Navigation

Inhaltsbereich

Dumonda Morf concernent la consequenza da las migrantas e dals migrants sin il sistem da sanadad chantunal

Sessiun: 15.02.2023

L'onn 2022 èn ca. 200 000 persunas immigradas en Svizra. Tut en tut vivevan il cumenzament dal 2022 ca. 2,2 milliuns persunas estras en Svizra, quai che correspunda a ca. 1/4 da la populaziun totala. L'immigraziun ha consequenzas sin bunamain tut ils secturs da nossa societad, uschia er sin la politica da sanadad chantunala.

Concernent l'immigraziun ston ins far las suandantas dumondas (persunas estras immigradas cun emprim domicil en il GR, senza turistas e turists):

  1. Quantas persunas estras immigradas senza assicuranza da malsauns svizra vegnan tractadas per onn en noss chantun e quant auts èn il custs per ils fatgs da sanadad che resultan qua tras?
  2. Chaschuna l'immigraziun ina chargia finanziala supplementara per il sectur da sanadad chantunal u vegn quella gulivada tras las taxas da la cassa da malsauns pajadas da las migrantas e dals migrants?
  3. Quant auta è la cumpart media da persunas estras sin las staziuns d'urgenza da noss chantun?
  4. Quant auts èn ils custs che resultan per visitas da persunas estras sin staziuns d'urgenza ed en tge proporziun stattan quests custs cun ils custs che Svizras e Svizzers chaschunan sin nossas staziuns d'urgenza?
  5. Datti en noss chantun tractaments che vegnan duvrads pli savens da tschertas gruppas da persunas estras che da Svizras e Svizzers?
  6. Quants cas èn enconuschents en noss chantun da persunas estras che han refusà in tractament tras medias e medis da l'autra schlattaina?

Cuira, ils 15 da favrer 2023

Morf, Metzger, Dürler, Adank, Bundi, Candrian, Casutt, Cortesi, Della Cà, Gort, Grass, Koch, Krättli, Menghini-Inauen, Rauch, Roffler, Salis, Sgier, Städler, Weber

Resposta da la regenza

Tenor l'art. 3 da la Lescha federala davart l'assicuranza da malsauns (LAMal; CS 832.10) sto mintga persuna cun domicil en Svizra sa laschar assicurar obligatoricamain tar in'assicuranza da malsauns svizra reconuschida. L'obligaziun d'avair in'assicuranza da malsauns cumenza cun la naschientscha u cun prender domicil en Svizra. L'entrada en l'assicuranza da malsauns sto vegnir fatga entaifer 3 mais. En il chantun Grischun procuran las vischnancas che mintga persuna obligada saja assicurada per la tgira da malsauns. Las persunas, che n'adempleschan betg a temp lur obligaziun d'avair in'assicuranza, assegnan las vischnancas tenor l'art. 1 al. 2 da la Lescha davart l'assicuranza da malsauns e la reducziun da las premias (LARP; DG 542.100) ad in assicurader. Ina liberaziun da l'obligaziun d'avair in'assicuranza da malsauns è mo pussaivla per paucas gruppas da persunas e mo sin dumonda, premess che tut las premissas sajan ademplidas e ch'ellas disponian d'ina garanzia equivalenta tras in'assicuranza (cf. art. 2 Ordinaziun davart l'assicuranza da malsauns [OAMal; CS 832.102]). En quest connex sa tracti en spezial da las suandantas categorias:

  • persunas che sa trategnan en Svizra per motivs da scolaziun e da furmaziun supplementara;
  • lavurantas e lavurants tramess en Svizra;
  • cunfinarias e cunfinaris cun domicil en DE, FR, IT, AT, sch'ellas ed els disponan d'ina garanzia d'assicuranza en il stadi da domicil, e quai er cun ina garanzia per il cas da malsogna durant la dimora en Svizra. Sche las cunfinarias ed ils cunfinaris èn assicurads sur l'assicuranza da malsauns legala da lur pajais da domicil, han ellas ed els durant la durada da lur dimora – cun la carta europeica da l'assicuranza da malsauns – mo il dretg sin ils tractaments necessaris;
  • persunas cun ina permissiun da dimora da la UE/AECL senza activitad da gudogn («privatier»);
  • persunas cun ina fitg buna assicuranza privata a l'exteriur e che na pon betg u mo per cundiziuns strusch acceptablas sa laschar assicurar supplementarmain en la dimensiun vertenta en Svizra, quai pervia da lur vegliadetgna (passa 55 onns) e/u lur stadi da sanadad (cas da direzza).

L'assicuranza privata estra sto mintgamai confermar en scrit (cun formular) ch'igl exista il dretg d'ina indemnisaziun dals custs da la tgira da malsauns tenor l'art. 25 fin 31 LAMal che resultan durant la dimora en Svizra.

Tar la dumonda 1: Perquai che la maioritad da las persunas estras immigradas cun emprim domicil en il Grischun èn assicuradas tar ina cassa da malsauns svizra tenor las explicaziuns qua survart, na vegnan eruidas naginas cifras separadas per persu­nas cun in'assicuranza da malsauns estra che han lur domicil en il Grischun. Ils custs administrativs per quest intent fissan cunzunt en ils ospitals considerabels e senza niz spezial u plivalur.

Sin fundament da quai, che naginas datas correspundentas na vegnan eruidas, n'èsi betg pussaivel da respunder las dumondas 2–6 en moda fidada.

19 d'avrigl 2023