Navigation

Inhaltsbereich

Dumonda Favre Accola concernent la pratica da la «Glista naira» en il chantun Grischun

Sessiun: 15.06.2023

Dapi il cumenzament da l'onn 2008 è la «Glista naira» obligatorica per tut ils chantuns. La «Glista naira» duai impedir, che persunas d'instrucziun pedofilas, dependentas u violentas possian instruir en in auter chantun e ch'i dettia là novs cas. La glista cuntegna mo annunzias davart ils nums e davart la durada da la retratga da l'autorisaziun d'instruir. L'inscripziun na surannescha betg e vegn stizzada pir suenter la cumplenida dal 70. onn da vegliadetgna.

Tenor retschertgas da las medias n'annunzian dentant anc lunschor betg tut ils chantuns la retratga da permissiuns da dar scola a la CDEP. Plinavant datti displaschaivlamain er autoritads da scola, che schlian «cas problematics» cun agid d'ina cunvegna d'annullaziun dal contract e che n'annunzian er betg questas persunas d'instrucziun al chantun (Uffizi per la scola populara ed il sport, USS), per che la permissiun da dar scola possia vegnir retratga.

Uschia na duain 14 chantuns, tranter quels er il Grischun, avair registrà actualmain betg in unic pedagog.

Las sutsegnadras ed ils sutsegnaders dumondan perquai la Regenza:

  1. Co sa preschenta la pratica actuala areguard la retratga da permissiuns da dar scola ed areguard l'annunzia da persunas d'instrucziun falliblas en il chantun Grischun?
  2. Co procura il USS, che tut las autoritads e direcziuns da scola enconuschian la pratica areguard l'annunzia resp. la consulta­ziun da la Glista naira ed annunzian er – ademplind lur responsabladad – persunas d'instrucziun falliblas al USS, per che tal possia eventualmain retrair la permissiun da dar scola?
  3. Co vegni procurà en il chantun Grischun, ch'eventuals scumonds d'exercitar la professiun (retratga da la permissiun da dar scola) en consequenza da sentenzias (giudizialas) vegnian er annunziads a la CDEP?

    Banca da datas da Giuventetgna+Sport (G+S): Per controllar lur manaders pon las uniuns da sport consultar la banca da datas da G+S.
  4. Co procura il USS, che las uniuns da sport grischunas enconuschian la pratica areguard la consultaziun resp. l'annunzia a la banca da datas da manaders da G+S fallibels?
  5. Numerusas uniuns èn er dependentas da funcziunaris da sport che n'han anc betg ina scolaziun da G+S. En cas da surpassa­ments na pon quels perquai er betg vegnir annunziads a la banca da datas da G+S. Manadras e manaders fallibels pon profitar da questa fora. Co vul il chantun sustegnair las uniuns da sport en quest reguard sco er en la lavur preventiva?

Claustra, ils 15 da zercladur 2023

Favre Accola, Ulber, Krättli, Adank, Bachmann, Bärtsch, Beeli, Berweger, Bettinaglio, Bischof, Bisculm Jörg, Bleuler-Jenny, Brandenburger, Brunold, Butzerin, Casutt, Cola Casaulta, Collenberg, Cortesi, Crameri, Danuser (Cazas), Degiacomi, Della Cà, Derungs, Dietrich, Dürler, Furger, Gansner, Gort, Grass, Hartmann, Hoch, Holzinger-Loretz, Hug, Jochum, Kocher, Lehner, Loepfe, Mani, Mazzetta, Menghini-Inauen, Messmer-Blumer, Morf, Rageth, Rauch, Righetti, Roffler, Salis, Schutz, Sgier, Spagnolatti, Stocker, Tanner, Tomaschett, von Ballmoos, Walser, Widmer, Wieland

Resposta da la regenza

En il rom da las sesidas da quartal dal matg/zercladur 2023 han las inspecturas ed ils inspecturs da scola discutà cun las direcziuns da scola dal chantun Grischun las «Directivas concernent la procuraziun d'in extract privat e d'in extract privat spezial a las scolas popularas, a las scolas professiunalas spezialisadas ed a las scolas medias sco er a las soluziuns transitoricas en il chantun Grischun» dal Departament d'educaziun, cultura e protecziun da l'ambient (DECA).  Questas directivas oblighe­schan ils purtaders da scola da pretender in extract privat (correspunda a l'extract dal register penal d'enfin ussa) sco er in extract privat spezial da las candidatas e dals candidats en il rom d'in nov engaschament. L'extract privat spezial infurmescha, sch'igl è scumandà a la persuna d'exequir in'activitad cun persunas minorennas u cun autras persunas cun in basegn da protecziun spezial. Uschia ha il DECA stgaffì in med efficazi per proteger uffants e giuvenils en scola.

Tar la dumonda 1: Tenor l'art. 58 da la Lescha davart las scolas popularas dal chan­tun Grischun (Lescha da scola; DG 421.000) po il DECA retrair la permissiun d'in­struir, sche la qualificaziun per instruir manca. Il DECA communitgescha in'eventuala retratga al Secretariat general da la Conferenza da las directuras e dals directurs chantunals da l'educaziun publica (CDEP). Fin ussa n'è ina tala disposiziun anc betg vegnida decretada. Perquai manca ina pratica respectiva.

Tar la dumonda 2: Sur l'Inspecturat da scola ha il USS rendì attent regularmain las autoritads e las direcziuns da scola, che la CDEP mainia ina glista da persunas d'in­strucziun, da las qualas l'autorisaziun d'instruir u la permissiun da pratitgar la profes­siun è vegnida retratga, e che las scolas duajan dumandar il Secretariat general da la CDEP (Servetsch giuridic), sche l'autorisaziun d'instruir d'ina persuna d'instrucziun saja vegnida retratga. A chaschun da l'emprima sesida da quartal da l'onn da scola 2023/24 vegn l'Inspecturat da scola plinavant ad infurmar las direcziuns da scola, ch'ellas stoppian annunziar cas, nua ch'i pudess vegnir en consideraziun da retrair l'autorisaziun d'instruir d'ina persuna d'instrucziun.

Tar la dumonda 3: Sche l'autorisaziun d'instruir d'ina persuna d'instrucziun vegn re­tratga sin basa da l'art. 58 da la Lescha da scola, vegn quai en mintga cas annunzià a la CDEP.

Tar la dumonda 4: Ils organisaturs da purschidas da G+S èn responsabels per pren­der las mesiras necessarias per garantir la segirezza e la sanadad da las partici­pan­tas e dals participants e per impedir accidents. Els ston er procurar che questas me­siras vegnian observadas durant l'entir curs. Sco represchentants da l'organisaziun vegnan ils coachs da G+S mintgamai rendids attents a questa obligaziun. Ad els ve­gnan er mess a disposiziun ils meds auxiliars respectivs, sco p.ex. la consultaziun da la banca da datas. Il USS organisescha regularmain scolaziuns e perfecziunaments. Valair vala in'obligaziun da perfecziunament en il ritmus da dus onns. Cunquai che las uniuns da sport han ultra da quai in interess finanzial che lur purschidas vegnian indemnisadas sur G+S, vegnan ellas ad annunziar lur curs e lur champs, incl. las ma­nadras ed ils manaders responsabels, il pli tard 30 dis avant il cumenzament da la purschida en la Banca da datas naziunala per il sport (BDNS). Là vegni examinà, sch'ina renconuschientscha valaivla è avant maun.

Tar la dumonda 5: In'auta protecziun sa lascha cuntanscher mo cun sensibilisar – sche pussaivel – tut las persunas involvidas. Entaifer il program da G+S vegn l'obli­gaziun da diligenza da l'organisaziun tractada gia oz en il rom da la scolaziun e dal perfecziunament. Il USS porscha numerus curs e moduls e renda attent explicitamain a quest tema. En la nova chapientscha da scolaziun da G+S e tras la concepziun da las novas medias didacticas vegnan las valurs e la protecziun dals uffants rinforza­das en tut las purschidas da furmaziun dals caders e sin tut ils plauns. Ultra da quai è la tematica preschenta er en ulteriuras purschidas da furmaziun per uniuns e per federaziuns, sco p.ex. en il curs «Club Management» da Swiss Olympic. Elements didactics online e podcasts duain plinavant procurar per in access facil al tema. En l'avegnir vegnan tut las persunas participadas sensibilisadas meglier, pli intensiva­main e pli explicitamain.

31 d'avust 2023