A sia ultima sesida ha la regenza grischuna fixà tranter auter in termin supplementar per in'eventuala elecziun cumplementara en la regenza. Plinavant trametta ella en consultaziun il sboz per ina revisiun parziala da la constituziun chantunala per abolir il referendum extraordinari da las autoritads.

L'eventuala elecziun cumplementara ha lieu ils 29 da schaner 2012
La regenza grischuna ha fixà in termin per in'eventuala elecziun cumplementara en la regenza per il rest da la perioda d'uffizi 2011 fin 2014. Sche las elecziuns dal cussegl dals chantuns dals 23 d'october 2011 duessan chaschunar ina vacanza en il gremi guvernativ, avess lieu ils 29 da schaner 2012 in'elecziun cumplementara en la regenza. La regenza è sa decidida per quest termin supplementar, perquai ch'ils termins d'elecziun fixads da la confederaziun, il november 2011 ed il mars 2012, vegnan resguardads sco u memia bauds u memia tards per in'elecziun cumplementara. Il medem termin pudessi eventualmain vegnir votà davart fatschentas chantunalas.

Il dretg da referendum mai duvrà duai vegnir abolì
Sa basond sin la revisiun totala da la constituziun chantunala, acceptada dal pievel grischun l'onn 2003, po il cussegl grond suttametter da sai anora fatschentas che suttastattan mo al referendum facultativ u che tutgan en sia cumpetenza finala ad ina votaziun dal pievel (uschenumnà referendum extraordinari da las autoritads u referendum obligatoric extraordinari). Fin oz n'ha il cussegl grond anc mai duvrà quest instrument.

En la sessiun da december 2009 ha el surdà a la regenza ina incumbensa che pretenda d'abolir quest instrument. La maioritad dal parlament è stada da l'avis ch'i na dovria betg quest referendum sco quai che la pratica vertenta haja mussà. Dal puntg da vista da la politica da stadi saja ultra da quai fauss da delegar al pievel fatschentas delicatas, impurtantas u dispitaivlas cun agid da quest instrument dal cussegl grond.

Suenter ch'il cussegl grond ha approvà l'aboliziun dal referendum extraordinari da las autoritads, sto questa decisiun pia vegnir realisada. La regenza ha tramess en consultaziun il sboz per ina revisiun parziala da la constituziun chantunala (art. 16 cifra 6 CC) fin ils 30 da november 2011. Il plan da termins prevesa che questa fatschenta vegnia suttamessa al cussegl grond en la sessiun d'avust 2012. La revisiun parziala da la constituziun chantunala suttastat al referendum obligatoric. La votaziun dal pievel fiss alura pussaivla l'atun 2012. (Link documents da consultaziun.)

Contribuziuns chantunalas a projects da construcziun dals curs d'aua regladas da nov
En in conclus nov ha la regenza actualisà la regulaziun davart ils fatgs da contribuziun che concernan las construcziun dals curs d'aua. Enfin ussa han las vischnancas survegnì ina contribuziun regulara ordinaria da 20 pertschient dals custs totals da projects da construcziun dals curs d'aua. Questa tariffa da contribuziun regulara duai vegnir mantegnida er en l'avegnir. En cas excepziunals po la regenza però augmentar questa contribuziun chantunala a 25 pertschient sa basond sin la lescha davart la correcziun dals curs d'aua en il chantun Grischun ch'è vegnida revedida totalmain e ch'è entrada en vigur il 1. da schaner 2009, e quai sch'igl è avant maun in project qualitativamain fitg bun ch'è d'in interess spezial per il chantun u che ha in caracter da pilot.

A projects communals per la correcziun dals curs d'aua che servan al mantegniment ed a la segirezza da las vias chantunalas paja il chantun contribuziuns che van a favur da las vischnancas e che importan 5 fin 75 pertschient dals custs totals.

La convenziun davart la protecziun da la maternitad da la OIL po vegnir ratifitgada
En la consultaziun tar l'iniziativa parlamentara concernent la ratificaziun da la convenziun davart la protecziun da la maternitad da l'organisaziun internaziunala da la lavur (OIL; nr. 183) ch'è vegnida avrida da la cumissiun per segirezza sociala e sanadad dal cussegl naziunal prenda la regenza grischuna posiziun sco suonda: Tenor l'avis da la regenza na sto la legislaziun federala betg vegnir adattada per ratifitgar questa convenziun. La lescha da lavur e l'ordinaziun respectiva garanteschan la segirezza giuridica er areguard la salarisaziun durant las pausas da tezzar. Per la cumissiun dal cussegl naziunal percunter datti ina largia en la lescha tar questa dumonda ch'ella vuless serrar cun ina cumplettaziun da l'art. 35a al. 2 da la lescha da lavur. Per la regenza n'è quai però betg ina cuntradicziun, ma i stuess vegnir examinà, sch'igl è insumma necessari d'adattar la lescha en dumonda.


Da vischnancas e da regiuns

• Guarda: La revisiun parziala da la planisaziun locala da la vischnanca da Guarda dals 20 da schaner 2010 vegn approvada.
• La Punt Chamues-ch: La revisiun parziala da la lescha da construcziun "cumissiun da construcziun, emprimas abitaziuns ed abitaziuns secundaras" che la vischnanca da La Punt Chamues-ch ha concludì il 1. da fanadur 2011 vegn approvada.
• Laax: La revisiun parziala da la planisaziun locala, che cumpiglia in plan da zonas 1:5'000 Val da Dumengias, Plaun da Cumin, che vegnida concludida il 1. d'avrigl 2011 da la vischnanca da Laax, vegn approvada.
• Trin: Per sanar e per engrondir la halla polivalenta sin l'areal da la chasa da scola primara a Trin vitg vegn garantida a la vischnanca da Trin ina contribuziun pauschala da 324'000 francs.

Contribuziuns chantunalas a differentas instituziuns

• Societad cooperativa fenaco: Per renovar l'implant da binari da colliaziun privat da la societad cooperativa fenaco a Landquart vegn garantida ina contribuziun da maximalmain 774'358 francs.
• Fundaziun "Gott hilft": A la Fundaziun "Gott hilft", Zizers, vegn garantida ina contribuziun da maximalmain 147'600 francs per remplazzar e per renovar la producziun da chalur en la scola-dimora "Gott hilft" a Scharàns.

Gremi: regenza
Funtauna: rg chanzlia chantunala dal Grischun