A chaschun da sia conferenza plenara annuala ad Osterfingen (SH) è la Conferenza da las regenzas dals chantuns da la Svizra orientala (CRO) sa fatschentada intensivamain cun dumondas da la politica da medias. In ulteriur punct central da la conferenza è stà il barat davart mesiras chantunalas cunter la midada dal clima e per l'adattaziun a tala. Plinavant èn las regenzas dals chantuns da la Svizra orientala vegnidas orientadas davart la designaziun da la nova Scola auta spezialisada da la Svizra orientala che ha num Ost.

Las regenzas dals chantuns da la Svizra orientala èn s'occupadas cun il svilup da la politica da medias, numnadamain cun la concentraziun da las medias e cun la midada tar il consum da medias. En il focus da la discussiun è stada la dumonda, sche e cun tge mesiras che las medias localas pon e duain vegnir promovidas. Rapports regiunals equilibrads èn d'ina impurtanza fundamentala per ch'il suveran possia ademplir ses dretgs e sias obligaziuns democraticas cun responsabladad. La politica da medias sto però respectar da tut temp la libertad da pressa. Pervia da quai stoi vegnir renunzià er vinavant ad ina promoziun directa da las medias.

Vegnir a frida cun la midada dal clima
In ulteriur tema central da la radunanza plenara è stada la midada dal clima. D'ina vart èn vegnids discutads ils champs d'acziun pussaivels da la politica chantunala per eventualas cuntramesiras. Ma er l'adattaziun a la midada dal clima è stada in tema dals discurs. Qua sa tracti da la dumonda co ch'ins po vegnir a frida cun las midadas climaticas ch'èn gia capitadas u las qualas ins sto spetgar. En quest connex duain vegnir reducidas las ristgas e tratgas a niz las schanzas. Praticamain en tut ils secturs politics èsi inditgà da prender mesiras per l'adattaziun a la midada dal clima. En differents chantuns da la Svizra orientala existan gia strategias concernent l'adattaziun a la midada dal clima u èn en gir lavurs per elavurar talas.

La Scola auta spezialisada da la Svizra orientala ha num Ost
Sco signal per la partenza en ina nova èra ha la conferenza dals purtaders designads da la nova scola auta spezialisada fixà il num da la nova scola: Ost cun l'agiunta "Scola auta spezialisada da la Svizra orientala". Il nov num Ost exprima la francaziun en tut la Svizra orientala ed en il Principadi da Liechtenstein. Per il 1. da settember 2020 vegnan tut ils trais lieus Rapperswil, Son Gagl e Buchs a sa preschentar unitarmain cun il nov num Ost a partir da la partenza operativa da la nova scola. Gia ils 15 da favrer 2019 aveva la conferenza dals purtaders designads da la nova scola auta spezialisada approvà la cunvegna purtadra.

Ultra da quai sa mussa la CRO persvadida che la Svizra orientala sco lieu da furmaziun, da perscrutaziun e d'economia vegnia rinforzada vinavant uschia, e quai ensemen cun il svilup legraivel da l'accreditaziun independenta da la SATE Cuira.

Da la CRO fan part ils chantuns Glaruna, Schaffusa, Appenzell Dador, Appenzell Dadens, Son Gagl, Grischun e Turgovia. Il chantun Turitg ed il Principadi da Liechtenstein èn commembers associads.


Infurmaziuns:
- Daniel Spadin, chancelier, chanzlia chantunala, tel. 081 257 22 21, e-mail Daniel.Spadin@staka.gr.ch
- presidenta da la CRO Antonia Fässler, tel. 079 962 30 76


Gremi: chanzlia chantunala / Conferenza da las regenzas dals chantuns da la Svizra orientala (CRO)
Funtauna: rg chanzlia chantunala / Conferenza da las regenzas dals chantuns da la Svizra orientala (CRO)