Navigation

Inhaltsbereich

Incumbensa Stiffler concernent l'analisa da la procedura d'admissiun per classas da talents

Sessiun: 15.06.2023

Dapi l'onn 2015 existan en il chantun quatter scolas da talents a Champfèr, Cuira, Tavau e Glion. Quellas pussibiliteschan a scolaras ed a scolars dal stgalim secundar I (scola reala e secundara) che han talents en ina disciplina da sport ed en musica, da frequentar la scola cun in urari ch'è adattà a las concurrenzas ed als trenaments.

Las classas da talent èn francadas en l'artitgel 38 da la Lescha da scola.

La finamira principala d'ina classa da talents è, che las scolaras ed ils scolars pon promover intensivamain lur talent ultra dal pensum da scola. Perquai che las plazzas èn limitadas, dovri ina tscherta procedura d'admissiun. La procedura d'admissiun actuala cumpiglia ina valitaziun dal potenzial (40 %), in test da la motorica da sport resp. in test musical (30 %) ed in test da la persunalitad (30 %). En differents cas ha questa procedura l'effect, che talents cumprovads na reusseschan betg a l'examen d'admissiun, uschia per exempel tar il test da la persunalitad. Per consequenza na vegnan els betg admess a la scola ed il trenament intensiv, p.ex. sin il nivel dal sport da prestaziun, è uschia mo per part pussaivel a partir da la scola secundara u reala. Il sistem da l'examen d'admissiun na cuntanscha pia betg la finamira.

Dacurt è vegnì enconuschent, che la Regenza na vul – cun ina da las mesiras concernent l'examinaziun da las incumbensas e da las prestaziuns – betg pli ch'il chantun sez organiseschia la procedura per l'examen d'admissiun, mabain fixar mo anc las cundiziuns generalas per l'examen ed eventualmain survegliar la procedura en ina funcziun da controlla tras la gruppa directiva existenta. Suenter ch'ins ha rimnà experientschas durant circa 8 onns ed en vista ad in'eventuala delegaziun da las proceduras d'admissiun a las scolas da talents, èsi ussa pia uras d'analisar la procedura d'admissiun en las classas da talents.

Las sutsegnadras ed ils sutsegnaders incumbenseschan perquai la Regenza da far in'analisa davart las classas da talents, per exempel integrond la gruppa directiva, las scolas da talents, las federaziuns da sport e las organisaziuns da musica. En connex cun questa analisa duain vegnir examinads tranter auter l'examen d'admissiun sco tal, la valitaziun, la qualitad da las recumandaziuns da las federaziuns, il dumber d'admissiuns sco er eventuals ulteriurs aspects. A maun da criteris duai er vegnir mussà en questa analisa, per tge disciplinas da sport/musica che las classas da talents èn adattadas.

Claustra, ils 15 da zercladur 2023

Stiffler, Rageth, Bergamin, Altmann, Bachmann, Bavier, Berther, Berweger, Biert, Binkert, Bleuler-Jenny, Censi, Claus, Cola Casaulta, Collenberg, Danuser (Cuira), Della Cà, Derungs, Dietrich, Epp, Föhn, Furger, Gansner, Gredig, Hartmann, Heini, Hoch, Hohl, Holzinger-Loretz, Jochum, Kappeler, Kocher, Lehner, Loi, Luzio, Maissen, Mani, Mazzetta, Michael (Castasegna), Natter, Pfäffli, Righetti, Rüegg, Said Bucher, Saratz Cazin, Sax, Schutz, von Ballmoos, Widmer, Wieland

Resposta da la regenza

Il chantun Grischun dispona dal dumber da persunas talentadas il pli aut en Svizra en proporziun cun la grondezza da la populaziun, sch'ins considerescha las Swiss Olympic Talent Cards. La raschun per quai è segir er la promoziun relativamain vasta en la cumparegliaziun interchantunala en las scolas grischunas da talents. Quai ple­da per ina procedura d'admissiun adequata che funcziuna da princip. Tuttina stoi ve­gnir menziunà, che l'identificaziun e la selecziun da talents per l'entir sistem da sport ed er per la musica èn ina sfida. Pervia dals numerus facturs d'influenza cumplexs sin il svilup d'uffants e da giuvenils, n'èsi strusch pussaivel da far prognosas a lunga vista durant l'uffanza e durant la pubertad. Dal punct da vista scientific è la validitad da prognosa tar l'identificaziun da talents avant la pubertad spezialmain bassa ed ils resultats da concurrenza n'èn nagin indicatur valaivel per la futura capacitad da pre­sta­ziun tar la generaziun fitg giuvna. L'identificaziun da talents en la vegliadetgna da 13 fin 15 onns vala perquai adina sco avischinaziun la meglra pussaivla e sto vegnir realisada sche pussaivel en moda multidimensiunala, sistematica, transparenta ed objectiva. Per pudair cuntanscher pli tard in nivel da prestaziun aut, èn decisivas ultra da la constituziun fisica actuala cunzunt er la persunalitad e la motivaziun da presta­ziun. L'idea directiva da la selecziun da talents sa cloma perquai: «Betg ils actual­main megliers, mabain ils pli adattads».

En il rom da l'examinaziun da las incumbensas e da las prestaziuns vegnan actual­main examinadas tranter auter l'excorporaziun da l'examen d'admissiun a las scolas da talents ed ina contingentaziun da las plazzas da scola da talents. En quest con­nex han gia gì lieu differents lavuratoris ensemen cun las scolas da talents e cun lur coordinaturas e coordinaturs, e singuls potenzials da simplificaziun e d'optimaziun èn gia vegnids identifitgads. In'analisa quantitativa vegn anc elavurada. Ultra da quai è planisada l'integraziun da las federaziuns da sport e da musica, en spezial per la vali­ta­ziun specifica dal potenzial.

Cun las vias d'atlets specificas per las disciplinas da sport che sa basan sin il con­cept general davart il svilup da sport e d'atlets «FTEM Svizra» existan per mintga disciplina da sport recumandaziuns davart la necessitad d'ina soluziun da scola. A maun da questas vias d'atlets po vegnir mussà – ensemen cun la chargia da temp necessaria per il trenament e per las concurrenzas – il basegn u eventualmain la refusa d'in basegn per ina soluziun da classas da talents da la disciplina da sport correspundenta. Insatge cumparegliabel sto anc vegnir elavurà per la musica.

Sa basond sin questas explicaziuns propona la Regenza al Cussegl grond d'acceptar questa incumbensa.

23 d'avust 2023