Quest onn ha la festa per la surdada dal premi grischun da cultura e dals premis da renconuschientscha e da promoziun lieu gievgia, ils 9 da zercladur 2016, a las 16.45 en la chasa da cura a Bravuogn. Quella saira vegn Domenic Janett, che viva a Bravuogn, undrà cun il premi grischun da cultura.

Il favrer 2016 ha la regenza determinà las persunas che survegnan il premi grischun da cultura sco er ils premis da renconuschientscha e da promoziun. Fin ussa aveva la festa mintgamai lieu il november en l'edifizi dal cussegl grond a Cuira. Da nov vegnan ils premis surdads en il lieu da domicil, da lavur u d'origin da la persuna che survegn il premi da cultura. Il premi grischun da cultura è dotà cun 30 000 francs. Plinavant surdat la regenza ils 9 da zercladur 2016 set premis da renconuschientscha ed otg premis da promoziun da mintgamai 20 000 francs.

La festa è publica. I vegn recumandà da viagiar cun ils meds da transport publics. Suenter la festa vegn offrì in aperitiv.


Infurmaziuns:
cusseglier guvernativ Martin Jäger, schef dal departament d'educaziun, cultura e protecziun da l'ambient, tel. 081 257 27 01, e-mail: Martin.Jaeger@ekud.gr.ch


Gremi: departament d'educaziun, cultura e protecziun da l'ambient
Funtauna: rg departament d'educaziun, cultura e protecziun da l'ambient