L'uffizi per industria, mastergn e lavur dal Grischun (UCIML) vegn a permetter per entant vinavant la lavur da dumengia en il designer outlet Landquart (DOL). Il tribunal federal ha constatà il favrer 2014 che Landquart na saja betg ina regiun turistica en il senn da la lescha da lavur, uschia che la norma speziala per lavur da dumengia senza permissiun per butias en territoris da turissem na possia betg vegnir applitgada. Suenter questa sentenzia ha il UCIML decidì da permetter la lavur da dumengia en il DOL provisoricamain fin la fin d'avust. Questa situaziun duai vegnir mantegnida vinavant fin a la realisaziun da la moziun Abate.

Il tribunal federal è s'exprimì mo davart l'applicaziun da la disposiziun respectiva da la lescha da lavur davart la lavur da dumengia che na dovra nagina permissiun en territoris da turissem. Davart la dumonda, sche la lavur da dumengia en il DOL possia vegnir permessa sin in'autra basa, n'è il tribunal federal betg s'exprimì. 

Moziun Abate
Cun la moziun Abate ch'il parlament federal ha acceptà cun gronda maioritad è il cussegl federal vegnì incumbensà da stgaffir sin basa d'ina ordinaziun ina regulaziun confurma al temp che permetta a centers da cumpra turistics d'occupar forzas da lavur las dumengias, resguardond ils basegns moderns da l'economia da turissem. La moziun Abate vegn pia er ad avair in effect sin la situaziun dal DOL. 
 
Il princip da la proporziunalitad pretenda da tolerar ad interim il stadi actual dal DOL
Pervia da la clera voluntad da la represchentanza dal pievel a Berna, da pussibilitar d'occupar forzas da lavur las dumengias en centers da cumpra turistics, vegni pretendì per motivs da la proporziunalitad da permetter vinavant la lavur da dumengia che vegn pratitgada en il DOL dapi entant 5 onns, e quai fin che la dumonda davart la realisaziun da la moziun Abate è sclerida. I fiss sproporziunà da scumandar ussa la lavur da dumengia en il DOL, malgrà questas perspectivas concretas, e da pia abolir 80 fin 100 plazzas da lavur sco er da metter en privel l'existenza dal designer outlet Landquart cun tuttina circa 370 plazzas parzialas ed a temp cumplain. 
 

Infurmaziuns:
Paul Schwendener, manader da l'uffizi per industria, mastergn e lavur, tel. 081 257 23 45, e-mail: paul.schwendener@kiga.gr.ch 
 

Gremi: uffizi per industria, mastergn e lavur
Funtauna: rg uffizi per industria, mastergn e lavur