La regenza grischuna lascha sclerir detagliadamain l'opziun d'ina polizia unitara. Per quai ha ella installà ina gruppa directiva. Plinavant ha la regenza approvà in nov center administrativ regiunal a Landquart. 

L'incumbensa per in rapport davart ina polizia unitara è dada
La regenza lascha sclerir ils avantatgs ed ils dischavantatgs da l'installaziun d'ina polizia unitara per il chantun. Ella ha incumbensà il departament da giustia, segirezza e sanadad da preschentar in rapport en chaussa fin la fin da l'onn 2013 resp. per il cumenzament da l'onn 2014. Per quai vegn nominada ina gruppa directiva cun il cusseglier guvernativ Christian Rathgeb, Walter Schlegel, cumandant da la polizia chantunala, sco er Mathias Fässler, secretari dal departament da giustia e polizia. Per lur lavur vegn la gruppa directiva er a consultar represchentants da las vischnancas, per exempel da la citad da Cuira.
La regenza aveva annunzià quest proceder gia en il rapport da polizia 2010. En ses rapport era la regenza arrivada da quel temp a l'avis ch'ina polizia unitara saja da princip da prender en mira a vista mesauna. Ella era sa resalvada da pussibilitar excepziuns per vischnancas (p.ex. per la citad da Cuira) cun polizistas e polizists scolads. La soluziun cun ina polizia unitara pretendia però ulteriurs scleriments. Quellas vegnan ussa fatgas da la gruppa directiva sut la batgetta dal schef dal departament da polizia Christian Rathgeb.
Actualmain existan en il Grischun a medem temp polizias communalas e la polizia chantunala. Las vischnancas pon però – cunter indemnisaziun – surdar lur cumpetenzas polizialas a la polizia chantunala. 18 vischnancas profitan actualmain en differentas dimensiuns dals servetschs da la polizia chantunala ch'èn reglads en in contract. Var 50 vischnancas han agens organs da polizia (polizists communals u contracts cun servetschs da segirezza). Tut las ulteriuras vischnancas n'han ni organs da polizia ni in contract cun la polizia chantunala. Qua exequeschan ils commembers da la suprastanza communala las incumbensas polizialas. En cas da basegn intervegn per regla la polizia chantunala. 

Landquart survegn in nov center administrativ tar la staziun
A Landquart vegn mess en pe in center administrativ regiunal cun 42 plazzas da lavur. La regenza ha approvà il nov center administrativ che sa basa sin la strategia chantunala d'immobiglias. La finamira da la strategia chantunala d'immobiglias è quella da realisar en l'entir Grischun tut en tut nov centers regiunalas en lieus che furman gia ussa centers administrativs. Gia en funcziun èn ils centers a Glion, a Roveredo ed a Tusaun.
A Landquart vegnan ils quatter servetschs chantunals polizia chantunala, servetsch social, servetsch psicologic da scola sco er inspecturat da scola e da scolina da l'uffizi per la scola populara ed il sport unids en quest nov center administrativ. Il nov edifizi vegn construì directamain sper la staziun da Landquart en in lieu fitg bain accessibel e central. Cun las lavurs da construcziun vegni cumenzà probablamain la primavaira 2013. Proprietaria da quest edifizi è la Viafier retica (VR). Il chantun vegn a prender en locaziun las localitads per quests quatter servetschs chantunals. 

Dapli daners per l'agid a manaschis agriculs
Il chantun augmenta ses emprest da daners a l'associaziun grischuna per credits a l'agricultura (ACA) per 400 000 francs a var 2,25 milliuns francs. En quest connex sa tracti d'ina cuntraprestaziun chantunala per ina contribuziun federala da la medema autezza. La ACA po conceder a gestiunarias ed a gestiunaris da manaschis purils agids finanzials en furma d'emprests da daners senza tschains per metter en urden difficultads finanzialas senza culpa, per substituir emprests da daners cun tschains existents (conversiun dals debits) u per facilitar la liquidaziun dal manaschi.
Ils ultims onns è il basegn per agids a manaschis agriculs creschì cuntinuadamain. Il motiv principal è in program da conversiun dals debits che pussibilitescha als manaschis agriculs da substituir debits tschainsibels fin a 50 pertschient da la valur da rendita (per gronda part ipotecas e credits privats). Ma er stretgas finanzialas pervia da divorzis u pervia da l'entrada d'in genitur u dals geniturs en ina chasa da persunas attempadas e da tgira datti adina pli savens. Il volumen da credit da la ACA è s'augmentà uschia dapi l'onn 2004 da var 2,8 milliuns francs a 4,9 milliuns francs (stadi la fin da l'onn 2011). 

L'Ovra Russein SA vegn fundada
La regenza ha approvà ils documents da fundaziun da l'Ovra Russein SA (ORU). Sco gia communitgà il cumenzament da l'onn sa participescha il chantun cun 10 pertschient vi da la nova societad d'ovras electricas (communicaziun da la regenza dals 26 da schaner 2012). Quella giada èn er vegnidas approvadas la nova concessiun dal dretg da las auas sco er la nova renunzia al return dals implants. 


Da vischnancas e da regiuns

• Bravuogn: La revisiun parziala da la lescha da construcziun da la vischnanca da Bravuogn, concludida ils 22 da favrer 2012, vegn approvada cun resalvas. Cun la revisiun parziala è il schema da zonas concernent la zona d'abitar e da mastergn en il territori da Runs vegnì midà per part.
• Tavau e Claustra-Serneus: Il plan dal cunfin tranter las vischnancas da Tavau e da Claustra-Serneus vegn approvà.
• Stussavgia: La lescha da taglia dals 23 d'avust 2012 da la vischnanca da Stussavgia (da nov per il 1. da schaner 2013) vegn approvada.
• Riein: La revisiun parziala da la lescha da taglia da la vischnanca da Riein dals 10 da zercladur 2010 vegn approvada. La revisiun pertutga la taglia sin midada da maun. 

 
Gremi: regenza
Funtauna: rg chanzlia chantunala dal Grischun