La lescha federala davart la refurma fiscala e la finanziaziun da la AVS (RFFA) vegn ad entrar en vigur il 1. da schaner 2020. Fin lura ston ils chantuns avair adattà lur legislaziun. La regenza grischuna ha ussa deliberà la missiva tar la realisaziun chantunala da la RFFA per mauns dal cussegl grond.

La RFFA ha principalmain la finamira d'abolir ils privilegis fiscals per las societads da holding, per las societads da domicil e per las societads maschadadas e da remplazzar quels tras instruments acceptads sin plaun internaziunal, senza indeblir memia fitg la Svizra sco lieu fiscal. Per quest intent metta la confederaziun a disposiziun la patent box e la pussaivladad da far deducziuns supplementaras per expensas da perscrutaziun e da svilup. Plinavant vegn la quota chantunala dad actualmain 17 pertschient vi da la taglia federala directa auzada a 21,2 pertschient. Las entradas supplementaras resultantas duain permetter als chantuns da sbassar las taglias sin il gudogn per pudair salvar l'attractivitad dal lieu fiscal sco er las plazzas da lavur appartegnentas. Tras la RFFA vegnan dentant er adattadas las reglas per la gulivaziun interchantunala da finanzas, quai che vegn a chaschunar in minus d'entradas da 24 milliuns francs per il chantun Grischun. Questas perditas resultan independentamain da quest project e sa manifesteschan pir pli tard.

Realisaziun concreta en il Grischun
La regenza ha deliberà ils 21 da matg 2019 la missiva tar la realisaziun chantunala da la RFFA. Ella propona principalmain ina reducziun da la tariffa da la taglia sin il gudogn da las persunas giuridicas da 5,5 a 4 pertschient, l'introducziun da la patent box cun ina distgargia da 70 pertschient, ina deducziun supplementara per expensas da perscrutaziun e da svilup da 50 pertschient ed ina distgargia maximala da 55 pertschient. Plinavant duai la pauschala per ils custs da professiun vegnir auzada a 3500 francs per las persunas natiralas.

Questas mesiras chaschunan cunzunt in minus d'entradas tar las persunas giuridicas, uschia ch'ils retgavs dal chantun, da las vischnancas e da las baselgias chantunalas sa sminueschan. Tar il chantun e tar las vischnancas po il minus vegnir cumpensà per part tras la quota pli gronda vi da la taglia federala directa. Las entradas supplementaras duain mintgamai ir pli u main per la mesadad al chantun ed a las vischnancas. Uschia fan ins quint cun perditas da mintgamai var 10 milliuns francs per il chantun e per las vischnancas. Tar las baselgias chantunalas èsi planisà d'auzar il pe da taglia per pudair gulivar il minus.

Urari sin plaun chantunal
Il cussegl grond vegn a tractar la revisiun parziala en la sessiun d'avust 2019. Sch'i vegniss lura fatg in referendum e sche quel reussiss, avess la votaziun dal pievel lieu ils 9 da favrer 2020. Sch'il project vegn approvà, vegn el mess en vigur per gronda part retroactivamain per il 1. da schaner 2020.

En cas ch'il cussegl grond na concludess betg la revisiun parziala en la sessiun d'avust u sch'il pievel refusass quella, vegnissan differentas regulaziuns da la lescha d'armonisaziun da taglia applitgadas directamain a partir dal 1. da schaner 2020. En quest cas vegnissan introducidas directamain la quota pli gronda vi da la taglia federala directa, l'aboliziun dals privilegis fiscals per las societads cun status spezial u la patent box cun ina distgargia da 90 pertschient. I na dess dentant naginas deducziuns supplementaras e naginas indemnisaziuns per las vischnancas u per las baselgias chantunalas.

Agiunta:
missiva


Infurmaziuns:
- cusseglier guvernativ dr. Christian Rathgeb, schef dal departament da finanzas e vischnancas, tel. 081 257 32 01, e-mail Christian.Rathgeb@dfg.gr.ch
- Urs Hartmann, schef da l'administraziun da taglia, tel. 081 257 33 24, e-mail Urs.Hartmann@stv.gr.ch


Gremi: regenza
Funtauna: rg departament da finanzas e vischnancas