Navigation

Inhaltsbereich

Incumbensa da la fracziun da la PPS concernent la pensiun per anteriuras commembras ed anteriurs commembers da la Regenza (emprim sutsegnader Stocker)

Sessiun: 19.10.2022

Ina commembra u in commember da la Regenza che sorta voluntarmain u sfurzadamain da quest gremi, ha il dretg d'ina pensiun per vita duranta tenor la Lescha vertenta davart ils salaris e davart la prevenziun professiunala da las commembras e dals commembers da la Regenza (LSPR; DG 170.380).

En il cas ideal han ed avevan las commembras ed ils commembers da la Regenza in'activitad da gudogn fin a lur elecziun. Sch'ellas ed els n'han betg gia cuntanschì la vegliadetgna da pensiun suenter lur demissiun, returnan ellas ed els per regla puspè en lur anteriura professiun u cumenzan cun ina nova activitad professiunala. La pensiun è vegnida introducida, per ch'i na resultian nagins conflicts d'interess, sche las anteriuras commembras ed ils anteriurs commembers da la Regenza surpiglian mandats en cussegls d'administraziun u en gremis sumegliants suenter ch'ellas u els èn sortids da quest aut uffizi, e per ch'ellas ed els hajan entradas er durant la fasa da la nova orientaziun professiunala. Er la limitaziun vertenta dal temp d'uffizi a trais periodas da legislatura è stada in motiv per introducir ina pensiun.

Per mintga onn d'uffizi survegn ina commembra u in commember da la Regenza mintga onn 3,5 pertschient dal salari ch'è vegnì retratg sco ultim. Cun ina durada d'uffizi da maximalmain 12 onns correspunda quai ad ina indemnisaziun da var 110 000 francs per onn (42 pertschient da 262 000 francs). Bain prevesa la lescha ina reducziun da la prestaziun. Quai però pir, cura che las entradas da gudogn surpassan – ensemen cun la pensiun – il salari che la persuna pertutgada survegniva sco commembra u commember da la Regenza. Tranter ils paucs chantuns che han anc ina pensiun, dispona il chantun Grischun pia d'ina soluziun fitg generusa.

Ch'ina pensiun per commembras e commembers da la Regenza è gia daditg antiquada, na sa mussa betg mo a maun dal fatg che mo pli ils chantuns Vallais, Sviz, Tessin, Turgovia, Appenzell Dadens e Son Gagl enconuschan anc ina tala pensiun. Er perquai che las commembras ed ils commembers da la Regenza chattan fitg svelt ina soluziun professiunala grazia a lur grad d'enconuschientscha e grazia a lur cumpetenzas, daventa ina garanzia finanziala obsoleta. In temp da carenza che giustifitgass almain ina pensiun temporara, n'è ultra da quai betg giavischada dal legislatur. En vista a quests fatgs po e duai la regulaziun actuala da la pensiun vegnir transferida en ina soluziun moderna.

La Regenza vegn perquai incumbensada da suttametter al Cussegl grond ina midada da lescha cun l'aboliziun da la soluziun da la pensiun per anteriuras commembras ed anteriurs commembers da la Regenza.

Cuira, ils 19 d'october 2022

Stocker, Gort, Adank, Brandenburger, Butzerin, Candrian, Casutt, Cortesi, Della Cà, Dürler, Favre Accola, Grass, Hefti, Hug, Koch, Krättli, Lehner, Menghini-Inauen, Metzger, Morf, Rauch, Roffler, Salis, Sgier, Weber

Resposta da la regenza

En ses rapport dals 10 da december 2021, per ademplir il postulat 20.4099 da Peter Hegglin, è il Cussegl federal s'occupà cun il tema «Regulaziuns da salarisaziun e da pensiun modernas per ils magistrats». Sut tschertas cundiziuns survegnan las com­membras ed ils commembers dal Cussegl federal, la chanceliera federala u il chan­celier federal sco er las derschadras federalas ed ils derschaders federals ina pen­siun per vita duranta. En cas d'entradas da gudogn u d'entradas substitutivas con­siderablas vegn reducida questa pensiun. Tenor il rapport prevesevan otg chantuns ina pensiun per las commembras ed ils commembers da lur regenzas chantunalas (stadi: matg 2021). Dapi lura han dentant ils chantuns Berna, Sviz e Genevra stritgà las pensiuns. En il chantun Neuchâtel è pendenta ina intervenziun che va en questa direcziun; en il chantun Vad vegn la dumonda examinada sin basa d'in postulat. Tut en tut sa mussi che mo ina pitschna minoritad dals chantuns enconuscha ina pen­siun per vita duranta. Per regla vegnan las anteriuras commembras ed ils anteriurs commembers da la Regenza remunerads sur la Cassa da pensiun, sur indemnisa­ziuns da partenza u temporarmain sur pajaments cuntinuads dal salari resp. sur pensiuns.

Schebain ina pensiun è adequata e co ch'ella sto eventualmain vegnir concepida, dependa da la dumonda da la limitaziun dal temp d'uffizi per las commembras ed ils commembers da la Regenza. Il Grischun è in dals fitg paucs chantuns che pre­vesa ina limitaziun dal temp d'uffizi. Tenor la Constituziun dal chantun Grischun (DG 110.100) èn pussaivlas maximalmain duas reelecziuns, q.v.d. las commembras ed ils commembers da la Regenza ston sortir da lur uffizi il pli tard suenter 12 onns. En cas d'ina elecziun substitutiva da la Regenza vers la fin d'ina perioda da legis­latura, èsi pussaivel ch'ina commembra u in commember da la Regenza po er mo cuntanscher in temp d'uffizi da bundant 8 onns.

Per ina regulaziun adequata da la pensiun ston vegnir resguardads anc ulteriurs fac­turs. Latiers tutgan la dimensiun da l'indemnisaziun per las commembras ed ils com­members da la Regenza, las prestaziuns da la Cassa da pensiun, las prestaziuns accessoricas al salari sco er la finanziaziun da la pensiun e la reducziun da tala en cas d'entradas da gudogn u d'entradas substitutivas.

La Regenza è pronta da reorganisar la regulaziun da la pensiun. I dovra però in'ana­lisa pli profunda da la situaziun ed ina valitaziun accurata da tut ils facturs, quai en il senn d'ina consideraziun cumplessiva, per suttametter al Cussegl grond ina proposta equilibrada e moderna per la regulaziun futura da las pensiuns da las commembras e dals commembers da la Regenza.

Sa basond sin questas explicaziuns propona la Regenza al Cussegl grond da midar questa incumbensa sco suonda:

La Regenza vegn incumbensada da suttametter al Cussegl grond ina midada da la Lescha davart ils salaris e davart la prevenziun professiunala da las commembras e dals commembers da la Regenza. Per quest intent ston vegnir examinadas las va­riantas inoltradas en la sessiun d'october 2022 tras las incumbensas da las fracziuns da la PLD, da la PVL e da la PPS, ed eventualmain ulteriuras variantas.

17 da schaner 2023