Confurm a l'art. 3 da la Lescha davart la protecziun da la sanadad en il chantun Grischun (Lescha da sanadad; DG 500.000) ston la visita medicinala ed il tractament da pazientas e pazients sa drizzar tenor ils princips renconuschids da la scienza, da l'etica, da la rentabilitad e dal tractament egual.
Tar la dumonda 1: La Regenza n'enconuscha fin ussa ni cas concrets dal chantun Grischun, nua ch'i èn vegnidas realisadas mesiras da conversiun, ni organisaziuns grischunas che porschan talas mesiras. Durant ils ultims onns n'èn er betg vegnids inoltrads recurs respectivs.
Tar la dumonda 2: Ina basa legala specifica che regla l'execuziun da mesiras da conversiun na datti betg. Dentant èn las persunas che pratitgeschan ina professiun dal sectur da sanadad e che dovran per quai ina permissiun, suttamessas a las disposiziuns menziunadas qua survart. En la Lescha federala davart las professiuns medicalas universitaras (Lescha davart las professiuns medicalas, LPMed; CS 811.11), en la Lescha federala davart las professiuns psicologicas (Lescha davart las professiuns psicologicas, LPsi; CS 935.81) ed en la Lescha federala davart las professiuns da sanadad (Lescha davart las professiuns da sanadad, LPSan; CS 811.21) èn er statuidas las obligaziuns professiunalas da las professiuns ch'èn normadas en questas leschas. Per cuntravenziuns cunter las obligaziuns professiunalas cuntegnan las leschas federalas menziunadas mesiras disciplinaras correspundentas che pon chaschunar la finala la retratga da la permissiun per pratitgar la professiun. Questas regulaziuns dal dretg federal èn definitivas, q.v.d. il chantun na po betg statuir ulteriuras obligaziuns professiunalas. Sch'ina persuna che pratitgescha ina professiun che dovra ina permissiun, exequescha ina mesira da conversiun, cuntrafa ella tant a las disposiziuns federalas sco er chantunalas da la polizia da sanadad. L'autoritad da surveglianza da la polizia da sanadad ch'è cumpetenta en il chantun è l'Uffizi da sanadad.
Las persunas che pratitgeschan in'activitad che n'è betg suttamessa a la surveglianza da la polizia da sanadad, na pon betg vegnir chastiadas da l'Uffizi da sanadad. Tut tenor las circumstanzas concretas pon dentant singulas acziuns entaifer ina mesira da conversiun esser acts chastiabels en il senn dal Cudesch penal, en spezial, sch'ellas pericliteschan l'integritad corporala, la facultad u er la libertad persunala da las persunas pertutgadas.
Tar la dumonda 3: Il Cussegl federal ha exprimì sia opiniun gia l'onn 2019, pia avant ch'il project da la lètg per tuts è vegnì acceptà l'onn 2021. La Regenza è dal medem avis sco il Cussegl federal, che tut las mesiras da conversiun che han la finamira da midar l'orientaziun omosexuala, ston vegnir refusadas ord vista umana, professiunala e giuridica. L'omosexualitad n'è betg ina malsogna e na sto perquai betg vegnir tractada. Suttametter umans ed en spezial persunas minorennas ad in tal tractament, n'è betg mo ina discriminaziun, mabain po avair disturbis psichics gravants per las persunas pertutgadas. En blers chantuns sco Turitg, Genevra, Basilea-Citad, Basilea-Champagna, Soloturn, Sviz e Vad èn vegnidas inoltradas l'ultim temp intervenziuns parlamentaras per scumandar mesiras da conversiun. Sin plaun federal èn vegnids inoltrads l'atun 2021 trais iniziativas parlamentaras per scumandar e per chastiar mesiras da conversiun sco er in postulat per examinar la derasaziun da mesiras da conversiun en Svizra e la necessitad d'ina regulaziun legala. La Regenza vegn a persequitar attentamain ils resultats da las intervenziuns naziunalas e chantunalas. Per il mument n'èn inditgadas naginas ulteriuras mesiras. La Regenza appellescha a la populaziun da denunziar praticas che van en questa direcziun a las autoritads cumpetentas.
6 d'avrigl 2022