Navigation

Inhaltsbereich

Dumonda Horrer concernent l'areal dal Sennhof a Cuira ed ils contracts da dretg da construcziun dal chantun

Sessiun: 08.12.2021

L'areal dal Sennhof ha survegnì ina nova utilisaziun en il rom da la realisaziun dal stabiliment giudizial Cazas Tignez. Ina concurrenza d'investiders ha decidì, tgi che survegn il dretg da construcziun. Sco enconuschent ha il project «Continuum» gudagnà la concurrenza d'investiders, ed ha survegnì l'agiudicaziun per il dretg da construcziun. En il rapport dal gremi da giudicament explitgescha la gruppa d'investiders dal project «Continuum» – en la descripziun e documentaziun dal studi da project – tranter auter: «La part nova da l'edifizi porscha abitaziuns favuraivlas d'ina societad cooperativa, cunzunt per famiglias, però er per il spazi d'abitar ch'è oz urgentamain necessari per la vegliadetgna. In Sennhof public ed animà per tut las classas da vegliadetgna è pia garantì» («Bericht des Beurteilungsgremiums – Investorenwettbewerb Areal Sennhof», p. 43).

Online: WEB_Bericht_Investorenwettbewerb_Sennhof.pdf (gr.ch)

Sco ch'igl è vegnì enconuschent publicamain en il fratemp (guardar contribuziun en il schurnal regiunal Grischun dad SRF dals 15 d'avrigl 2021), na vegnan realisadas naginas abitaziuns favuraivlas d'ina societad cooperativa, malgrà l'empermischun oriunda en il studi da pilot ch'era vegnì inoltrà durant la concurrenza d'investiders. Anzi, i vegnan construidas abitaziuns d'atgna proprietad dal segment da pretschs superiur. Ina dumonda en chaussa ch'è vegnida respundida da la Regenza durant la sessiun da zercladur, n'ha betg pudì sclerir pertge ch'i n'è betg vegnì tegnì pled.

En la debatta publica davart la nunrealisaziun da las abitaziuns d'ina societad cooperativa sin l'areal dal Sennhof, sco ch'ellas eran vegnidas empermessas, è s'exprimida la presidenta da la societad cooperativa bainviver, ch'è medemamain ina da las persunas che survegn il dretg da construcziun dal chantun. En il schurnal regiunal dad SRF dals 21 d'avrigl 2021 ha ella declerà ch'ils contracts da dretg da construcziun dal chantun difficulteschian da realisar abitaziuns d'utilitad publica (guardar contribuziun schurnal regiunal Grischun dad SRF dals 21 d'avrigl 2021).

Sut quest aspect vegnan tschentadas las suandantas dumondas a la Regenza:

  1. Correspundan ils contracts da dretg da construcziun dal chantun en general – e particularmain quel da la gruppa d'investiders «Continuum» – als standards ch'èn usitads oz e che vegnan applitgads en auters chantuns u en autras citads per realisar abitaziuns d'ina societad cooperativa?
  2. Permettan ils contracts da dretg da construcziun dal chantun ad in purtader d'abitaziuns d'utilitad publica u ad in investider che vul dar en locaziun (almain ina part) da sias abitaziuns per in tschains da locaziun sin basa dals custs, da dastgar profitar d'in emprest dal «fond da rotaziun»?
  3. Sche las dumondas 1 e 2 survegnan ina resposta negativa, pertge è quai il cas?
  4. Sche las dumondas 1 e 2 survegnan ina resposta negativa, tge basas legalas stuessan vegnir adattadas e/u stgaffidas da nov per che las dumondas 1 e 2 possian survegnir en l'avegnir ina resposta positiva?

Cuira, ils 8 da december 2021

Horrer, Wilhelm, Perl, Atanes, Baselgia-Brunner, Caviezel (Cuira), Degiacomi, Gartmann-Albin, Hofmann, Preisig, Rettich, Rutishauser, Schwärzel, Pajic, Spadarotto, Tomaschett (Cuira)

Resposta da la regenza

En la resposta dals 22 da zercladur 2021 (prot. nr. 563/2021) a la dumonda Horrer dals 21 d'avrigl 2021 concernent l'areal Sennhof Cuira ha la Regenza explitgà las cundiziuns generalas da la concurrenza d'investiders ch'era vegnida realisada sco er ils criteris da decisiun per surdar il dretg da construcziun. En sia resposta ha ella ultra da quai rendì attent a las prescripziuns dal dretg chantunal da finanzas, che pretendan ch'il chantun consegnia immobiglias da la facultad finanziala a valurs confurmas al martgà (cf. en chaussa er la resposta da la Regenza dals 13 da mars 2013 a la dumonda Michel concernent ina midada d'utilisaziun dal Sennhof: Ina praschun che pussibilitescha libertad d'agir e la resposta da la Regenza dals 23 d'avust 2017 a la dumonda Widmer-Spreiter concernent il futur dal Sennhof).

Tar la dumonda 1: Ils contracts da dretg da construcziun dal chantun, sco quel per l'areal Sennhof, correspundan als standards ch'èn usitads en Svizra. Pervia da las prescripziuns dal dretg da finanzas n'èsi betg permess al chantun da ceder terren da construcziun ad in pretsch pli favuraivel. La cessiun da bains immobigliars sut la valur da martgà diminuescha la facultad finanziala dal chantun. Quai correspunda – tenor il dretg da finanzas – ad in'expensa e dovra adina ina basa legala. Ina tala manca en la legislaziun chantunala. Ils contracts da dretg da construcziun che vegnan applitgads dal chantun n'èn pia er betg orientads a las particularitads specificas d'abitaziuns favuraivlas da societads cooperativas.

Tar la dumonda 2: Las pretensiuns per obtegnair in emprest dal "fond da rotaziun" a tschains moderads per metter a disposiziun abitaziuns favuraivlas resultan da la legislaziun federala davart la promoziun d'abitaziuns ed èn fitg rigurusas. Effectivamain n'èn questas prescripziuns betg cumpatiblas cun ils standards usitads sin il martgà per surdadas da dretgs da construcziun. Las cundiziuns dal contract da dretg da construcziun che ston vegnir communitgadas en il rom d'ina concurrenza d'investiders, stuessan s'orientar dal cumenzament ennà ed en moda consequenta a la construcziun d'abitaziuns d'utilitad publica, per che las cundiziuns dal "fond da rotaziun" possian vegnir ademplidas.

Tar la dumonda 3: Per pudair profitar d'in emprest dal "fond da rotaziun" stuessan ils contracts da dretg da construcziun divergiar en plirs puncts da las prescripziuns usiadas da l'economia dal martgà liber. Ils dretgs da construcziun a favur da purtaders d'abitaziuns d'utilitad publica èn per regla caracterisads tras la determinaziun d'in tschains dal dretg da construcziun pli moderà sco er tras restricziuns d'utilisaziun (p.ex. tschains da locaziun sin basa dals custs, occupaziun minimala u pretensiuns a las locatarias ed ils locataris concernent limitas d'entrada e da facultad) e tras cunvegnas supplementaras (p.ex. construir resguardond la vegliadetgna, preparar surfaschas per l'utilisaziun publica sco scolinas u centers da quartier ubain art a l'edifizi). Questas pretensiuns dal "fond da rotaziun" na sa laschan betg accordar cun ils princips vertents dal dretg chantunal da finanzas.

Tar la dumonda 4: Il chantun promova oz, bain en in rom modest e geograficamain cleramain limità, la construcziun d'abitaziuns. Questa promoziun sa concentrescha – sin basa da la sortida da la construcziun d'abitaziuns socialas, ch'è vegnida concludida dal Cussegl grond l'onn 2006 – sin la meglieraziun da las relaziuns d'abitar en il territori da muntogna (cf. protocol dal Cussegl grond dals 12 da zercladur 2003, p. 13). Sa basond sin la legislaziun chantunala davart la construcziun d'abitaziuns socialas e la meglieraziun da las relaziuns d'abitar en il territori da muntogna (DG 950.250) vegnan pajadas mintga onn contribuziuns d'investiziun da tut en tut var 1,3 milliuns francs. Sustegnida vegn la populaziun purila sco er betg purila che viva en relaziuns finanzialas modestas, e quai en tut las valladas dal chantun en las zonas da collinas e da muntogna tenor la classificaziun agricula da zonas.

La construcziun d'abitaziuns tras ina cessiun pli favuraivla da terren da construcziun (p.ex. a famiglias indigenas) vegn promovida oz – tut tenor la necessitad – da singulas vischnancas per reglar la purschida locala da spazi d'abitar. Quai sco ina da pliras mesiras da la planisaziun dal territori. La repartiziun existenta da las incumbensas tranter il chantun e las vischnancas è sa cumprovada.

En cas che la legislaziun chantunala tenor la resposta a la dumonda 4 duess vegnir extendida, stuess ubain vegnir integrada ina basa en las leschas existentas ubain vegnir relaschada ina nova lescha. Per motivs da la sistematica da la lescha na duess la Lescha chantunala da finanzas percunter betg vegnir duvrada per incumbensas da la politica sectoriala.

24 da favrer 2022