Navigation

Inhaltsbereich

Dumonda Furger concernent uffiziers italofons en il corp da la Polizia chantunala

Sessiun: 15.06.2023

Ils 31 da matg sun jau vegnida a savair da la pressa ch'il litinent colonel italofon Gianfranco Albertini vegnia a bandunar la Polizia chantunala per la fin da l'onn current.

Avant che Albertini ha surpiglià l'onn 2019 sia funcziun sco vicecumandant, è el stà 22 onns schef da la polizia criminala. El vegn a star a disposiziun al chantun fin la fin da quest onn. Durant quest temp vegn el a sa deditgar a projects interchantunals sco er a la publicaziun taliana dal commentari davart la Lescha grischuna da polizia.

Fin ussa han ins adina guardà che las minoritads culturalas e linguisticas (rumantsch e talian) sajan represchentadas tar il commando.

Sin basa da las explicaziuns qua survart tschentan las sutsegnadras ed ils sutsegnaders las suandantas dumondas a la Regenza:

  1. Èsi enconuschent a la Regenza, che l'uffizier partent è l'unic represchentant da la lingua taliana tar il commando?
  2. Ha la Regenza l'intenziun da mantegnair questa represchentanza? Co pensa ella da proceder tar la substituziun?
  3. Èsi enconuschent a la Regenza, ch'i na dat actualmain betg en mintga basa italofona in uffizier da lingua materna taliana? Co pensa la Regenza d'eliminar questa largia?

Claustra, ils 15 da zercladur 2023

Furger, Michael (Castasegna), Atanes, Altmann, Bachmann, Bardill, Baselgia, Beeli, Bergamin, Berther, Bettinaglio, Biert, Binkert, Bisculm Jörg, Brunold, Censi, Crameri, Degiacomi, Della Cà, Derungs, Dietrich, Epp, Föhn, Gansner, Heini, Hoch, Hohl, Jochum, Kohler, Luzio, Maissen, Mani, Mazzetta, Menghini-Inauen, Metzger, Michael Beni (Donat), Müller, Righetti, Rusch Nigg, Said Bucher, Saratz Cazin, Spagnolatti, Stiffler, Ulber, von Tscharner, Wieland, Zanetti (Sent)

Resposta da la regenza

La finamira da la Regenza 5 en il Program da la Regenza 2021–2024 (missiva da la Regenza carnet nr. 8/2019–2020) prevesa da trair a niz e da promover la diversitad linguistica chantunala sco schanza. La lingua e cultura rumantscha e taliana duain vegnir mantegnidas a lunga vista en il chantun Grischun. La Regenza ha constituì ina instituziun cun stgaffir in post da coordinaziun «Administraziun plurilingua», per che dapli preschientscha da la plurilinguitad en l'administraziun possia vegnir cuntan­schida cun mesiras concretas (cf. missiva da la Regenza al Cussegl grond, carnet nr. 8/2019–2020, p. 454, punct central da svilup 5.1).

Tar la dumonda 1: La Polizia chantunala mussa tut en tut ina repartiziun linguistica, sco ch'ella è cumprovada en il chantun Grischun (Situaziun linguistica en il chantun Grischun [10 % talian, 15 % rumantsch]). Tar la Polizia chantunala lavuran actual­main 518 persunas (stadi: 31 da fanadur 2023). Da quellas èn 50 da lingua materna taliana (9.6 %), 82  da lingua materna rumantscha (15 %) e 412 da lingua materna tu­destga. Pliras persunas da questas 518 inditgeschan dapli ch'ina lingua sco lingua materna.

Dals 22 uffiziers (incl. 3 emploiads civils sin quest stgalim) èn 0 da lingua materna ta­liana, 1 da lingua materna rumantscha, 3 da lingua materna rumantscha/tudestga e 18 da lingua materna tudestga. Da quests 22 uffiziers discurran ultra da quai 18 tant talian sco er tudestg e 6 èn trilings.

Dals 9 commembers dal Stab directiv da polizia (direcziun) èn 0 da lingua materna taliana, 2 da lingua materna rumantscha e 7 da lingua materna tudestga. En la direc­ziun discurran 7 persunas tant talian sco er tudestg e 6 persunas èn trilinguas.

La Polizia chantunala tschertga mintga onn er sistematicamain aspirantas ed aspi­rants da lingua materna taliana, quai ch'è fitg difficil, cumbain ch'igl è oz pussaivel d'absolver la scolaziun da basa en il chantun Tessin.

Tar la dumonda 2: Tras la reuniun da duas partiziuns a la Partiziun Commando e traffic, ch'è vegnida furmada da nov per il 1. da fanadur 2023, è la direcziun da la partiziun vegnida surdada al maior Aluis Candinas. El è da lingua materna ruman­tscha.

Tar la dumonda 3: Ils interess da l'italianitad èn fitg impurtants per la Regenza. Tar l'el­ec­ziun d'uffiziers en la polizia da regiuns vegnan medemamain valitads criteris sco l'integraziun en ils territoris italofons, il domicil e las cumpetenzas linguisticas talianas en las regiuns Engiadina (cun las vals dal sid) e Rain-Moesa.

Per finir poi vegnir constatà che la Regenza è conscienta da la problematica e sa sten­ta da meglierar cuntinuadamain la situaziun en il rom dal pussaivel. La Regenza dat grond pais a la garanzia da la cumpetenza linguistica en l'administraziun en ge­ne­­ral, ma er tar la Polizia chantunala en spezial. La recrutaziun da collavuraturas e collavuraturs cun enconuschientschas linguisticas respectivas resta dentant ina sfida. 

31 d'avust 2023