Dapi il cumenzament da l'onn è Christian Bock il nov directur da l'administraziun federala da duana (AFD) – cun circa 4300 collavuraturas e collavuraturs ina da las unitads las pli grondas da l'administraziun federala. Il nov directur general da duana Christian Bock ha visità dacurt il president da la regenza Christian Rathgeb per sa preschentar.

La collavuraziun dal chantun Grischun cun l'administraziun federala da duana en il sectur da la duana ed en spezial er en il sectur dal corp da guardias da cunfin (Cgcf) è stretga e multifara. En il rom da questa scuntrada impurtanta ha il directur general da duana infurmà davart il svilup internaziunal da la migraziun, davart sias consequenzas per la protecziun dals cunfins da la Svizra sco er davart ils svilups en il sectur da la duana. Detagliadamain è vegnida discutada la situaziun als cunfins da las vals dal sid. Il president da la regenza ha punctuà l'impurtanza d'in corp da guardias da cunfin ferm e d'ina duana ferma al cunfin al sid dal Grischun. Tuttas duas varts èn stadas d'accord che la stretga collavuraziun actuala dal corp da guardias da cunfin cun la polizia chantunala e cun las vischnancas pertutgadas è sa cumprovada.

Buna collavuraziun cun il Grischun
Dals participants è vegnida ludada la collavuraziun fitg buna e la communicaziun averta en tut ils secturs. Rathgeb ha ultra da quai repetì la pretensiun da la conferenza dals directurs chantunals da giustia e polizia da la Svizra orientala (CDCGP-ost) da rinforzar considerablamain il persunal dal corp da guardias da cunfin e dal servetsch svizzer d'infurmaziun.

A la scuntrada èn sa participads da la vart da la confederaziun er il directur dal circumdari da duana Fredy Bucher, il cumandant da la regiun da guardias da cunfin III colonel Markus Kobler ed il manader dal post da duana Val dal Rain Roger Zängerle. Da la vart dal chantun è ultra da quai stà preschent il secretari dal departament da giustia, segirezza e sanadad Daniel Spadin.


Infurmaziuns:
president da la regenza Christian Rathgeb, schef dal departament da giustia, segirezza e sanadad, tel. 081 257 25 01, e-mail Christian.Rathgeb@djsg.gr.ch


Gremi: departament da giustia, segirezza e sanadad
Funtauna: rg departament da giustia, segirezza e sanadad