Las disposiziuns legalas chantunalas davart il register da commerzi duain vegnir adattadas a las prescripziuns federalas midadas. La regenza grischuna ha deliberà la missiva correspundenta concernent la revisiun parziala da la lescha introductiva tar il dretg d'obligaziuns svizzer per mauns dal cussegl grond. Quel vegn a tractar la fatschenta en la sessiun da favrer 2010.

Per il 1. da schaner 2008 aveva la confederaziun revedì totalmain l'ordinaziun federala davart il register da commerzi. Questas adattaziuns han consequenzas per las proceduras e per las cumpetenzas sco er per las instanzas da surveglianza, da recurs e da multas. Er las disposiziuns en connex cun societads che vegnan extinguidas d'uffizi en il register da commerzi ed en connex cun la reinscripziun d'unitads giuridicas extinguidas èn vegnidas midadas.

A las prescripziuns federalas midadas sto ussa er vegnir adattà il dretg chantunal. Uschia ston vegnir regladas da nov la surveglianza dal register da commerzi e la via da recurs. Tenor il dretg vertent è l'autoritad da surveglianza er l'instanza da recurs. Da nov vegni differenzià tranter ina surveglianza administrativa (sco fin ussa il departament d'economia publica e fatgs socials) ed ina instanza da recurs giudiziala (dretgira chantunala).

La finamira da l'adattaziun è quella da pussibilitar cun ina legislaziun concisa proceduras favuraivlas e sveltas. Las novas disposiziuns chantunalas davart il register da commerzi vegnan regladas en la lescha introductiva chantunala tar il dretg d'obligaziuns svizzer. En consequenza po l'ordinaziun executiva dal cussegl grond davart il register da commerzi vegnir abolida.


Infurmaziuns:
president da la regenza Hansjörg Trachsel, schef dal departament d'economia publica e fatgs socials, tel. 081 257 23 01


Gremi: regenza
Funtauna: rg chanzlia chantunala dal Grischun