Navigation

Inhaltsbereich

Dumonda Said Bucher concernent la midada dal clima e l'integraziun da quella en la scolaziun ed en la furmaziun supplementara dal persunal d'instrucziun sco er da las studentas e dals students a la SAPGR

Sessiun: 03.09.2022

La midada dal clima e las consequenzas da quella èn oz sco er per las generaziuns futuras ina gronda sfida e vegnan ad avair vastas consequenzas per la natira, per la societad e per l'economia.

Tant pli impurtant èsi che magistras e magisters survegnian ina scolaziun ed ina furmaziun supplementara davart quest tema. En il Plan d'instrucziun 2021, sut STS1.2, figureschan las finamiras da l'instrucziun pertutgant quest tema. Uschia duai vegnir garantì che las scolaras ed ils scolars vegnian infurmads davart la midada dal clima e davart las consequenzas da quella en las differentas regiuns dal mund e spezialmain en Svizra. La furmaziun gioga pia ina rolla decisiva per las scolaras ed ils scolars.

Concernent questa rolla tschentan las sutsegnadras ed ils sutsegnaders las suandantas dumondas:

  1. Co è quest tema cun ils cuntegns menziunads qua survart integrà en la scolaziun da las magistras e dals magisters a la SAPGR?
  2. Vegnan quests cuntegns tractads sco moduls obligatorics u sco moduls facultativs, e quantas lecziuns cumpiglian ils moduls respectivs?
  3. Tge procentuala da las studentas e dals students a la SAPGR sa participescha a quests moduls?
  4. Tge e quants curs da furmaziun supplementara cun quantas lecziuns vegnan purschids davart quest tema a las magistras ed als magisters che instrueschan gia?
  5. Tge procentuala e tge cifra absoluta da las magistras e dals magisters activs profitan da quests curs da furmaziun supplementara?

Cuira, ils 3 da settember 2022

Said Bucher, Dietrich, Widmer, Bavier, Bergamin, Berther, Bettinaglio, Bischof, Gredig, Loepfe, Mani, Mazzetta, Righetti, Tanner, Ulber, Zanetti (Sent), Zanetti (Landquart)

Resposta da la regenza

Sin basa da l'art. 7 al. 3 e da l'art. 8 da la Lescha davart las scolas autas e la perscrutaziun (LSAP; DG 427.200) è la Scola auta da pedagogia dal Grischun (SAP dal Grischun) ina scola auta purtada dal chantun che vegn manada sco institut autonom da dretg public. Tenor l'art. 20 al. 1 LSAP conceda la Regenza a la SAP dal Grischun ina incarica da prestaziun cun contribuziun globala. L'execuziun da las disposiziuns da la LSAP è chaussa da l'uffizi (art. 28 al. 1 da l'Ordinaziun davart las scolas autas purtadas dal chantun [OSA; DG 427.210]), particularmain da l'Uffizi per la furmaziun mediasuperiura. Quest uffizi controlla tranter auter, che las finamiras da l'incarica da prestaziun – ch'è vegnida concludida cun la SAP dal Grischun – vegnian cuntanschidas.

Tar la dumonda 1: La tematica da l'ambient en general e da la midada dal clima en spezial è integrada en dus lieus en il Plan d'instrucziun 21: per l'ina en il rom natira, uman e societad en la perspectiva spazis, temps e societads (cun geografia ed istorgia), per l'autra tar las cumpetenzas transversalas en il connex cun la furmaziun per in svilup persistent. Analogamain al Plan d'instrucziun 21 è il tema midada dal clima integrà a la SAP dal Grischun en la perspectiva spazis, temps e societads sco er en in modul deditgà exclusivamain a la furmaziun per in svilup persistent.

Tar la dumonda 2: Il modul ch'è integrà en la furmaziun per in svilup persistent e che po surdar 2 puncts da credit, cumpiglia 50 fin 60 uras da lavur respectivamain 24 lecziuns. Mintga studenta e mintga student sto eleger tranter trais variantas che mettan lur focus sin differents secturs da la furmaziun per in svilup persistent, particularmain sin las finamiras ambient, societad ed economia.

Tar la dumonda 3: Tant il modul ch'è deditgà a la furmaziun per in svilup persistent sco er ils moduls da la perspectiva spazis, temps e societads èn obligatorics per tut las studentas ed ils students da bachelor dals novs studis. La procentuala è pia
100 %.

Tar la dumonda 4: Durant l'onn da scola 2021 e 2022 èn vegnidas e vegnan purschìdas las furmaziuns supplementaras entaifer la scola ch'èn obligatoricas per las persunas d'instrucziun da tut ils teams da scola en il Grischun e che pertutgan il med d'instrucziun NaTec. Il med d'instrucziun NaTec s'orientescha tenor las prescripziuns dal Plan d'instrucziun 21 che recepescha il tema midada dal clima en il senn pli stretg sco er pli vast ord differentas perspectivas.

Plinavant vegnan purschids mintga onn plirs curs ch'èn deditgads a la midada dal clima en il senn pli stretg e pli vast sco er a differents aspects da quest sectur. Sco exempel po vegnir numnà in curs da l'onn 2022 cun il titel «Food for future» che vegn organisà en collavuraziun cun ils Parcs grischuns.

Tar la dumonda 5: La dumonda na po betg vegnir respundida en moda absoluta e definitiva, perquai che las persunas d'instrucziun instrueschan sin differents stgalims, e quai sco persunas d'instrucziun da classa, sco pedagogas curativas da scola e sco persunas d'instrucziun spezialisadas. La totalitad na po pia betg vegnir definida.

Per sensibilisar dapli persunas d'instrucziun per il tema midada dal clima e per las sustegnair en chaussa, èsi planisà da sviluppar – en collavuraziun cun l'Uffizi per la natira e l'ambient – in Post spezialisà per l'educaziun ecologica che ha la suandanta idea directiva: Il Post spezialisà chantunal per l'educaziun ecologica duai promover l'educaziun ecologica en il chantun Grischun sco in element fundamental da la furmaziun per in svilup persistent tenor il Plan d'instrucziun 21.

14 d'october 2022