Navigation

Inhaltsbereich

Dumonda Rettich concernent la strategia da persunal en la tgira d'uffants

Sessiun: 21.04.2022

Durant ils ultims onns è la crisa da persunal daventada pli gronda sin plaun chantunal tar las persunas spezialisadas per la tgira. En il fratemp è la situaziun talmain gravanta che las canortas d'uffants na chattan strusch pli avunda persunas da tgira cun scolaziuns specificas per pudair garantir in manaschi senza restricziuns. Er en auters chantuns è la situaziun ordvart pro­blematica, cun il resultat che tschertas plazzas en canortas ston ussa schizunt vegnir stritgadas. In problem principal è che las cundiziuns da lavur da las persunas spezialisadas dal sectur da la tgira d'uffants èn antiquadas. Ultra da salaris bass e da pus­saivladads insuffizientas per sa perfecziunar na correspunda er la reputaziun da la professiun betg pli al temp.

Consequenzas negativas – sco la nunrecepziun d'uffants, l'engaschament da persunal cun qualificaziuns manglusas u schizunt la serrada d'entiras gruppas – ston vegnir cumbattidas decididamain. Perquai vulan las sutsegnadras ed ils sutsegnaders savair da la Regenza:

  1. Èsi previs d'analisar la situaziun actuala dal persunal en il sectur da la tgira d'uffants, ed èn gia planisadas mesiras da meglieraziun concretas?
  2. Vegn la situaziun, e quai cunzunt cun in cler sguard sin il persunal e sin lur cundiziuns generalas, resguardada en la missiva tar la proxima revisiun da la Lescha chantunala dal persunal?
  3. Cun tge mesiras concretas po il chantun gidar a meglierar la situaziun en il sectur da la tgira d'uffants?

Cuira, ils 21 d'avrigl 2022

Rettich, Ruckstuhl, Kasper, Atanes, Baselgia-Brunner, Cahenzli-Philipp (Vaz Sut), Cantieni, Caviezel (Cuira), Crameri, Degiacomi, Derungs, Epp, Gartmann-Albin, Gugelmann, Hardegger, Hartmann-Conrad, Hofmann, Holzinger-Loretz, Märchy-Caduff, Müller (Favugn), Noi-Togni, Perl, Preisig, Rutishauser, Thomann-Frank, Tomaschett-Berther (Trun), von Ballmoos, Widmer (Favugn), Widmer-Spreiter (Cuira), Wilhelm, Bürgi-Büchel, Costa, Tomaschett (Cuira), van Kleef

Resposta da la regenza

Las collavuraturas ed ils collavuraturs èn il factur central, per ch'ils uffants pitschens chattian – en purschidas da la tgira d'uffants cumplementara a la famiglia – in lieu, nua ch'els sa sentan segirs e vegnan tgirads bain, e quai en in ambient ch'è inte­res­sant per els e che promova els. L'Ordinaziun federala davart il plazzament d'uffants per la tgira e l'adopziun definescha ils parameters da la protecziun d'uffants en pur­schidas da la tgira d'uffants cumplementara a la famiglia. Qua tras resulta per il chan­tun l'obligaziun d'ademplir in'activitad da permissiun e da surveglianza.

En il rom da la surveglianza e da la permissiun da las purschidas da la tgira d'uffants cumplementara a la famiglia è il focus principal sin il persunal. Il dumber d'uffants tgi­rads definescha il basegn da persunal. Quai vegn examinà tar la permissiun da no­vas purschidas sco er a chaschun da las visitas da surveglianza che han lieu mintga dus onns. En cas da stretgas da persunal durant l'onn èn las canortas d'uffants obli­gadas d'agir en moda proactiva e da contactar l'autoritad da surveglianza.

Ils svilups ils pli actuals han mussà ch'ils offerents da purschidas da la tgira d'uffants cumplementara a la famiglia han pudì chattar il persunal necessari. Per part han er plazzas vacantas pudì vegnir occupadas svelt entaifer curt temp. Plinavant han trais novs lieus, ch'èn repartids sur l'entir chantun, avert il matg 2022 lur portas. Tuts trais lieus han pudì recrutar il persunal necessari. Er ils augments dals dumbers da plaz­zas ch'èn vegnids annunziads per l'onn 2022 en differents lieus e ch'èn cumbinads cun augments respectivs dal persunal, mussan ch'ils offerents da purschidas da la tgira d'uffants cumplementara a la famiglia chattan actualmain il persunal.

La mancanza da persunas spezialisadas è ina sfida da l'entira societad. I n'èn avant maun naginas infurmaziuns che la problematica saja spezialmain acuta en il sectur da la tgira d'uffants cumplementara a la famiglia. Sco en autras branschas, poi dar stretgas da persunal sin plaun regiunal er qua. La Regenza beneventa, sch'ils offe­rents da purschidas da la tgira d'uffants cumplementara a la famiglia fan diever da las pussaivladads da scolar emprendistas ed emprendists. Las emprendistas ed ils emprendists vegnan perquai resguardads tar la dotaziun da persunal en connex cun la permissiun. Uschia duai vegnir rinforzada l'impurtanza per ils manaschis e vegnir renconuschì l'engaschament a favur da la scolaziun. I sto dentant er esser en l'inte­ress da la branscha da porscher avunda plazzas da scolaziun.

Tar la dumonda 1: En il rom da la revisiun da la Lescha davart la promoziun da la tgira d'uffants cumplementara a la famiglia proceda la Regenza en moda cum­ples­siva e resguarda pia er la situaziun da manaschi. En connex cun la permissiun e cun la surveglianza persequitescha il chantun gia regularmain la situaziun dal persunal. Ulteriuras analisas da la situaziun n'èn perquai betg previsas.

Tar la dumonda 2: Las purschidas da la tgira d'uffants cumplementara a la famiglia èn organisaziuns da dretg privat. Correspundentamain han las collavuraturas ed ils collavuraturs da las canortas d'uffants relaziuns da lavur da dretg privat. La Lescha dal persunal è da dretg public e regla las relaziuns da lavur da las emploiadas e dals emploiads da l'administraziun chantunala u dals instituts chantunals autonoms. Ina regulaziun sur la Lescha dal persunal n'ha perquai nagin effect per ils offerents da purschidas da la tgira d'uffants cumplementara a la famiglia.

Tar la dumonda 3: Il chantun ha lantschà ina revisiun da la legislaziun per esser pre­parà en l'avegnir en il sectur da la tgira d'uffants cumplementara a la famiglia. En la consultaziun tar la revisiun da la Lescha davart la promoziun da la tgira d'uffants cumplementara a la famiglia han ins pudì exprimer explicitamain las aspectativas areguard la finanziaziun, ma er areguard la qualitad u areguard il persunal. Ils gia­vischs inoltrads vegnan resguardads en la concepziun da la missiva da la Regenza e suttamess al Cussegl grond. Igl è chaussa dal Cussegl grond d'influenzar la con­cepziun definitiva dal project. 

15 da zercladur 2022