La Dretgira administrativa dal Grischun ha refusà il recurs da la vischnanca da Claustra cunter l'introducziun da tempo 30. La reducziun da la sveltezza duai vegnir introducida sin la via da Claustra e sin las vias communalas examinadas, quai en il rom d'in project da protecziun cunter la canera.

La vischnanca da Claustra aveva fatg recurs tar la Dretgira administrativa dal chantun Grischun. Ella aveva pretendì d'abolir l'introducziun da tempo 30 sin il traject tranter Claustra Plaz e Claustra Vitg. En sia sentenzia ha la Dretgira administrativa refusà quest recurs. Uschespert che la sentenza è en vigur, pia suenter ch'il termin da recurs da 30 dis è scadì e sche la vischnanca na fa betg recurs cunter la sentenzia tar il Tribunal federal, vegn l'Uffizi da construcziun bassa dal Grischun (UCB) a surdar las lavurs da signalisaziun e da marcaziun en enclegientscha cun la vischnanca da Claustra.

Differentas mesiras
Sa basond sin l'obligaziun da sanaziun che vala per ils possessurs da stabiliments da traffic, ha il UCB laschà elavurar – en enclegientscha cun la vischnanca da Claustra – in project da sanaziun cunter la canera per las vias chantunalas e communalas (communicaziun da la Regenza dals 3 da mars 2022). Perquai che las limitas vegnivan surpassadas, duai d'ina vart – sco mesira per reducir la canera – vegnir sbassada la sveltezza da tempo 50 sin tempo 30 sin la via da Claustra e sin las vias communalas examinadas. Da l'autra vart vegnan las cuvridas veglias dals trajects da la via da Claustra, da la via da Monbiel e da la via da Serneus remplazzadas en etappas tras la cuvrida da standard ch'è previsa normalmain ozendi. L'introducziun da tempo 30 na serva betg mo a la protecziun cunter la canera – ella meglierescha er la segirezza en il traffic sin via ed augmenta la qualitad d'abitar e da viver.

Fotografia agiuntada:

Plan da situaziun

Infurmaziuns:

• Reto Knuchel, inschigner chantunal, Uffizi da construcziun bassa, tel. +41 81 257 37 01 (cuntanschibel a partir da las 11.00), e‑mail Reto.Knuchel@tba.gr.ch
• Roger Stäubli, schef Construcziun da vias / substitut da l'inschigner chantunal, Uffizi da construcziun bassa, tel. +41 81 257 38 42 (cuntanschibel da las 8.00 fin las 11.00), e‑mail Roger.Staeubli@tba.gr.ch

Responsabladad: Uffizi da construcziun bassa