Suenter il cler gea a la refurma da la gulivaziun da finanzas ha chattà er la lescha generala tar la refurma dal territori ina maioritad en il pievel. Cun la refurma da la GF e cun la lescha generala tar la refurma dal territori èn vegnids approvads dus projects chantunals impurtants, e quai entaifer curt temp ord vista federalistica. Quai fa plaschair a la regenza grischuna. Ils resultats da la votaziun mussan che las votantas ed ils votants vulan prender en maun las sfidas dal futur cun prontezza da midadas e cun voluntad da refurma. Il confess da rinforzar las structuras federalas è in ferm signal statalpolitic.

Il pievel grischun ha prendì questa decisiun suenter ina fasa intensiva da discussiuns e da cuntraversas publicas. La concepziun organisatorica da las 11 regiuns era contestada, uschia ch'il referendum dal pievel e da las vischnancas è reussì. La populaziun ha suandà il giavisch dal cussegl grond e da la regenza da vulair crear regiuns uschè simplas, concisas e proximas a las burgaisas ed als burgais sco pussaivel. L'autonomia communala vegn rinforzada tras quai, l'equivalenza fiscala vegn observada.

Il project duai vegnir realisà per il 1. da schaner 2016. Uschia resti anc temp avunda per las novas regiuns da sa constituir tenor las novas prescripziuns. Las corporaziuns regiunalas da fin ussa pon restar, cumprais las autoritads correspundentas per 2 ulteriurs onns, q.v.d. fin la fin da l'onn 2017. Fin la fin da l'onn 2017 existan er ils circuls da la Tumleastga, dal Mesauc, da l'Engiadin'ota e dal Surses vinavant sco corporaziuns. Il temp transitoric permetta da chattar soluziuns optimalas per ademplir las incumbensas en il futur. Las presidentas communalas ed ils presidents communals da las vischnancas da la regiun furman in organ transitoric che sto garantir che sia regiun vegn a funcziunar l'onn 2016.

Ils projects dals 28 da settember e dals 30 da november 2014 vulan rinforzar la capacitad da prestaziun e l'independenza da las vischnancas ed èn ina cumprova da confidenza envers las vischnancas. In federalissem che funcziuna dovra vischnancas fermas. Ils cumbats da votaziun èn vegnids manads en moda intensiva e cun arguments cuntravers. Cun lur gea als dus projects han las votantas ed ils votants gidà en moda decisiva a rinforzar il federalissem en il chantun Grischun.

Las votaziuns mussan che las votantas ed ils votants sco er las vischnancas surpiglian responsabladad per las finamiras da la refurma da la regenza e dal cussegl grond e ch'els han fidanza en la politica. 
 

Infurmaziuns:
cussegliera guvernativa Barbara Janom Steiner, scheffa dal departament da finanzas e vischnancas, cuntanschibla a partir da las 15.00 per e-mail: barbara.janom@dfg.gr.ch. I vegn clamà enavos.


Gremi: regenza
Funtauna: rg chanzlia chantunala dal Grischun