La nova campagna dal post da stab per l'egualitad da las schanzas e da la chasa per dunnas dal Grischun mussa persunalitads grischunas enconuschentas en novas rollas ed en rollas apparentamain nunusitadas. Quai duai intimar da patratgar e da prender part, perquai che rollas fixas ed aspectativas socialas impedeschan ils umans da sa sviluppar individualmain.
A partir dad oz èn da vesair sin placats en l'entir chantun ed en la Viafier retica (VR) 6 differents maletgs: Ina dunna persequitescha cun tensiun ses team preferì, entant che ses um fa il tegnairchasa. In um croda en la bratscha da sia marusa e sa lascha manar. Ina dunna tschertga aventuras, entant che ses um stat a chasa cun ils uffants. Co reagis Vus sin quests maletgs? Cun in surrir, en moda irritada, negativa u schizunt spretschanta? Pertge atgnamain?
Novas rollas e rollas apparentamain nunusitadas
Nus tuts avain ina idea co ch'ina dunna u in um, co ch'ina matta u in mat duain vesair ora, co ch'els duain sa cumportar u tge ch'èn lur incumbensas e lur obligaziuns. Nus essan marcads da la societad, da las medias e da la reclama. Pir cur che nus barattain questas rollas apparentamain tipicas per las schlattainas, ans vegni conscient, quant fitg che quests clichés èn francads en noss chaus. Senza far dumondas criticas, restain nus tschiffads en questas rollas. Rollas tipicas per las schlattainas han ina gronda influenza sin noss cumportament e sin nossa percepziun. En la societad, en la famiglia ed en las relaziuns vegn in cumportament divergent savens sancziunà perquai che las relaziuns da pussanza tradiziunalas duain restar talas e qualas. Las rollas stereotipas per las schlattainas favuriseschan discriminaziun e violenza. Ellas influenzeschan er la tscherna da la professiun u dal studi.
Vast sustegn
La campagna è ina iniziativa dal post da stab per l'egualitad da las schanzas e da la chasa per dunnas dal Grischun. Las suandantas 12 persunalitads grischunas èn da vesair sin ils 6 motivs:
- Andres Ambühl, giugader da hockey
- Andri Perl, rappunz ed autur
- Hans Danuser, artist e titular dal premi da cultura
- Martin Candinas, cusseglier naziunal
- Menga Huonder-Jenny, reschissura
- Nicoletta Noi-Togni, deputada e presidenta communala da San Vittore
- Renzo Blumenthal, mister Svizra 2005, pur biologic ed interprendider
- Selina Gasparin, biatleta e guardia da cunfin
- Silva Semadeni, cussegliera naziunala
- Silvia Hofmann, coach ed experta per dumondas d'egualitad
- Silvio Huonder, scriptur
- Susanne Lebrument, delegada dal cussegl d'administraziun da la Somedia Production
![-](/DE/Medien/Mitteilungen/MMStaka/2018/PublishingImages/Powerplay_Timeout_F12__w_1200__h_0.jpg)
Infurmaziuns:
- Tamara Gianera, manadra dal post da stab per l'egualitad da las schanzas,
tel. 081 257 35 71, e-mail
Tamara.Gianera@stagl.gr.ch
- Bettina Melchior, manadra da la chasa per dunnas dal Grischun, tel. 079 834 41 79, e-mail
B.Melchior@frauenhaus-graubuenden.ch
Gremi: post da stab per l'egualitad da las schanzas
Funtauna: rg post da stab per l'egualitad da las schanzas