Per meglierar la qualitad da l'adempliment da las incumbensas dal stadi, duain talas vegnir examinadas periodicamain e sistematicamain en il Grischun. La regenza ha concludì e fixà l'instrumentari d'examinaziun correspundent. Ultra da quai ha la regenza prendì enconuschientscha d'in rapport da l'uffizi dal servetsch social davart la purschida da cussegliaziun per famiglias. Ella ha concludì d'optimar la purschida e da serrar las largias tenor pussaivladad. Dal rest ha la regenza formulà sias respostas da la consultaziun tar il nov program naziunal per la protecziun da l'uffant sco er tar la surpigliada da las prescripziuns da svapur da l'UE per utensils da lavur.

La regenza examinescha las incumbensas dal stadi
En il Grischun duain las incumbensas dal stadi vegnir examinadas periodicamain e sistematicamain per meglierar la qualitad da l'adempliment da talas. La regenza ha concludì e fixà in instrumentari d'examinaziun, per ch'ella possia realisar – en il rom da la planisaziun politica – mintga quatter onns l'examinaziun periodica e sistematica da las incumbensas. L'instrumentari d'examinaziun vegn applitgà per l'emprima giada l'onn 2010. Ils resultats da l'examinaziun da las incumbensas servan sco basa per il giudicament da la situaziun en vista al relasch da las finamiras e da las directivas politicas surordinadas tras il cussegl grond per il program da la regenza da la proxima perioda da planisaziun 2013 – 2016. Cun il nov instrument d'ina examinaziun periodica e sistematica da las incumbensas, ademplescha la regenza ina incumbensa da la constituziun che l'oblighescha da controllar periodicamain, sche las incumbensas ch'il chantun ademplescha èn necessarias, effectivas e finanziablas.

Il chantun examinescha purschidas da cussegliaziun per famiglias
Il chantun Grischun vul optimar la purschida da cussegliaziun per famiglias e serrar las largias tenor pussaivladad. La regenza grischuna ha prendì enconuschientscha d'in rapport correspundent da l'uffizi dal servetsch social, en il qual èn vegnidas examinadas tut las purschidas da cussegliaziun per famiglias.
Il rapport concluda ch'i dat largias en trais secturs da la purschida da cussegliaziun, nua ch'i basegna d'agir. En la cussegliaziun d'educaziun e da geniturs manca ina purschida da cussegliaziun da basa per tut las regiuns per uffants tranter trais onns e l'entrada en scolina sco er per uffants pli vegls e per giuvenils ch'entran en la vita da lavur. Ina terza largia exista tar la purschida da cussegliaziun per persunas attempadas perquai che la dumonda en quest sectur crescha.
Sin fundament da quest rapport ha la regenza incumbensà il departament d'economia publica e fatgs socials d'elavurar e da realisar in concept. Cun quest concept duai la cussegliaziun da geniturs e d'educaziun vegnir cumplettada cun cleras finamiras per uffants e per giuvenils. Plinavant duai vegnir tegnì quint da la dumonda creschenta suenter cussegliaziuns per persunas attempadas.
L'examinaziun da las purschidas da cussegliaziun per famiglias resulta da las tractativas dal cussegl grond davart il rapport da famiglia en la sessiun da favrer 2007. Sco cundiziun da basa speziala èsi vegnì pretendì che las purschidas da cussegliaziun duain da princip vegnir ademplidas er en l'avegnir cun las resursas existentas.

Las finamiras dal program naziunal per la protecziun da l'uffant vegnan sustegnidas
La regenza grischuna beneventa las finamiras tematicas e strategicas dal nov program naziunal per la protecziun da l'uffant ch'è planisà. Quest program ha – en il rom d'in partenadi da posts publics e privats – sco finamira da coordinar, da promover e da realisar projects da prevenziun en il sectur da la protecziun da l'uffant sin plaun naziunal.
La regenza – sco quai ch'ella scriva en sia consultaziun a l'associaziun svizra per la protecziun da l'uffant – è da l'avis ch'ils puncts centrals dal program sajan impurtants temas per il sectur da la protecziun da l'uffant. La regenza crititgescha dentant la finanziaziun limitada previsa da las structuras. Las consequenzas finanzialas ch'ils singuls puncts dal program vegnan ad avair per ils chantuns sco er per las vischnancas n'èn numnadamain betg evidentas. Per la regenza èsi ultra da quai impurtant ch'ils chantuns vegnian integrads a temp tar la realisaziun dal program naziunal per la protecziun da l'uffant e ch'els hajan il dretg da cogestiun. La realisaziun da la protecziun da l'uffant è numnadamain per gronda part la chaussa dals chantuns.

La surpigliada da las prescripziuns da svapur da l'UE è raschunaivla
La regenza grischuna beneventa l'integraziun planisada da las prescripziuns da svapur da l'UE per utensils da lavur en il dretg svizzer. Qua tras vegni correspundì al princip da la prevenziun da la protecziun da l'ambient, sco quai che la regenza menziunescha en sia consultaziun davart la midada planisada da l'ordinaziun federala da la protecziun da l'aria. Uschia po medemamain vegnir impedì ch'il martgà svizzer vegnia servì cun utensils che disponan da valurs da svapur bler mendras che quels ch'èn permess en la UE. La nova regulaziun cumpiglia utensils da lavur sco per exempel resgias a motor, segapastgets u suflafeglias.

Da vischnancas e da regiuns

• Luzein: La revisiun parziala da la planisaziun locala "plan da furmaziun per la zona per hotels Pany" da la vischnanca da Luzein dals 18 da december 2008 e dals 27 da mars 2009 vegn approvada.
• Morissen: La revisiun parziala da la planisaziun locala da la vischnanca da Morissen, ch'era vegnida concludida ils 16 d'october 2009, vegn approvada.

Projects da vias
La regenza ha approvà totalmain 4'610'000 francs per construir e per sanar ils suandants trajects da vias:
- via naziunala A28: clappas per tschitschar il fieu en il tunnel da sviament, Saas
- via da Calanca: lavurs d'impressari, Ponte Tiieda
- via taliana: lavurs da construcziun e da cuvrida, punt dal Obertor Cuira

Chaussas persunalas

• Giochen Bearth, domicilià a Sumvitg, è vegnì elegì per il 1. da matg 2010 sco substitut dal veterinari chantunal tar l'uffizi per la segirezza da victualias e per la sanadad d'animals.

Gremi: regenza
Funtauna: rg chanzlia chantunala dal Grischun