La regenza ha deliberà per mauns dal cussegl grond la missiva concernent la participaziun a la revisiun parziala dals 23 da november 2018 da la cunvegna interchantunala davart las instituziuns socialas.
La cunvegna interchantunala davart las instituziuns socialas (CIIS) è in instrument central da la collavuraziun interchantunala en il sectur da las instituziuns socialas. Tut ils chantuns ed il principadi da Liechtenstein èn commembers da la CIIS, il chantun Grischun dapi il 1. d'avrigl 2009.
Cun la CIIS vegni reglà, tgi che sto surpigliar ils custs, sche uffants, giuvenils u persunas creschidas abitan en ina instituziun sociala ch'è renconuschida da la CIIS, ma che sa chatta ordaifer lur chantun da domicil. La CIIS cumpiglia quatter secturs (A, B, C, D). Il sectur A regla la collavuraziun dals chantuns e garantescha a medem temp che uffants e giuvenils vegnan recepids en moda speditiva e nuncumplitgada en instituziuns extrachantunalas. Pervia dal pitschen dumber da cas mancan en il chantun Grischun instituziuns spezialisadas per tscherts basegns d'uffants e da giuvenils. Pervia da quai è il chantun dependent d'instituziuns extrachantunalas. Tras la CIIS vegni garantì che la recepziun d'uffants e da giuvenils cun domicil en il chantun Grischun è pussaivla en instituziuns extrachantunalas en moda speditiva, senza lungas tractativas e discussiuns.
Ils ultims onns hai dà adina dapli dispitas giuridicas pervia da la fixaziun dal domicil civil d'uffants che vegnan assistids en instituziuns socialas. Tranter auter è quai d'attribuir a la nova regulaziun dal dretg da tgira, ch'è entrada en vigur il 1. da fanadur 2014. Sin fundament da la tgira genituriala cuminaivla sa chatta il domicil civil da l'uffant che vegn assistì en ina instituziun, al lieu da l'instituziun, sch'ils geniturs han differents domicils. Pervia da quai resulta per il chantun da staziunament da l'instituziun ina cumpetenza da finanziaziun che cuntrafa al senn ed a l'intent. En ina decisiun ha il tribunal federal plinavant considerà questa inopportunitad sco impediment u almain sco engrevgiament dal dretg federal e declerà che la regla correspundenta da la CIIS na saja betg applitgabla en tals cas.
La conferenza da la cunvegna da la CIIS ha tegnì quint da quests svilups. Ils 23 da november 2018 ha ella approvà ina revisiun parziala da la CIIS, che eliminescha questa mancanza. Ils chantuns ston ratifitgar la revisiun parziala. Il cussegl grond sto pia decider davart la participaziun a la revisiun parziala da la CIIS. La revisiun parziala da la CIIS vegn messa en vigur da la conferenza da la cunvegna entaifer 1 onn, suenter che almain 18 chantuns da cunvegna han fatg part da la revisiun.
Agiunta:
missiva
Infurmaziuns:
cusseglier guvernativ Marcus Caduff, schef dal departament d'economia publica e fatgs socials, tel. 081 257 23 01, e-mail
Marcus.Caduff@dvs.gr.ch
Gremi: regenza
Funtauna: rg departament d'economia publica e fatgs socials