Il project Correcziun da la via colliaziun Miralago Sid, che la Regenza ha approvà cun il conclus dal 1. da zercladur 2021 (prot. nr. 515/2021), prevesa in engrondiment da la via chantunala existenta. Tenor l'art. 18 al. 1 da la Lescha federala davart la protecziun da l'ambient (Lescha davart la protecziun da l'ambient, LPAmb; CS 814.01) dastga in stabiliment che dovra ina sanaziun vegnir modifitgà u engrondì mo, sch'el vegn sanà a medem temp cunter la canera. L'obligaziun legala d'ina sanaziun cunter la canera sa restrenscha exclusivamain sin il perimeter dal project da construcziun.

Tar il punct 1: Il perimeter dal project Correcziun da la via colliaziun Miralago Sid è situà a l'ost da Miralago ordaifer il territori d'abitadi. Perquai ch'in mir da protecziun cunter canera entaifer il perimeter dal project na gida betg a proteger il territori d'abitadi cunter la canera, n'è el cun dretg betg in element dal project.

L'Uffizi federal d'ambient (UFAM) ha edì – ensemen cun l'Uffizi federal da vias (UVIAS) – in agid d'execuziun per sanar vias cunter la canera (Leitfaden Strassenlärm, Vollzugshilfe für die Sanierung). Il mussavia duai garantir in'execuziun effizienta, unitara e chapaivla, in tractament egual da tut las parts participadas ed in'attribuziun gulivada dals meds finanzials en l'entira Svizra. Tenor il mussavia vegnan valitadas la supportabladad economica e la commensurabladad da las mesiras da protecziun cunter la canera a maun d'ina metoda unitara, cun la quala ils custs vegnan cumparegliads cun il niz da las mesiras da protecziun cunter canera. Per il mir da protecziun cunter canera, che vegn pretendì en l'incumbensa, ha l'analisa dals custs e dal niz purtà in resultat negativ, perquai che la limita d'immissiuns vegn surpassada mo tar ina chasa e perquai che la lunghezza necessaria dal mir da protecziun cunter canera chaschunass custs memia auts en cumparegliaziun cun il niz. La construcziun d'in mir da protecziun cunter canera tras il chantun è sut quest aspect sproporziunada e cuntrafa al princip dal tractament egual.

Ils quitads da la populaziun locala areguard la grevezza da canera èn vegnids e vegnan tuttina prendids serius dal chantun. Uschia ha l'Uffizi da construcziun bassa dal Grischun (UCB) laschà far l'onn 2019, sin giavisch d'in represchentant dals abitants da la via preoccupà, in rapport da canera ch'è vegnì explitgà a las persunas interessadas tant al lieu sco er en scrit.

Il vitg da Miralago fa part al nordvest dal territori communal da Poschiavo ed al sidost da la vischnanca da Brusio. Gia cun il conclus dals 28 d'avust 2007 (prot. nr. 1009/2007) e cun il conclus dals 22 d'october 2002 (prot. nr. 1470/2002) ha la Regenza approvà projects da sanaziun cunter la canera per tuttas duas vischnancas. Quests projects èn en vigur. En il sectur da Miralago è la via dal Bernina pia vegnida «sanada in'emprima giada» areguard la canera da traffic. En connex cun l'engrondiment resp. project da renovaziun da la via dal Bernina cun in trottuar, ch'è previs sin il territori communal da Brusio, ha il UCB incumbensà l'onn passà d'actualisar ils projects da sanaziun cunter la canera ch'èn il mument en vigur, per las duas vischnancas Poschiavo e Brusio. En il rom da questa actualisaziun vegnan scleridas danovamain er las mesiras necessarias en il sectur da Miralago. Uschespert che las mesiras necessarias èn fixadas, vegnan ils projects da sanaziun cunter la canera exponids publicamain tenor la Lescha davart las vias.

Areguard la chava da crappa Miralago che vegn menziunada en l'incumbensa, stoi vegnir constatà ch'igl è vegnì fatg – en il rom da la revisiun parziala da la planisaziun locala – in rapport davart la cumpatibilitad ecologica cun ina prognosa da la canera. Tenor questa prognosa vegn il manaschi dal «Centro inerti Miralago» a chaschunar en il futur en media var 12 viadis da camiuns/di sin la via chantunala a Miralago. En cumparegliaziun cun il manaschi dad oz èn quai var 8 viadis supplementars/di. Quai na chaschuna betg immissiuns da canera udiblamain pli fermas. Sco udiblamain pli ferm vala in augment da las immissiuns da canera per passa 1 dB (decibel). Per in tal augment fissi necessari ch'il traffic creschiss per 25-30 pertschient.

Sa basond sin questas explicaziuns propona la Regenza al Cussegl grond da refusar questa incumbensa.

22 d'avrigl 2022