La regenza ha approvà ina midada dal plan directiv per optimar il territori da skis Minschuns en la Val Müstair. Plinavant ha ella concedì contribuziuns chantunalas per la ruina dal chastè da Haldenstein e per rempars en la Plessur.

Contribuziun chantunala per la ruina dal chastè da Haldenstein
A la vischnanca da Haldenstein ha la regenza garantì ina contribuziun chantunala da var 615 000 francs per il mantegniment da la ruina dal chastè da Haldenstein. La ruina dal chastè da Haldenstein è ina da las pli marcantas en il chantun. Pervia da sia posiziun exponida è la ruina bain visibla ed ha uschia er ina tscherta impurtanza turistica.
Dapi plirs onns emprova la vischnanca da Haldenstein da conservar la ruina. Retschertgas detagliadas, sustegnidas er dal servetsch archeologic, han mussa che tschertas parts dal chastè èn periclitadas acutamain da cupitgar. Cun il project voluminus duai ussa il chastè vegnir segirà ed uschia vegnir mantegnì. Ils custs totals per la conservaziun importan var 1,75 milliuns francs. Supplementarmain a la contribuziun chantunala inoltrescha la vischnanca a la confederaziun ina dumonda da cofinanziaziun en la dimensiun da 25 pertschient. La summa restanta vegn surpigliada da la vischnanca politica da Haldenstein, uschenavant che la radunanza communala approvescha quai.

©Mattias Nutt

Approvà la midada dal plan directiv per optimar il territori da skis Minschuns
La regenza ha approvà l'adattaziun dal plan directiv regiunal e chantunal en ils secturs "turissem" sco er "natira e cuntrada" en la Val Müstair. Il motiv per l'adattaziun dal plan directiv è il project per l'engrondiment dal territori da skis Minschuns. La Sportanlagen SA Val Müstair vul construir ina telecabina davent da Tschierv fin en il territori da skis existent Minschuns. La telecabina planisada d'ina lunghezza da stgars 1 kilometer permetta in access direct, svelt e confortabel al territori da skis. Uschia n'èsi betg pli necessari d'ir cun l'auto fin en il territori da skis. La plazza da parcar d'enfin ussa po vegnir renatiralisada e la via d'access redimensiunada. La construcziun da la telecabina è l'element central d'in project turistic progressiv per la regiun. Ultra da la telecabina cumpiglia quel la construcziun d'in resort da quatter stailas sper la staziun da val a Tschierv sco er l'ennavada da la pista che maina giu la val. La confederaziun sto anc approvar questa adattaziun dal plan directiv chantunal. Quai è la premissa per che la regenza possia approvar la revisiun necessaria da la planisaziun locala e per che l'uffizi federal da traffic possia concessiunar la telecabina.

©Domenig Architekten AG

Refusà il recurs da surveglianza concernent la sanaziun dal convict da Cuira
Ils 3 d'october 2018 han tschintg recurrents inoltrà in recurs da surveglianza cunter l'architect chantunal, cunter il tgirader da monuments directiv e cunter il manader dal manaschi d'abitar e d'alimentaziun da l'uffizi per la furmaziun media-superiura. Ad els èsi vegnì renfatschà d'avair commess acts e cumportaments cuntraris als duairs ed a la diligenza a chaschun da la renovaziun dal convict.
Per resumar constatescha la regenza che la valur culturala architectonica dal convict saja incontestada e ch'er il convict na saja incontestadamain betg vegnì recepì en in inventari da protecziun. Plinavant na po la regenza betg confermar las objecziuns dals recurrents, che las prescripziuns respectivas na sajan betg vegnidas resguardadas cun tractar il stabiliment prezius – concretamain: areguard il remplazzament da las fanestras ed areguard singulas mesiras da renovaziun a l'intern da l'edifizi. Il cuntrari. La regenza considerescha che la valur dal convict saja vegnida conservada il meglier pussaivel tras sia renovaziun, e quai cun agid d'ina procedura exemplarica che garantescha la qualitad. En quest connex poi restar avert, sche la renovaziun avess stuì vegnir prendida per mauns autramain en cas d'in object da proteger inventarisà. La regenza è da l'avis ch'il stabiliment d'ina valur culturala architectonica preziusa saja vegnì sanà cun quità. Las objecziuns dals recurrents, che sa drizzan en emprima lingia cunter ils trais scheffuncziunaris persunalmain, n'èn betg bunas da mussar cuntravenziuns, per las qualas ina intervenziun da la regenza fiss necessaria u inditgada tenor il dretg da surveglianza. Uschia n'èsi betg da dar suatientscha al recurs da surveglianza.

Rampas d'aua per ils peschs en la Plessur
La regenza ha approvà la 2. etappa d'in project da correcziun da las auas da la citad da Cuira che prevesa rempars en la Plessur. En il rom da las controllas regularas da las ovras èsi vegnì constatà ch'ils rempars existents èn donnegiads en differents lieus. Perquai è la citad da Cuira sa decidida da far ils proxims onns ina sanaziun. Las mesiras duain vegnir realisadas en trais etappas da project.
La 2. etappa cumpiglia ils lieus sur e sut la rundella da l'Obertor sco er dus trajects en il sectur dal Benerpark sur il Kettbrüggli. Tar la rundella da l'Obertor èsi previs da reparar ils mirs da riva existents. En il sectur dal Benerpark ston vegnir sanadas duas traversas da betun. Las traversas donnegiadas na vegnan dentant betg mo simplamain reparadas, mabain vegnan transfurmadas architectonicamain en uschenumnadas rampas da bloc e rampas pendularas. Entant che l'aua croda sur in ur giz en cas da traversas, superescha l'aua currenta la differenza d'autezza en cas da rampas sur in plaun levamain inclinà, per ch'ils peschs possian nudar dal flum siadora. Als custs totals da var 2,2 milliuns francs sa participeschan il chantun e la confederaziun tenor la cunvegna da program da la NGF (nova gulivaziun da finanzas) en il sectur "ovras da protecziun cunter l'aua". La contribuziun chantunala importa var 543 000 francs.

Glisch verda per ina nova chava da crappa a Valragn
La regenza ha approvà la revisiun parziala da la planisaziun locala che la vischnanca da Valragn (dapi il 1. da schaner 2019 part da la nova vischnanca fusiunada da Valragn) aveva concludì ils 6 d'avrigl 2018. Plinavant ha ella concludì l'adattaziun dal plan directiv chantunal en il sectur "explotaziun e reutilisaziun da material" en la regiun Viamala. Questas adattaziuns dal plan directiv han la finamira da pudair avrir ina nova chava da crappa en il territori Höhbrunst (Brunst II), cunquai che las reservas dal territori d'explotaziun d'enfin ussa (Brunst I) van a la fin. En la nova chava da crappa duain pudair vegnir explotads durant 20 fin 25 onns totalmain var 150 000 meters cubic gnais, in crap fitg dumandà. Gestiunaria da la chava da crappa planisada "Brunst II" è la Toscano SA Naturstein, Andeer, che explotescha gia crappa en dus auters territoris a Valragn.

©Uffizi federal da topografia


Gremi: regenza
Funtauna: rg chanzlia chantunala dal Grischun