En il Grischun restan ils dumbers da cas da corona per il mument sin in nivel constant. Quest fatg è d'attribuir per gronda part a la strategia da test dal chantun. Passa 35 pertschient da la populaziun sa participeschan regularmain als tests. Suenter dus mais tira il chantun Grischun in emprim facit.
En la cumparegliaziun naziunala ha il Grischun la cifra segund bassa tar l'incidenza da 7 dis e tar la valur R. Ils dumbers da cas en il Grischun stagneschan, entant ch'els s'augmentan uschiglio praticamain dapertut en Svizra. Quai è il resultat da la strategia da test activa e preventiva en il Grischun.
Serrar ils territoris da skis avess custà almain 320 milliuns francs
La strategia da test activa ha ulteriurs effects positivs: pervia da la gronda mobilitad èsi vegnì fatg quint cun in augment dals dumbers da cas da var 20 pertschient durant ils mais d'enviern. Grazia als tests preventivs en ils manaschis èn ils dumbers dentant stagnads. Uschia han ins pudì evitar ulteriuras mesiras rigurusas e per exempel er laschar avert senza interrupziun ils territoris da skis. Tenor calculaziuns dal Forum economic dal Grischun avessi custà supplementarmain 320 milliuns francs svizzers, sch'ins avess stuì serrar ils territoris da skis.
L'effect mussan ultra da quai ils resultats dals tests da pilot en las regiuns Bernina, Engiadina Bassa/Val Müstair e Malögia da mez december 2020. En questas regiuns – ch'eran pertutgadas fermamain da quel temp – han ins cumprovadamain pudì reducir zunt fitg tant ils dumbers da cas sco er la rata da mortalitad.
45 pertschient da la populaziun mobila fa regularmain tests
Dapi il cumenzament da favrer sa participeschan passa 1500 interpresas e circa 50 000 collavuraturas e collavuraturs als tests repetids en manaschis. Ultra da quai sa laschan passa 21 900 scolaras e scolars, persunas d'instrucziun sco er collavuraturas e collavuraturs da 144 scolas popularas e scolas medias grischunas testar voluntarmain. La gronda participaziun correspunda a 45 pertschient da la populaziun mobila (da 5 fin 64 onns). Dapi ch'i vegn testà repetidamain en manaschis ed en scolas n'hai dà pli naginas erupziuns. Cun ils tests en ils manaschis han ins pudì eruir fin ussa 193 persunas asintomaticas, cun ils tests en las scolas 16.
Grazia als tests: naginas perditas da milliuns pervia da quarantinas betg necessarias
Ils tests repetids en ils manaschis dattan segirezza a las collavuraturas ed als collavuraturs sco er a la clientella e garanteschan da pudair tegnair avert il manaschi. Ultra da quai profitan ils manaschis participants da la regulaziun da quarantina adattada: collavuraturas e collavuraturs che han gì in stretg contact cun ina persuna infectada (main che 1,5 meters distanza durant dapli che 15 minutas senza protecziun adattada) na ston betg ir en quarantina. Ellas ed els pon lavurar vinavant, sch'ellas ed els n'han vinavant nagins sintoms e sch'ils tests fatgs durant 7 dis en il rom dals tests en ils manaschis, èn mintga di negativs. Cur che quests 7 dis èn passads, midan ellas ed els puspè al ritmus da test usità.
L'evaluaziun dal contact tracing mussa che la malsogna cumenza mo tar ina da diesch persunas durant la quarantina. Sche las collavuraturas ed ils collavuraturs crudassan or, perdess l'economia milliuns. Grazia als tests en ils manaschis en cumbinaziun cun las reglas da quarantina adattadas po d'ina vart vegnir identifitgada la persuna cun in resultat positiv e da l'autra vart vegnir reducida er la perdita finanziala.
Ils centers da test èn averts sur Pasca
Grazia a la strategia cumplessiva per cumbatter cunter la pandemia che sa basa sin diesch elements, survegn il chantun Grischun in maletg expressiv davart la derasaziun dal coronavirus en las regiuns. En cas da basegn permetta quai da deducir svelt mesiras immediatas e sistematicas. Quai duai vegnir garantì er sur Pasca, cur che la mobilitad è pli gronda. Ils centers regiunals da test restan averts er durant ils firads. As laschai testar immediatamain, er sche Vus avais sintoms minimals.
Agiunta:
Preschentaziun
Infurmaziuns:
Post da communicaziun per il coronavirus dal chantun Grischun, e-mail kfsmedien@amz.gr.ch, tel. +41 79 716 22 95 (exclusivamain per collavuraturas e collavuraturs da las medias)
Gremi: Uffizi da sanadad
Funtauna: rg Uffizi da sanadad