Dumonda da la fracziun da la PS concernent las deducziuns per uffants tar l'import da taglia empè tar l'entrada ch'è suttamessa a la taglia (emprima sutsegnadra Meyer Persili [Cuira])
Sessiun: 26.08.2009
En l'art. 38 da la lescha da taglia permetta il chantun Grischun da far deducziuns per uffants tar l'entrada ch'è suttamessa a la taglia. Cumbain che la PS sustegna cleramain la distgargia da famiglias, è il sistem da las deducziuns tar l'entrada ch'è suttamessa a la taglia dispitaivel, perquai ch'el distgargia la finala probablamain pli fitg las entradas pli autas che las entradas mesaunas e bassas.
In'alternativa fissan deducziuns per uffants che na vegnissan betg fatgas tar l'entrada ch'è suttamessa a la taglia, mabain tar l'import da taglia. Quest sistem vegn tendenzialmain a distgargiar pli fitg las entradas pitschnas e mesaunas. Ina tala midada da sistem n'avess dentant betg mo consequenzas per la legislaziun chantunala da taglia, mabain er per ils relaschs correspundents da las vischnancas e da las baselgias.
Las sutsegnadras ed ils sutsegnaders supplitgeschan perquai la regenza da respunder las suandantas dumondas:
1. Quant auta pudess esser ina deducziun tar l'import da taglia per remplazzar las deducziuns vertentas tar l'entrada ch'è suttamessa a la taglia, q.v.d. tge valur equivalenta per uffant correspundess a las deducziuns actualas per uffants?
2. Tge perditas da taglia resultassan, sche las deducziuns per uffants vertentas vegnissan remplazzadas tras ina deducziun dad 800.– francs per uffant tar l'import da taglia?
3. Tge consequenzas avess quai per tge gruppa d'entrada, sch'i pudess – independentamain da la dumonda, sche las persunas che han il dretg sin ina deducziun han in'entrada ch'è suttamessa a la taglia u betg – vegnir fatga ina deducziun dad 800.– francs per uffant tar l'import da taglia resp. sch'i vegniss fatga ina bunificaziun correspundenta?
4. Tge consequenzas avess ina tala midada da sistem per las taglias da las vischnancas e da las baselgias?
Cuira, ils 26 d'avust 2009
Meyer Persili (Cuira), Locher Benguerel, Thöny, Arquint, Bucher-Brini, Frigg-Walt, Gartmann-Albin, Jaag, Jäger, Menge, Peyer, Pfenninger, Pfiffner-Bearth, Trepp, Pedrini (Soazza)
Resposta da la regenza
La dumonda da la fracziun vul che las deducziuns per uffants na vegnian betg pli fatgas tar l'entrada, mabain tar l'import da taglia.
Il sistem vertent da la taglia sin las entradas è caracterisà dal princip constituziunal da l'imposiziun da taglia tenor la capacitad economica (art. 95 al. 1 da la constituziun chantunala, CC). Il princip da la capacitad economica vegn realisà en il chantun Grischun cun ina tariffa progressiva tar la taglia sin las entradas, nua che las tariffas da taglia s'augmentan, sche las entradas suttamessas a la taglia creschan. La capacitad economica vegn pia mesirada en la basa da calculaziun. Ils custs chaschunads dals uffants reduceschan questa capacitad economica. Perquai ston las deducziuns respectivas medemamain vegnir fatgas tar la basa da calculaziun. Deducziuns per uffants tar l'import da taglia violeschan il princip da l'imposiziun da taglia tenor la capacitad economica. Tenor l'avis da la regenza stuessan talas deducziuns vegnir giuditgadas sco anticonstituziunalas sin basa da l'art. 95 al. 1 CC.
Las consequenzas da deducziuns da taglia na sa mussan betg en la grevezza fiscala totala, mabain en la grevezza fiscala marginala. La dumonda n'è betg, quant gronda che la grevezza fiscala u la tariffa da taglia applitgabla è, mabain quant fitg che la grevezza fiscala sa mida tras ina deducziun da 100.– francs. Las cifras respectivas vegnan inditgadas en la dumonda da la fracziun da la PS concernent l'effect da deducziuns da taglia.
En il dretg vertent reduceschan las deducziun per uffants l'entrada suttamessa a la taglia. Questa grondezza vegn utilisada en differents secturs (reducziun individuala da las premias, pajaments directs, stipendis, indemnisaziuns per canortas d'uffants, calculaziun dal minimum d'existenza e.u.v.). Cun ina deducziun per uffants tar l'import da taglia stuessan vegnir chattads en tut quests secturs novs puncts da referiment, uschia ch'ils andaments administrativs daventassan anc pli cumplitgads.
Sin basa da questas ponderaziuns generalas refusa la regenza la deducziun per uffants tar l'import da taglia, la quala cuntrafa tenor ella a la constituziun. Qua tras va ella d'accord cun la gronda maioritad dals chantuns e cun la conferenza da las directuras e dals directurs chantunals da finanzas che refusan medemamain la deducziun per uffants tar l'import da taglia, ch'è vegnida concludida per la taglia federala directa.
Davart las dumondas concretas prenda la regenza posiziun sco suonda:
1. Sche las deducziuns actualas per uffants vegnissan remplazzadas tras deducziuns tar l'import da taglia senza resguardar las entradas fiscalas, pudessan quellas importar 400.– francs, 600.– francs e 1'200.– francs. Partind d'ina bunificaziun per uffants che chaschunass in pajament er en cas da prestaziuns fiscalas bassas, resultassan imports da 350.– francs, da 500.– francs e da 1'000.– francs.
2. Cun ina deducziun unitara dad 800.– francs vegnissan abolidas las differentas autezzas tar las deducziuns per uffants; per la scolaziun ordaifer na vegniss betg pli concedida ina deducziun pli auta. En cumparegliaziun cun il dretg vertent perdess il chantun entradas en la dimensiun da var 2.8 milliuns francs.
3. Sche la deducziun dad 800.– francs per uffant chaschunass in pajament, en cas che la prestaziun fiscala è pli bassa che questa deducziun, perdess il chantun entradas en la dimensiun da var 9.5 milliuns francs.
4. Per las vischnancas e per las baselgias stuess vegnir normà il medem sistem sco per il chantun. En quest connex stuessan las deducziuns vegnir pajadas tut tenor il pe da taglia dal purtader respectiv da la suveranitad. Quai avess per consequenza che las bunificaziuns da taglia las pli autas resultassan en las vischnancas cun il pe da taglia maximal; ed er las baselgias fissan obligadas da pajar bunificaziuns correspundentas (per part summas fitg pitschnas).
02 da november 2009