Navigation

Inhaltsbereich

Dumonda Jochum concernent la Strategia concernent la forza idraulica dal chantun Grischun 2022–2050

Sessiun: 03.09.2022

Garantir che las finamiras tenor las decisiuns da princip dal Cussegl grond dal favrer 2022 vegnian cuntanschidas

Durant la sessiun da favrer 2022 ha il Cussegl grond prendì enconuschientscha dal rapport tar la Strategia concernent la forza idraulica dal chantun Grischun 2022–2050 ed exprimì sia posiziun en il senn da l'art. 66 da la Lescha davart il Cussegl grond. Ultra da quai ha il Cussegl grond acceptà per gronda part las dumondas da princip che la Regenza aveva tschentà. La Regenza è pia incumbensada d'agir en il senn da las decisiuns prendidas.

La Strategia concernent la forza idraulica ha consequenzas extraordinarias per il chantun e per las vischnancas ed è concepida per ina perioda remartgabla che surpassa las proximas concessiuns dad 80 onns. Las decisiuns e las mesiras che ston vegnir prendidas èn d'ina impurtanza considerabla.

Er las proceduras concernent il return dals implants duran ditg. Per il solit vegnan ellas elavuradas cun differenta intensitad durant 10 fin 15 onns. In grond dumber da spezialistas e spezialists sto pudair collavurar fitg bain. Da cas a cas sa differenziescha la cumposiziun da la gruppa da spezialistas e spezialists.

En quest connex èsi impurtant da sviluppar la savida e las cumpetenzas tant en las vischnancas concessiunaras sco er tar il chantun. La collavuraziun tranter las vischnancas concessiunaras ed il chantun sto funcziunar bain. Quai ha confermà er la Regenza en sia resposta a la dumonda da la fracziun da l'Allianza dal Center concernent la forza da contractar da las vischnancas en la Strategia concernent la forza idraulica. En quest connex han las sutsegnadras ed ils sutsegnaders las suandantas dumondas:

  1. Co quinta la Regenza da garantir, supplementarmain a la plattafurma per barattar periodicamain experientschas tranter las vischnancas ed il chantun, ch'i vegnian sviluppadas e mantegnidas las enconuschientschas necessarias?
  2. Sfurzadamain vegnan ils returns dals implants liquidads da cas a cas sco «projects singuls» cun las partidas involvidas directamain. Co èsi pussaivel da garantir, ch'ins na perdia betg la survista e ch'i vegnian persequitadas las finamiras tenor las decisiuns da princip dal Cussegl grond?
  3. Co giuditgescha la Regenza l'idea d'incumbensar ina gruppa externa da spezialistas e spezialists d'accumpagnar ils process? Co duai in'eventuala gruppa da spezialistas e spezialists sa cumponer?

Cuira, ils 3 da settember 2022

Jochum, Bettinaglio, Gort, Altmann, Bergamin, Berweger, Brandenburger, Brunold, Bundi, Candrian, Censi, Claus, Collenberg, Cortesi, Danuser (Cazas), Della Cà, Dürler, Epp, Furger, Gansner, Hartmann, Hohl, Holzinger-Loretz, Kasper, Kienz, Koch, Kocher, Kohler, Krättli, Kuoni, Lamprecht, Lehner, Loepfe, Loi, Luzio, Maissen, Menghini-Inauen, Messmer-Blumer, Metzger, Michael (Castasegna), Mittner, Morf, Natter, Righetti, Roffler, Said Bucher, Sax, Schutz, Spagnolatti, Stiffler, Tanner, Thür-Suter, Tomaschett, Weber, Widmer, Wieland, Zanetti (Sent), Zanetti (Landquart)

Resposta da la regenza

La Regenza è persvadida ch'in ulteriur svilup da savida e da cumpetenzas è impur­tant per realisar la Strategia concernent la forza idraulica. Pliras giadas ha ella er suttastritgà la muntada da quest svilup per las vischnancas concessiunaras e per il chantun. Medemamain ha ella identifitgà la collavuraziun coordinada tranter las vischnancas concessiunaras ed il chantun sco premissa indispensabla per pudair realisar cun success la Strategia concernent la forza idraulica 2022–2050.

Tar la dumonda 1: Il svilup ed il mantegniment da la savida necessaria è ina incum­bensa permanenta da las vischnancas e dal chantun. Per las vischnancas pudess quai esser ina sfida pli gronda, perquai che la gronda part da las vischnancas vegn a s'occupar per regla mo mintga pèr decennis da la tematica dal return dals implants a la concedanta. Cun la plattafurma che pussibilitescha il barat d'experientschas perio­dic tranter las vischnancas ed il chantun, pon las vischnancas profitar da las expe­rientschas d'autras vischnancas e dal chantun. Tscherts temas pon vegnir elavurads ed approfundads en moda generalisada. Ultra da quai pon vegnir barattadas expe­rientschas concretas ed enconuschientschas davart returns exemplarics dals im­plants a la concedanta. Plinavant po il chantun sviluppar vinavant las experientschas e las infurmaziuns ch'el ha survegnì en il barat politic e professiunal cun auters chan­tuns, en spezial cun ils chantuns alpins, e las preschentar a las vischnancas, sche quai è cunvegnent. En cas d'in return dals implants a la concedanta è il chantun adina involvì ed ha uschia ina vista generala. Per regla ha el pia er ina rolla impurtan­ta tar il mantegniment e tar l'intermediaziun da savida entaifer il chantun sco er en­vers las vischnancas. En quest connex duain vegnir elavuradas er documentaziuns davart dumondas impurtantas dal cuntegn sco er davart dumondas proceduralas. Questas documentaziuns ston vegnir actualisadas e cumplettadas periodicamain.

Tar la dumonda 2: Per realisar ils returns dals implants a la concedanta en il senn da la Strategia concernent la forza idraulica 2022–2050 ch'è vegnida deliberada, ha la Regenza stgaffì sco emprim pass ina nova plazza da «manadra u manader da project per il return dals implants a la concedanta» tar l'Uffizi d'energia e da traffic (UEnTr). La plazza vegn occupada per il cumenzament da l'onn 2023. Questa per­suna vegn tranter auter ad avair l'incumbensa da sviluppar vinavant sin plaun profes­siunal ed operativ las basas per ina vista cumplessiva davart ils returns dals implants terminads e tals che capitan proximamain. Ultra da quai sto ella preparar questas basas per il UEnTr sco post spezialisà. Sin fundament da las relaziuns stretgas ch'èn sa cumprovadas professiunalmain tranter ils posts spezialisads dals chantuns alpins vegn il UEnTr plinavant a tgirar barats interchantunals impurtants ed a cundecider en temas specifics. La finala vegn el sco uffizi, che ha la responsabladad specifica, a stuair persequitar – en il rom da las prescripziuns da la Regenza e dal Departament d'infrastructura, energia e mobilitad (DIEM) sco departament cumpetent – las finami­ras fixadas dal Cussegl grond areguard la realisaziun dal cuntegn da la Strategia grischuna concernent la forza idraulica 2022–2050. La Regenza è da l'avis, ch'i saja necessari da stgaffir gia en il proxim futur successivamain e confurm als basegns ulteriuras plazzas cun las cumpetenzas specificas necessarias tar il DIEM sco er tar il UEnTr per pudair realisar cun success la Strategia chantunala concernent la forza idraulica.

Tar la dumonda 3: La realisaziun da la Strategia concernent la forza idraulica e da las structuras ch'i dovra per elavurar e per sviluppar vinavant ina vista cumplessiva strategica ed expressiva sco er per liquidar ils singuls returns dals implants a la con­cedanta, è pretensiusa. Da concentrar las enconuschientschas specificas entaifer l'administraziun chantunala sco er la savida da persunas spezialisadas consultadas è ina finamira centrala indispensabla en quest connex. Per cuntanscher questa finami­ra dovri l'accumpagnament d'in gremi ordaifer l'administraziun che ha incumbensas e cumpetenzas ch'èn definidas cleramain en il sectur da las basas strategicas relevan­tas. Sco instituziun politicamain independenta duai quest gremi cussegliar ils posts chantunals e gidar a realisar ina rait cun las vischnancas concessiunaras. Il gremi duai pia sa cumponer da persunas spezialisadas da las differentas disciplinas, che servan als divers aspects da la realisaziun da la Strategia concernent la forza idraulica. Questas persunas spezialisadas duain er pudair vegnir consultadas da cas a cas. Particularmain sa tracti da persunas spezialisadas da l'economia d'energia, da l'industria da finanzas, ma er represchentanzas da cooperaziuns communalas e da gruppaziuns d'interess che han in connex cun la natira e l'ambient.

28 d'october 2022