Navigation

Inhaltsbereich

Incumbensa Flütsch concernent la protecziun civila en il Grischun a partir dal 01-01-2026

Sessiun: 16.02.2022

Ils ultims onns e decennis è la Protecziun civila grischuna vegnida regularmain en acziun per superar catastrofas da la natira ed autras situaziuns d'urgenza. Pervia da la crisa da corona e sin basa da la convocaziun tras il Cussegl federal ha l'intervenziun da la protecziun civila, che dura anc adina, survegnì ina nova dimensiun: La protecziun civila è stada en acziun a medem temp sin l'entir territori chantunal, per part cun l'integraziun da tut las furmaziuns regiunalas sco er da bleras spezialistas e blers spe­zia­lists, ed ha gidà a superar la crisa da corona cun la mobilisaziun mintgamai pussaivla en reguard a l'economia.

Cunzunt en vista al fatg ch'il sustegn da la protecziun civila vegn duvrà duraivlamain ed en tut il chantun, han las midadas da la Lescha federala dals 20 da december 2019 davart la protecziun da la populaziun e davart la protecziun civila (LPPC) con­se­quenzas gravantas per la Protecziun civila grischuna. Per quest motiv ha il Cussegl grond concludì ils 8 da december 2020 ina revisiun parziala da la Lescha davart la protecziun civila dal chantun Grischun (Lescha da protecziun civila; DG 640.100) ed ha prolungà – per ina durada limitada – l'obligaziun da far servetsch da protecziun civila en il Grischun (fin al 40. onn da veglia­detgna) fin 5 onns suenter l'entrada en vigur da la revisiun parziala da la lescha federala.

Uschia èn vegnidas stgaffidas las premissas temporalas per pudair reorganisar adequatamain la Protecziun civila chantunala e per preparar las midadas da las leschas appartegnentas.

En enconuschientscha da las stretgas da persunal imminentas, en spezial tar il cader e tar funcziuns spezialisadas impurtantas, ed en il senn d'ina planisaziun prospectiva èsi impurtant ch'i vegnian prendidas mesiras per pudair sa fidar d'ina Protecziun civila grischuna che dispona d'avunda persunal e ch'è pronta a l'acziun, suenter la scadenza da la prolungaziun da l'obligaziun da far servetsch da protecziun civila la fin da l'onn 2025.

La Regenza vegn incumbensada d'impedir ils effectivs insuffizients imminents, en spezial en il sectur dal cader sco er da las spezialistas e dals spezialists, suenter la scadenza da la prolungaziun da l'obligaziun da far servetsch da protecziun civila. En cas d'ina pandemia futura e d'auters eveniments – u da situaziuns d'urgenza che duran pli ditg – duai la protecziun civila esser abla da porscher ses sustegn en il rom actual. Er il sustegn da la protecziun civila a favur da manaschis publics e privats relevants per il sistem sto esser garantì. Per quest intent ston vegnir stgaffids ils mecanissems e las structuras necessarias, ed il spectrum da prestaziun da la Protecziun civila grischuna sto vegnir definì cleramain.

Cuira, ils 16 da favrer 2022

Flütsch, Tomaschett (Breil), Wilhelm, Berweger, Cahenzli-Philipp, Cantieni, Censi, Della Cà, Dürler, Engler, Felix, Hartmann-Conrad, Hitz-Rusch, Hohl, Holzinger-Loretz, Jochum, Kienz, Kunfermann, Kuoni, Maissen, Marti, Michael (Castasegna), Michael (Donat), Mittner, Müller (Favugn), Natter, Niggli (Samedan), Niggli-Mathis (Grüsch), Noi-Togni, Papa, Pfäffli, Rüegg, Schmid, Schutz, Stiffler, Tanner, Thomann-Frank, Thür-Suter, Weidmann, Wellig, Wieland

Resposta da la regenza

En l'art. 31 da la revisiun parziala da la Lescha federala davart la protecziun da la po­pulaziun e davart la protecziun civila (LPPC; CS 520.1) ch'è entrada en vigur il 1. da schaner 2021, regla la Confederaziun definitivamain l'adempliment e la durada da l'obligaziun da far servetsch da protecziun civila. Als chantuns è sulettamain restada la pussaivladad da prolungar l'obligaziun da servetsch fin maximalmain al 40. onn da vegliadetgna. Quai en il rom da la disposiziun transitorica da l'art. 99 al. 3 LPPC. Da questa pussaivladad ha il chantun fatg diever. L'artitgel correspundent da la Lescha davart la protecziun civila dal chantun Grischun (Lescha da protecziun civila, LCPC; DG 640.100), vul dir l'art. 21, è limità fin ils 31 da december 2025 (cf. missiva 2020-2021, p. 411 ss.).

Tenor las calculaziuns da l'Uffizi da militar e da protecziun civila (UMPC; stadi mars 2022) sa reduceschan ils effectivs d'appartegnentas e d'appartegnents da la protec­ziun civila (AdPC) per il 1. da schaner 2026 da 2264 a 1788 (-476). Tar il cader supe­riur (cumandantas e cumandants, uffizieras ed uffiziers) vegnan relaschads 39 AdPC, tar il cader inferiur (sutuffizieras e sutuffiziers) 166 AdPC e sin il stgalim da las trup­pas 796 AdPC (totalmain 1001 persunas). Las relaschadas vegnan cumpensadas tras scolaziuns supplementaras da persunas obligadas da far servetsch da protec­ziun civila, tras novas recrutaziuns, tras novas burgaisas e novs burgais sco er tras persunas che han dumandà in congedi per l'exteriur (totalmain 525 persunas).

Per ch'ils effectivs insuffizients imminents, en spezial en il sectur dal cader sco er da las spezialistas e dals spezialists, possian vegnir cumpensads parzialmain suenter la scadenza da la prolungaziun da l'obligaziun da far servetsch da protecziun civila, e per che la Protecziun civila dal Grischun saja vinavant abla da porscher ses sustegn er en cas da pandemias futuras e d'auters eveniments u en cas da situaziuns d'ur­genza d'ina durada pli lunga, vegnan examinadas las suandantas mesiras:

  • Extensiun dal dretg da prestaziuns tenor l'art. 16 al. 1 lit. e LCPC sin ulteriuras funcziuns da cader (cader superiur / uffizieras ed uffiziers sco er cader inferiur / sutuffizieras e sutuffiziers). Questa extensiun permettess da dar impuls, per che las persunas obligadas da far servetsch da protecziun civila restian incorporadas – sin basa voluntara – vinavant en lur funcziun da la protecziun civila (art. 33 LPPC). Las consequenzas finanzialas da questa mesira ston anc vegnir calculadas.
  • I sto vegnir examinà, sch'eventualas stentas – sco p.ex. reclama, campagnas e.u.v. – pon motivar dunnas ed umens d'ademplir voluntarmain l'obligaziun da far servetsch da protecziun civila (art. 33 al. 1 lit. a–d LPPC).
  • Cun ina planisaziun immediata dal cader pon vegnir minimadas fin la fin da l'onn 2025 las grondas largias tar il cader superiur ed inferiur.

Il UMPC lavura cun tutta forza vi da la creaziun d'ulteriurs mecanissems e d'ulteriuras structuras necessarias, per che la protecziun civila saja vinavant abla da porscher ses sustegn en cas d'eveniments extraordinaris. Er il spectrum da prestaziuns da la Protecziun civila dal Grischun vegn examinà e definì cleramain ensemen cun ils par­tenaris da la protecziun da la populaziun. Cun l'effectiv dals AdPC – ch'è da spetgar per il 1. da schaner 2026 – èsi previs che la structura existenta da la protecziun civila cun las furmaziuns regiunalas vegn da princip mantegnida, ch'i dat dentant damain furmaziuns en las singulas cumpagnias. Ultra da quai vegn la protecziun civila a far damain acziuns a favur da las vischnancas durant ils curs da repetiziun u damain intervenziuns a favur da la communitad (cursas da chavals a Maiavilla, maraton da passlung da l'Engiadina, Arosa Classic Car e.u.v.). Ils dis da servetsch dals AdPC stuessan vegnir impundids principalmain per ils curs da repetiziun che servan en spezial a cuntanscher ed a mantegnair la prontezza a l'acziun da la protecziun civila.

Per finir stoi vegnir menziunà ch'ina revisiun parziala da la LPPC è previsa l'onn 2022. Quai tenor la communicaziun da l'Uffizi federal da protecziun da la populaziun. Avant che prender decisiuns areguard l'ulteriur proceder, sto vegnir spetgada la pro­cedura da consultaziun per questa revisiun parziala.

Sa basond sin questas explicaziuns propona la Regenza al Cussegl grond da refusar questa incumbensa.

13 d'avrigl 2022