Dumonda Pedrini (Roveredo) concernent il sustegn da l'orchester da la Svizra taliana (OSI)
Sessiun: 28.08.2009
Ils ultims mais ha il cussegl d'administraziun da la SRG SSR idée suisse publitgà ses program da spargn che duai vegnir realisà en il decurs dals proxims onns cun l'intent da restructurar la societad.
Las mesiras da spargn prevesan er da stritgar la contribuziun a l'orchester da la Svizra taliana (OSI) en la dimensiun da totalmain 2,5 milliuns francs per onn a partir da l'onn 2013.
Pervia da quest manco d'entradas n'è il OSI (che vegn er finanzià dals chantuns Tessin e Grischun) betg pli en cas da cuvrir las expensas currentas ch'èn necessarias per in orchester. Perquai exista in grond privel ch'il OSI vegnia dissolvì e ch'el svaneschia.
La Svizra taliana fiss pia la suletta da las trais regiuns linguisticas da noss pajais che n'avess betg pli in orchester sinfonic.
Il OSI era vegnì distatgà da la RSI (radiotelevisione svizzera di lingua italiana) a la fin dals onns 1980 e vegn finanzià dapi lura dals dus chantuns, da la SRG SSR e da persunas privatas.
Ina part da las entradas deriva da las gaschas che l'orchester retschaiva.
Qua tras vegn dumandada la regenza, sch'ella fiss pronta d'intervegnir tar il cussegl d'administraziun da la SRG SSR idée suisse, per ch'el repondereschia sia decisiun e per ch'el paja er en l'avegnir ina contribuziun al OSI, uschia ch'il OSI pudess cuntinuar cun sia activitad sco orchester sinfonic.
Cuira, ils 28 d'avust 2009
Pedrini (Roveredo), Giovanoli, Righetti, Bondolfi, Cahannes Renggli, Keller, Mengotti, Plozza, Tenchio, Zanetti, Mainetti, Pedrini (Soazza)
Resposta da la regenza
En la dumonda dal deputà Pedrini (Roveredo) vegn dumandada la regenza, sch'ella fiss pronta d'intervegnir tar il cussegl d'administraziun da la SRG SSR idée suisse, per ch'el repondereschia sia decisiun da stritgar a partir da l'onn 2013 las contribuziuns annualas da 2.5 milliuns francs a l'orchester da la Svizra taliana (OSI).
Tras il manco d'entradas na fiss il OSI betg pli en cas da cuvrir las expensas currentas, ed igl exista in grond privel che l'orchester vegnia dissolvì. Dapi ch'il OSI è vegnì distatgà da la RSI (radiotelevisione svizzera di lingua italiana) a la fin dals onns 1980, vegn el finanzià dals chantuns Tessin e Grischun, da la SRG SSR idée suisse, da persunas privatas e per part tras las gaschas che l'orchester retschaiva.
Il chantun Grischun s'engascha dapi onns cun contribuziuns annualas che vegnan concedidas per concerts realisads en il chantun Grischun. La primavaira 2009 (disposiziun dal departament nr. 53 dals 2 d'avrigl 2009) è vegnida renovada la cunvegna da prestaziun ed auzada la tariffa da contribuziun per ils onns 2009 e 2010 da 64'000.– francs ad 80'000.– francs.
Il OSI tutga tar ils orchesters sinfonics professiunals ils pli impurtants en Svizra. En vista culturala ha el betg sco ultim er ina gronda impurtanza per la Svizra quadrilingua – ina impurtanza che vegn savens sutvalitada en il Grischun tudestg. En quest senn ha il OSI betg mo ina funcziun impurtanta per la furmaziun da l'identitad en la Svizra taliana, mabain è in enritgiment cultural per l'entir chantun Grischun.
La regenza è persvadida tant da la qualitad sco er da l'impurtanza culturala dal OSI per il chantun Grischun. Perquai è ella pronta d'intervegnir tar il cussegl d'administraziun da la SRG SSR idée suisse, per che quel repondereschia sia decisiun.
2 da november 2009