A San Bernardin cumenzan ils 18 da matg 2020 las lavurs per renovar la basa da la polizia da traffic da la Polizia chantunala dal Grischun.
La Polizia chantunala dal Grischun (Pocha) maina a San Bernardin ina basa da la polizia da traffic (BPT) cun ina centrala d'acziuns (CA San Bernardin) integrada. Cun renovar la BPT San Bernardin vegnan meglieradas considerablamain las relaziuns da spazi sco er las premissas per in manaschi da polizia efficazi. Tras quai vegn rinforzà quel lieu. Ultra da la sedia principala a Cuira è la BPT San Bernardin in dals lieus ils pli impurtants per la Pocha. La situaziun al portal sid dal tunnel dal San Bernardin cun in access direct a la A13 è ideala per survegliar l'axa nord-sid fitg impurtanta.
Renovaziun suenter 50 onns da gestiun
La BPT San Bernardin che consista d'in tract da biros e d'ina garascha annexa, deriva da l'onn 1972. La construcziun exteriura ed interiura e las installaziuns da la tecnica da chasa derivan per gronda part da quella data. Suenter circa 50 onns da gestiun èn differentas parts da la construcziun arrivadas a la fin da lur vita. In studi da realisabladad ha mussà che l'edifizi porscha areguard sia structura interna sco er areguard il context cun l'areal ina basa da partenza solida per ina renovaziun. Cun ina renovaziun cumplessiva pon – ultra da la reparaziun da la substanza architectonica donnegiada – er vegnir eliminads ils deficits da l'effizienza energetica sco er ademplidas las pretensiuns dal construir senza obstachels e satisfatgs ils basegns actuals dals utilisaders.
Premissas optimalas per il manaschi da polizia
A chaschun da la procedura da selecziun da planisaders ha la cuminanza da lavur Studio d'architettura Lukas Meyer e Ira Piattini, Lamone, cun Direzione Lavori SA, Lugano, pudì persvader cun sia idea da project. Ella è vegnida incumbensada cun la planisaziun sco er cun la realisaziun. Il project da renovaziun è vegnì sviluppà resguardond las premissas dal manaschi sco er da la substanza architectonica existenta. La realisaziun dals basegns per il futur dals utilisaders cuntegna l'optimaziun da l'organisaziun da biro, da la centrala d'acziuns e dals locals accessorics sco er l'engrondiment dal sectur da la garascha e l'adattaziun dals locals da tecnica. La nova concepziun da l'entrada e l'integraziun d'in ascensur garanteschan in access senza obstachels. Ils mirs exteriurs revestgids cun lain adempleschan las prescripziuns energeticas legalas e dattan ina nova apparientscha a la BPT. Ils indrizs da la tecnica da chasa vegnan remplazzads e las infrastructuras electrotecnicas vegnan adattadas a las utilisaziuns futuras. Ultra da quai vegn la BPT San Bernardin adattada a las prescripziuns vertentas da la protecziun cunter incendis e da la segirezza cunter terratrembels.
Temp da construcziun d'in onn ed in volumen d'investiziun da 7,3 milliuns francs
Ensemen cun la basa tecnica cunfinanta da l'Uffizi federal da vias (UVIAS) furma la BPT San Bernardin in cumplex, en il qual ella ha ina posiziun prominenta. Cun la renovaziun tegna la BPT quint da quest lieu ed augmenta l'impurtanza da la situaziun al portal sid dal tunnel dal San Bernardin. Cun l'emprima badigliada cumenza il temp da construcziun dad 1 onn dal project che vegn a custar var 7,3 milliuns francs. Las lavurs da la construcziun brutta èn terminadas fin l'atun, e durant ils mais d'enviern vegnan realisadas las construcziuns a l'interiur. Durant las lavurs da renovaziun vegn il manaschi da polizia cuntinuà en las infrastructuras existentas en la Val Mesauc ed a Valragn.
Visualisaziun:
© Studio d'architettura Lukas Meyer e Ira Piattini, Lamone
Infurmaziuns:
cusseglier guvernativ dr. Mario Cavigelli, schef dal Departament d'infrastructura, energia e mobilitad, tel. +41 81 257 36 01, e-mail Mario.Cavigelli@diem.gr.ch
Gremi: Departament d'infrastructura, energia e mobilitad
Funtauna: rg Departament d'infrastructura, energia e mobilitad