Cun l'incumbensa da la fracziun da la PLD duai la Regenza vegnir incumbensada d'elavurar per mauns dal Cussegl grond recumandaziuns d'agir per reducir la chargia fiscala per persunas natiralas e giuridicas, e da resguardar en quest connex ch'i possia vegnir generà cun mintga daner da taglia spargnà la pli gronda valurisaziun pussaivla per l'entir chantun.

Ils scenaris da la politica da finanzas per ils onns da planisaziun 2023–2025 mussan, che las perspectivas finanzialas èn colliadas cun relativamain grondas malsegirezzas. En spezial la distribuziun dal gudogn da la BNS – ch'è fin l'onn 2025 calculada en moda fitg optimistica cun radund 93 milliuns per onn – n'è insumma betg garantida. Il motiv è che l'autezza dals pajaments effectivs da la BNS dependa ils proxims onns decisivamain dal svilup sin ils martgads da finanzas.

En la perioda da legislatura currenta 2019–2022 èn gia vegnidas decididas e realisadas distgargias fiscalas considerablas tant per las persunas natiralas sco er per las persunas giuridicas. Las consequenzas a media vista sin las entradas dal chantun vegnan a sa mussar en quest connex pir ils proxims onns.

Ils 12 da favrer 2019 ha il Cussegl grond deliberà la refurma da la taglia sin l'ierta. Questa revisiun è entrada en vigur il 1. da schaner 2021. Cun la refurma da la taglia sin l'ierta ha il chantun midà da la taglia sin il relasch a la taglia sin la part d'ierta, uschia ch'i èn vegnidas cuntanschidas ina unificaziun da la taglia sin l'ierta e da la taglia sin donaziuns dal chantun e da las vischnancas sco er distgargias. Sin plaun chantunal è la distgargia principala quella, ch'er ils geniturs sco er las partenarias ed ils partenaris da concubinat – ultra da las conjugalas e dals conjugals e dals uffants – èn deliberads da l'obligaziun da la taglia sin l'ierta e da la taglia sin donaziuns.

Ils 29 d'avust 2019 ha il Cussegl grond deliberà la realisaziun da la refurma fiscala e da la finanziaziun da la AVS (RFFA) en il chantun Grischun. Las regulaziuns spezialas chantunalas per societads da domicil e da holding sco er per societads maschadadas èn vegnidas abolidas per il 1. da schaner 2020 e remplazzadas tras mesiras per la distgargia fiscala renconuschidas sin plaun internaziunal (patent box, deducziun supplementara per ils custs da perscrutaziun e da svilup, e.u.v.). La tariffa chantunala da la taglia sin il gudogn è vegnida sbassada da 5,5 % sin 4,5 %. Ed uschia è vegnida reducida la grevezza fiscala effectiva sin il gudogn per persunas giuridicas dapi il 1. da schaner 2020 cun 14,73 % resp. a partir da l'onn 2021 cun 14,77 % sut la media svizra da 14,87 %. Er persunas natiralas han profità da la realisaziun da la RFFA en il chantun Grischun. Las dividendas ord participaziuns qualifitgadas da la facultad privata èn suttamessas dapi il 1. da schaner 2020 a l'imposiziun parziala da taglia en la dimensiun da 50 %. L'import liber da taglia da las persunas natiralas è vegnì auzà da 15 000 francs sin 15 500 francs, quai che chaschuna perditas da taglia annualas da stgars 6 milliuns francs per il chantun e da bun 5 milliuns francs per las vischnancas. Per il chantun e per las vischnancas resultan da l'entir pachet da la RFFA perditas da taglia da mintgamai bun 18 milliuns francs per onn. La Confederaziun sa participescha vi da quai cun totalmain circa 7 milliuns francs.

Ils 20 d'october 2020 ha il Cussegl grond concludì da sbassar la tariffa maximala da la taglia speziala sin prestaziuns da chapital ord la prevenziun da 4 % sin 2 %. Cun quai è vegnida augmentada talmain la cumpetitivitad dal chantun Grischun en connex cun las retratgas da chapital, ch'il chantun occupa – en la cumparegliaziun interchantunala – ina plazza a la testa dapi il 1. da schaner 2021.

Tge consequenzas che las mesiras fiscalas e da la politica da finanzas che vegnan prendidas en il rom da la realisaziun da la taglia minimala da la OECD, vegnan ad avair per il chantun Grischun, n'è il mument anc betg enconuschent. A chaschun da la determinaziun annuala dals pes da taglia che vegn fatga en il rom dal preventiv, ha il Cussegl grond la finala la pussaivladad da reagir sin la situaziun actuala. La Regenza resguarda perquai in'elavuraziun da las recumandaziuns d'agir per ulteriuras reducziuns da la taglia per mauns dal Cussegl grond sco betg opportuna.

Sa basond sin questas explicaziuns propona la Regenza al Cussegl grond da refusar questa incumbensa. 

2 da mars 2022