La Cumissiun dal Cussegl grond per giustia e segirezza ha prendì ulteriuras decisiuns dal dretg da surveglianza concernent differentas proceduras pendentas a la Dretgira chantunala dal Grischun. Latiers tutga ina reprimanda.

En il rom da las differentas proceduras dal dretg da surveglianza a la Dretgira chantunala dal Grischun ha la Cumissiun dal Cussegl grond per giustia e segirezza (CGS) inizià e manà ina procedura cunter il president da la Dretgira chantunala dr. Norbert Brunner. La primavaira aveva la CGS constatà ina violaziun da l'obligaziun d'uffizi. Quella stat en connex cun in tractament inadequat d'ina procedura d'appellaziun en ina dispita da dretg d'ierta. Ils 7 da matg 2020 ha dr. Norbert Brunner inoltrà ina dumonda da recusaziun cunter tut ils commembers da la CGS, ch'è vegnida refusada dal Cussegl grond ils 17 da zercladur 2020. Cunter quai ha dr. Norbert Brunner fatg recurs tar la Dretgira administrativa dal Grischun. Questa dumonda è vegnida refusada dal derschader d'instrucziun a la Dretgira administrativa ils 11 da settember 2020 – en spezial cun la motivaziun che l'interess public per in'activitad da surveglianza senza disturbis ed a temp util predomineschia ils interess privats da dr. Norbert Brunner. Questa decisiun ha dr. Norbert Brunner puspè contestà tar la Dretgira administrativa.

Reprimanda per dr. Norbert Brunner
Sin basa da la decisiun dal derschader d'instrucziun è la CGS anc adina autorisada d'exequir en sia cumposiziun oriunda sias incumbensas tenor il dretg da surveglianza. A la sesida dals 8 d'october 2020 ha ella perquai decidì da terminar la procedura da surveglianza cunter il president da la Dretgira chantunala dr. Norbert Brunner e d'al sancziunar cun ina reprimanda. D'ina sancziun pli severa desista la CGS, perquai ch'i n'ha dà naginas autras violaziuns da l'obligaziun d'uffizi da vart da dr. Norbert Brunner durant sia activitad da blers onns. Quest proceder da la cumissiun è en l'interess public ed inditgà per motivs da l'egualitad giuridica. Cun la demissiun da dr. Norbert Brunner sco derschader da la Dretgira chantunala extingua la pussanza disciplinara da la CGS per la fin da l'onn current.

Dumonda pendenta da destituir dr. Norbert Brunner da l'uffizi
La CGS ha tractà anc in'ulteriura pendenza da la procedura en connex cun la Dretgira chantunala. Uschia aveva derschader chantunal dr. Peter Schnyder inoltrà ils 15 da matg 2020 ina dumonda da destituziun da l'uffizi cunter dr. Norbert Brunner e cunter il derschader chantunal Davide Pedrotti. Per destituziuns da l'uffizi da derschaders chantunalas è cumpetent il Cussegl grond. Entant che la dumonda da destituziun da l'uffizi cunter il derschader chantunal Davide Pedrotti è gia vegnida refusada dal Cussegl grond cun vigur legala, n'ha il Cussegl grond anc betg tractà la destituziun da l'uffizi da dr. Norbert Brunner e decidì davart tala. 
Pervia da las proceduras pendentas davant la Dretgira administrativa ha la CGS fatg pir ils 26 d'october 2020 la dumonda a la Conferenza da las presidentas e dals presidents (CP) da betg iniziar ina procedura da destituziun da l'uffizi cunter dr. Norbert Brunner.

Agiunta:
resumaziun dal rapport da la CGS

Infurmaziuns: 
deputà Gian Derungs, president da la Cumissiun per giustia e segirezza, tel. +41 81 257 22 32, e‑mail Gian.Derungs@derungs-gu.ch

Gremi: Cumissiun per giustia e segirezza
Funtauna: rg Cumissiun per giustia e segirezza