En vista al fatg ch'i dat adina puspè violenza a chaschun d'occurrenzas da sport, èn la cussegliera guvernativa Barbara Janom Steiner ed il president dal club da hockey da Tavau (HCD), cusseglier naziunal Tarzisius Caviezel, sa scuntrads ad ina discussiun, avant la stagiun da hockey che cumenza ils 8 da settember 2011. Il facit: Perquai che las persunas responsablas cumbattan en moda consequenta ils paucs problems, poi vegnir desistì en il Grischun er vinavant da mesiras da segirezza che chaschunan gronds custs. A medem temp laudan ils participants da la sesida il cumportament dals fans da sport e dals clubs da fans. Els èn persvadids che nagut n'impedescha ina stagiun da success per il HCD.

A chaschun d'occurrenzas da sport hai dà er l'onn passà repetidamain excess da violenza en Svizra. La violenza en il rom da gieus da ballape è stada il problem il pli grond en quest connex. Ma er occurrenzas da hockey èn stadas pertutgadas.

Discussiuns davart il tema "violenza a chaschun d'occurrenzas da sport" vegnan adina puspè manadas er da las persunas dal chantun e dal HCD ch'èn responsablas per la segirezza. Uschia èn sa scuntrads dacurt la scheffa dal departament da giustia, segirezza e sanadad, cussegliera guvernativa Barbara Janom Steiner, il cumandant da la polizia chantunala dal Grischun, Beat Eberle, il president dal HCD, cusseglier naziunal Tarzisius Caviezel, ed il vicepresident dal HCD, Gaudenz F. Domenig. En il rom da questa scuntrada han els pudì constatar – sco gia a chaschun d'occasiuns anteriuras – che la situaziun n'è betg uschè inquietanta en il Grischun sco en ils conturns da las uniuns da Turitg, da Berna, da Basilea, da Lucerna u da Son Gagl e che la collavuraziun tranter il HCD e la polizia chantunala dal Grischun funcziuna fitg bain.

Sco ils onns precedents vegnan circa duas dunsainas da fans, ch'èn pronts da duvrar violenza e ch'èn enconuschents a la polizia, sco er in pèr paucs gieus da hockey, che chaschunan intervenziuns da la polizia, giuditgads sco problematics. Per quest motiv sa laschan per gronda part evitar intervenziuns da la polizia che chaschunan gronds custs. Tuttina è la polizia chantunala dal Grischun en acziun tar mintga gieu dal HCD en ed enturn il stadion a Tavau. Uschia sa laschan problems percepir a temp ed evitar.

In cumpliment als fans ed als clubs da fans
Ch'i dat per fortuna paucs problems a chaschun dals gieus da hockey a Tavau, attribueschan las persunas responsablas dal HCD e dal chantun er a la stretga collavuraziun tranter il HCD e la polizia chantunala dal Grischun d'ina vart ed ils clubs da fans da l'autra vart. Er ils clubs da fans s'engaschan cun lur commembers e cun ulteriurs fans ch'il sport – e betg la violenza – stettia en il center. Qua tras mettan els in segn cler cunter ils paucs rowdies ch'èn pronts da duvrar violenza.

La finala applitgeschan las persunas responsablas dal HCD e da la polizia chantunala dal Grischun en moda consequenta ils meds ch'ellas han a disposiziun. Per exempel pronunzian ellas scumonds d'entrar en il stadion u en tscherts areals cunter persunas ch'èn prontas da duvrar violenza, ed ellas controlleschan er quests scumonds.

Scuntradas regularas garanteschan il contact tranter la direcziun dal HCD e la scheffa dal departament da giustia, segirezza e sanadad sco er la polizia chantunala dal Grischun. D'ulteriuras mesiras, sco quai ch'ellas vegnan pretendidas da la conferenza da las directuras e dals directurs chantunals da giustia e polizia, poi percunter vegnir desistì, nun che la situaziun daventass considerablamain mendra en l'avegnir.


Infurmaziuns:
- cussegliera guvernativa Barbara Janom Steiner, scheffa dal departament da giustia, segirezza e sanadad, tel. 081 257 25 01
- Tarzisius Caviezel, president dal club da hockey da Tavau, tel. 079 610 23 70


Gremi: departament da giustia, segirezza e sanadad
Funtauna: rg departament da giustia, segirezza e sanadad