La regenza ha approvà in project da privels da la natira da la vischnanca da Medel (Lucmagn). Ultra da quai ha ella prendì enconuschientscha dals projects federals da la votaziun dal pievel dals 9 da favrer 2020.

Cun betun d'injecziun cunter la crudada da crappa a Curaglia
La regenza ha approvà il project "Protecziun cunter crudada da crappa Acla Miez" da la vischnanca da Medel (Lucmagn) ed ha deliberà per quest intent ina contribuziun chantunala da var 59 000 francs. Il motiv per quest project èn stads blocs da crap ch'èn sa distatgads il matg da quest onn sur la via communala e che han alura traversà la via e l'access a la tschiffada d'aua Val Plattas.
Suenter l'eveniment ha la vischnanca constatà ch'ils blocs che sa chattan anc en il territori da distatga èn en in stadi labil e ch'ins sto far quint a curta fin a lunga vista cun ulteriurs eveniments. Ils blocs instabils èn per entant vegnids segirads provisoricamain cun sugas. En il rom dal project vegn il territori segirà en il decurs dal proxim onn cun ina paraid da betun injectà ch'è francada cun ancras sco er cun ina rait stendida.

Da nov cun 32 tonnas fin Tràn
Suenter che la via da Tràn è vegnida renovada tranter Vecs ed Er Graund vegnan fixads da nov il pais maximal e la ladezza maximala. La regenza ha approvà in augment dal pais maximal dad oz, che variescha tut tenor la stagiun tranter 9 e 18 tonnas, a da nov 32 tonnas durant l'entir onn. Ultra da quai ha ella dà glisch verda a la nova ladezza maximala da 2,55 meters empè da 2,3 meters.

©Uffizi federal da topografia

Projects da votaziun dals 9 da favrer 2020
La regenza ha prendì enconuschientscha dal fatg ch'ils suandants projects federals vegnan suttamess a la votaziun dal pievel la dumengia, ils 9 da favrer 2020:

 

• iniziativa federala dal pievel dals 18 d'october 2016 "Per dapli abitaziuns pajablas"; e
• midada dals 14 da december 2018 dal cudesch penal e da la lescha penala militara (discriminaziun ed incitaziun a l'odi pervia da l'orientaziun sexuala).

La dumengia, ils 9 da favrer 2020, vegni ultra da quai votà davart il suandant project chantunal:

• concessiun d'in credit d'impegn per exequir il project «Renovaziun dal center da dietas al Plantahof a Landquart».

Gremi: regenza
Funtauna: rg chanzlia chantunala dal Grischun