpla e senza stuair tradir ulteriuras datas. Sin la pagina d'internet (www.ncsc.admin.ch/ncsc/de/home.html) chattan ins ultra da quai infurmaziuns e links spezialmain davart la tematica educaziun sexuala en il sectur da cybergrooming per giuvenils ed uffants. Tranter auter chattan ins là il renviament a «Pro Juventute cussegliaziun + agid 147» che agescha sco post da consultaziun. Uffants e giuvenils pon telefonar al nr. 147 durant 24 uras, e quai en moda confidenziala e gratuitamain.

Tar la dumonda 2: La Regenza è pronta da sensibilisar las instituziuns responsablas per la scola al tema sco er d'infurmar davart las purschidas da sustegn existentas. Schebain instituziuns responsablas per la scola vulan perquai installar aposta la lavur sociala da scola sco post da consultaziun, è tenor la Lescha da scola sulettamain en lur cumpetenza (art. 40 Lescha da scola; DG 421.000). La gronda part da las scolaras e dals scolars ha access a la lavur sociala da scola. Posts sco Adebar, Il Servetsch psicologic da scola, la psichiatria d'uffants e da giuvenils u la lavur sociala da scola porschan en il cas singul in sustegn concret sco post da consultaziun per uffants e giuvenils. Era las persunas d'instrucziun enconuschan quests posts. Ultra da quai vegnan ils uffants e giuvenils – tenor il Plan d'instrucziun 21 GR – sensibilisads davart ils privels da las medias socialas en moda adattada, resguardond lur vegliadetgna e sur ils ciclus ora. Plinavant sustegna il chantun la purschida da prevenziun cunter violaziuns da l'integritad sexuala che Adebar porscha, cura che las scolas la dumondan.

Tar la dumonda 3: Actualmain existan en Svizra en ils sectur dal cumbat cunter la cybercriminalitad la Rait da las autoritads da polizia per cumbatter la criminalitad digitala (NEDIK; cf. resposta a la dumonda GartmannAlbin concernent la pedofilia en l'internet). Medemamain exista ina plattafurma per il barat d'infurmaziuns davart la criminalitad digitala seriala dals chantuns da la Svizra franzosa. Cun il conclus dals 16 da november 2021 ha la Regenza dal chantun Grischun autorisà il cumandant da la Polizia chantunala dal Grischun da suttascriver la cunvegna dals chantuns da la Svizra franzosa concernent la participaziun. L'access ed il diever da questa plattafurma vegn a star a disposiziun a la Polizia chantunala dal Grischun a partir da la primavaira 2022.

Ils corps da polizia da la Svizra èn londervi da concepir plattafurmas per il barat d'infurmaziuns e da datas en differents secturs tematics. Uschespert che las premissas per il barat da datas automatisà existan er tar la Confederaziun, tar ils concordats da polizia u tar ils chantuns ed uschenavant che quellas pussibiliteschan ulteriuras furmas da collavuraziuns interchantunalas, vegn la Regenza ad examinar la participaziun a cooperaziuns resp. a metter a disposiziun resursas persunalas supplementaras.

Tar la dumonda 4: En il fratemp demussa la gronda part dals delicts classics in connex cun la cybercriminalitad. Questa dischlocaziun en il spazi cyber pretenda adattaziuns persunalas ed organisatoricas da la Procura publica e da la Polizia sco er investiziuns en la furmaziun supplementara ed en l'infrastructura tecnica. Correspundentamain ston vegnir examinadas cuntinuadamain – e sche inditgà er realisadas – ina spezialisaziun sco er in'amplificaziun dals meds persunals en la persecuziun penala per cumbatter quest sectur da delicts. La cumpetenza dal budget e cun quai er la cumpetenza d'augmentar las resursas da persunal ha però il Cussegl grond.

3 da mars 2022