La regenza grischuna ha deliberà la missiva per il relasch d'ina lescha davart las scolas autas ed ils instituts da perscrutaziun per mauns dal cussegl grond. Cun la nova lescha vegn ademplida l'incumbensa da la cumissiun per furmaziun e cultura dal cussegl grond da l'onn 2008 da stgaffir ina lescha per promover las scolas autas e la perscrutaziun. La finamira da la lescha è quella da rinforzar il Grischun sco lieu per scolas autas e da promover la perscrutaziun en il chantun per mantegnair e per generar plazzas da lavur qualifitgadas.

Il chantun Grischun vul rinforzar ed extender sia posiziun sco lieu da scola auta e da perscrutaziun. Cun la nova lescha davart las scolas autas ed ils instituts da perscrutaziun qua avant maun vegnan realisadas trais mesiras centralas. Primo stgaffescha il chantun ina basa legala unitara per scolas autas e per lieus da perscrutaziun ch'existan gia. Sin basa d'ina strategia chantunala vegnan las scolas autas e la perscrutaziun promovidas da nov en moda unitara cun agid d'incaricas da prestaziun e da contribuziuns globalas. Secundo vegni garantì che iniziativas novas en il sectur da las scolas autas e da la perscrutaziun possian vegnir sustegnidas. Terzo adatta il chantun ses instruments da perscrutaziun a la legislaziun federala revedida e garantescha uschia ch'il Grischun sco lieu da scolas autas e da perscrutaziun survegn er en l'avegnir meds finanzials federals.

Sin la consultaziun tar la nova lescha che ha durà dals 18 da matg 2011 fin ils 30 da settember 2011 èn vegnidas inoltradas 60 posiziuns. Las posiziuns sustegnan il concept da lescha integrà che unescha las disposiziuns per las scolas autas e per ils lieus da perscrutaziun en ina lescha. Da l'autra vart èsi vegnì crititgà ch'il stadi prendia – tras la lescha – memia ferm influenza sin las scolas autas e sin ils lieus da perscrutaziun. Crititgadas èn er vegnidas la furmaziun d'in cussegl consultativ sco er las disposiziuns davart il profil e davart il portfolio.

La nova lescha tegna quint dals giavischs da la consultaziun e resguarda las disposiziuns dal dretg federal ch'èn vegnidas midadas. La confederaziun ha deliberà l'onn 2011 la lescha federala davart l'agid a las scolas autas e davart la coordinaziun en il sectur da las scolas autas svizras (LASA). La LASA vegn a remplazzar ils relaschs federalas ch'existan per universitads e per scolas autas spezialisadas. La lescha federala davart la promoziun da la perscrutaziun e da l'innovaziun (LPPI) ch'è vegnida revedida totalmain è er avant maun. Da questa revisiun èn pertutgads spezialmain ils lieus da perscrutaziun en il chantun Grischun. La LPPI pretenda ch'ils chantuns da staziunament da lieus da perscrutaziun che vegnan sustegnids da la confederaziun s'engaschian finanzialmain pli fitg en l'avegnir. La nova lescha chantunala furma la basa per che lieus da perscrutaziun ch'èn gia activs en il Grischun possian vegnir sustegnids finanzialmain e per che lieus da perscrutaziun possian vegnir domiciliads da nov en il chantun.

Il cussegl grond vegn a tractar la lescha davart las scolas autas ed ils instituts da perscrutaziun en la sessiun d'october 2012.


Infurmaziuns:
- cusseglier guvernativ Martin Jäger, schef dal departament d'educaziun, cultura e protecziun da l'ambient, tel. 081 257 27 01
- Hans Peter Märchy, manader da l'uffizi per la furmaziun media-superiura, tel. 081 257 61 65


Gremi: regenza
Funtauna: rg chanzlia chantunala dal Grischun