La Regenza ha deliberà ina missiva per ina revisiun parziala da la Lescha introductiva chantunala tar il Cudesch civil svizzer (LItCCS) pertutgant il sectur da la protecziun d'uffants e da creschids per mauns dal Cussegl grond. Tras questa revisiun parziala duai la structura organisatorica da las autoritads per la protecziun d'uffants e da creschids (APUC) vegnir adattada a las enconuschientschas fatgas dapi la realisaziun dal nov dretg da la protecziun d'uffants e da creschids ch'è entrà en vigur il 1. da schaner 2013.
En reguard organisatoric èsi previs da concepir la APUC da nov sco autoritad chantunala unica cun filialas regiunalas. In punct central da questa reorganisaziun è quel da mantegnair la francaziun vertenta en las regiuns sco er la cumposiziun interdisciplinara da l'autoritad er en las filialas.
Trair a niz sinergias e meglierar puncts da contact
Tras la creaziun d'ina unica APUC cun filialas èsi – cuntrari ad oz – pussaivel da trair a niz sinergias en l'entir chantun. La midada da la lescha permetta plinavant da reglar cleramain ils puncts da contact existents tranter la APUC e las vischnancas.
La soluziun che vegn proponida en il sboz da revisiun concernent la surpigliada dals custs da mesiras n'ha betg chattà ina maioritad. Perquai che la proposta da laschar surpigliar las vischnancas al domicil civil da l'uffant ils custs da las mesiras ambulantas e staziunaras per la protecziun d'uffants è per il solit vegnida refusada, vegn suttamessa al Cussegl grond in'adattaziun da la regulaziun d'adossar ils custs da questas mesiras. La regulaziun ch'è vegnida elavurada suenter la consultaziun prevesa ch'ils custs da mesiras staziunaras per la protecziun d'uffants vegnian repartids en moda solidarica e proporziunala sin tut las vischnancas dal chantun, suenter la deducziun d'ina resalva persunala da la vischnanca cumpetenta. Ils custs nets da las vischnancas vegnan resguardads tar la gulivaziun da las grevezzas socialas. Tras questa regulaziun vegn er eliminà il problem che vischnancas pli pitschnas fissan vegnidas dischavantagiadas.
En il rom da questa revisiun èsi ultra da quai pussaivel d'adattar il dretg chantunal al dretg federal ch'è vegnì midà en il fratemp.
La debatta davart la missiva è previsa per la sessiun da favrer 2021 dal Cussegl grond.
Agiunta:
missiva
Infurmaziuns:
cusseglier guvernativ Peter Peyer, schef dal Departament da giustia, segirezza e sanadad, tel. +41 81 257 25 01, e‑mail Peter.Peyer@djsg.gr.ch
Gremi: Regenza
Funtauna: rg Chanzlia chantunala