Il tribunal federal n'entra betg en il recurs che la regenza grischuna ha inoltrà en connex cun la cuntraversa cun il chantun Turitg davart la glista dals ospitals. Uschia n'è vegnida prendida nagina decisiun giudiziala en chaussa. La decisiun dal tribunal administrativ federal n'ha pia naginas consequenzas per la clinica holistica Engiadina e per il provediment da la populaziun grischuna, cun excepziun dal fatg che la procedura sa prolunghescha.

Cun la glista dals ospitals dals 8 d'october 2013 aveva la regenza grischuna dà ina incarica da prestaziun per malsognas secundaras da stress (psichiatria acuta) a la clinica holistica Engiadina, Susch. En ina disposiziun intermediara ha il tribunal administrativ federal concedì il fanadur passà al chantun Turitg la legitimaziun da far recurs cunter l'incarica da prestaziun da la clinica holistica Engiadina sin la glista dals ospitals da psichiatria dal Grischun. Cun l'inscripziun da la clinica da burn-out da Susch sin la glista dals ospitals dal Grischun sa vesa il chantun Turitg cumpromess en plirs interess degns da vegnir protegids. Sco tals ha il chantun Turitg fatg valair ina planisaziun dal provediment che correspunda als basegns sco er aspects finanzials.

En in recurs inoltrà al tribunal federal ha la regenza grischuna pretendì che la decisiun intermediara dal tribunal administrativ federal vegnia annullada. Cun sia decisiun dals 20 d'avust 2014 n'è il tribunal federal betg entrà en il recurs. Recurs cunter disposiziuns intermediaras sajan admissibels mo, sch'ellas possian chaschunar in dischavantatg irreparabel u sche l'approvaziun dal recurs purtass immediatamain ina decisiun finala che permettess d'evitar ina procedura da cumprova fitg vasta, lunga e chara. La disposiziun intermediara dal tribunal administrativ federal n'haja betg in dischavantatg irreparabel per la clinica holistica. L'approvaziun dal recurs purtass bain immediatamain ina decisiun finala, cunquai che la procedura davant il tribunal administrativ federal stuess vegnir liquidada da tal tras ina decisiun da betg entrar en chaussa, sch'il chantun Turitg na duess betg esser legitimà da far il recurs inoltrà. La regenza n'haja dentant betg mussà che l'ulteriura premissa per l'admissibladad da far recurs cunter la decisiun intermediara dal tribunal administrativ federal saja ademplida, numnadamain l'evitaziun d'ina procedura da cumprova fitg vasta, lunga e chara.

Il departament da giustia, segirezza e sanadad è surprais da questa resalva dal tribunal federal, cunquai ch'igl è tenor ses avis evident ch'ins avess pudì evitar temp e custs, sch'il recurs da la regenza fiss vegnì approvà, er sche naginas varts n'han fatg pretensiuns per mesiras da cumprova davant il tribunal administrativ federal.

Ussa hai num da spetgar la decisiun da recurs dal tribunal administrativ federal en la chaussa sezza. Fin ussa ha il tribunal administrativ federal mo affirmà ch'el saja cumpetent per tractar il recurs. Sch'il tribunal administrativ federal duess approvar cunter tuttas aspectativas il recurs, ha la regenza anc adina la pussaivladad d'inoltrar in recurs al tribunal federal. En il rom da quest recurs po vegnir contestà er il fatg ch'il tribunal administrativ federal ha affirmà la legitimaziun dal chantun Turitg da far recurs. 


Infurmaziuns:
cusseglier guvernativ Christian Rathgeb, schef dal departament da giustia, segirezza e sanadad, tel. 081 257 25 01, e-mail christian.rathgeb@djsg.gr.ch  


Gremi: departament da giustia, segirezza e sanadad dal Grischun
Funtauna: rg departament da giustia, segirezza e sanadad dal Grischun