Sche l'iniziativa vegniss acceptada, fiss periclitada l'existenza da las purschidas da la SSR e da blers offerents privats da medias electronicas. Gist la Svizra orientala trilingua cun sia diversitad regiunala e cun sias particularitads politicas na vegniss betg pli furnida en la medema dimensiun cun medias. La conferenza da las regenzas dals chantuns da la Svizra orientala recumonda perquai a las votantas ed als votants da la Svizra orientala da refusar l'iniziativa No Billag.

La conferenza da las regenzas dals chantuns da la Svizra orientala è persvadida ch'il project che vul abolir las taxas da recepziun e che vul finanziar il service public da las medias mo pli cun reclama, vegniss a far in donn considerabel a las medias naziunalas e regiunalas. Medias multifaras n'èn betg pussaivlas mo cun ina finanziaziun tras ils abunents e tras la reclama. Cunzunt territoris pitschens sco la Svizra orientala n'han betg in martgà grond avunda per garantir ina diversitad da las medias sco ch'ella è oz almain per part anc avant maun. Il cuntrari, la consequenza fiss ch'i resultass ina concentraziun sin anc main interpresas da medias.
Quai ha mussà il svilup da las medias durant ils ultims onns.

Uschia han subì las medias stampadas da la Svizra orientala gia in ferm process da concentraziun che s'accentuescha anc vinavant cun la fusiun previsa da la fatschenta regiunala da la NZZ (St. Galler Tagblatt) e da las medias AZ. Ils chantuns da la Svizra orientala èn pia dependents – ultra da las medias stampadas – da las medias electronicas. Ils emetturs svizzers da radio e da televisiun SSR sco er ils emetturs privats da radio e da televisiun garanteschan ina diversitad minimala da la rapportaziun sin plaun local, regiunal e chantunal.

Pussibilitar la furmaziun libra da l'opiniun
Ils emetturs publics e privats da televisiun e da radio sa finanzieschan per gronda part tras las entradas da taxas dad oz. Blers dals 34 emetturs da radio e da televisiun sco er la SSR idée suisse sco societad naziunala da radio e da televisiun che gestescha il radio e la televisiun svizzers SSR, fissan smanatschads en lur existenza actuala. Cunzunt la Svizra orientala taliana e rumantscha fiss fermamain pertutgada d'in tal svilup.

Medias multifaras permettan ina rapportaziun equilibrada. Tala è da gronda impurtanza per la democrazia directa da la Svizra. Sche l'iniziativa vegniss acceptada, crudass davent l'incumbensa constituziunala, tenor la quala il radio e la televisiun contribueschan a la furmaziun ed al svilup cultural, a la furmaziun libra da l'opiniun sco er al divertiment e resguardan las atgnadads dal pajais ed ils basegns dals chantuns, represchentan ils eveniments en moda correcta ed expriman adequatamain la diversitad da las opiniuns. La SSR promova la furmaziun libra da l'opiniun tras ina infurmaziun detagliada e commensurada, per exempel tar votaziuns ed elecziuns. Questa funcziun crudass davent, sche l'iniziativa vegniss acceptada.

Da la conferenza da las regenzas dals chantuns da la Svizra orientala (CRO) fan part ils chantuns Glaruna, Schaffusa, Appenzell Dadora, Appenzell Dadens, Son Gagl, Grischun e Turgovia.


Infurmaziuns:
president da la CRO Benedikt Würth, cusseglier guvernativ Son Gagl, tel. 079 639 26 60 u 058 229 34 82.


Gremi: conferenza da las regenzas dals chantuns da la Svizra orientala (CRO)
Funtauna: rg conferenza da las regenzas dals chantuns da la Svizra orientala (CRO)