Il turissem da congress e da seminari sco er il turissem urban han subì perditas considerablas durant la pandemia dal coronavirus. Per mitigiar las consequenzas economicas da la pandemia ha la Regenza concludì mesiras sistematicas che servan a stimular la dumonda turistica en quests segments. Er pitschnas destinaziuns turisticas dal Grischun pon profitar da meds da promoziun a favur da mesiras d'impuls communablas. Per quest intent ha la Regenza concedì a l'uniun Grischun Vacanzas (GRV) ina contribuziun da 320 000 francs. La premissa per il pajament da la contribuziun chantunala è quella, che las destinaziuns participadas genereschian per quest project ulteriurs meds finanzials en la dimensiun dad 80 000 francs.

Las mesiras planisadas en il sectur dal turissem urban sco er en il sectur dal turissem da congress e da seminari vegnan realisadas ensemen cun Svizra turissem. Er en il rom da l'allianza tematica «Grischun, Mes vitg da muntogna» che vegn manada da GRV, duain ils proxims mais vegnir realisadas mesiras supplementaras, per che er las destinaziuns pli pitschnas dal Grischun possian sa far valair sin il martgà turistic. Quest «Program per stabilisar la dumonda turistica 2022» è ina realisaziun da l'incumbensa, ch'è vegnida acceptada dal Cussegl grond en la sessiun da zercladur 2021.

©Graubünden Ferien/Marco Hartmann

Sa basond sin l'obligaziun da sanar ch'ils titulars d'implants da traffic han, ha l'Uffizi da construcziun bassa dal Grischun – en enclegientscha cun la vischnanca da Claustra – laschà elavurar in project da sanaziun cunter la canera per las vias chantunalas e communalas en la vischnanca da Claustra. Pervia dals surpassaments da las limitas vegn d'ina vart introducida – sco mesira per reducir la canera – ina reducziun da la sveltezza permessa da tempo 50 a tempo 30 per lung la via da Claustra e per lung las vias communalas examinadas. Da l'autra vart vegnan remplazzadas en etappas las cuvridas veglias tras la cuvrida da standard ch'è previsa normalmain, quai sin trajects da la via da Claustra, da la via da Monbiel e da la via da Serneus.

A medem temp sco la publicaziun da l'introducziun da tempo 30 per motivs da la protecziun cunter la canera, vegn – per cumplettar questa mesira – publitgada l'introducziun da tempo 30 per motivs da segirezza tras la Polizia chantunala. Uschia daventa in territori coerent en la vischnanca da Claustra ina zona da tempo 30. Cun l'introducziun da tempo 30 vegn reducida la canera dal traffic per tut las persunas, vegn meglierada la segirezza e vegn augmentada la qualitad d'abitar e da viver.

La Regenza augmenta il pais maximal admess sin la via da la Chlus tranter il spartavias Boos e l'access Seewis Pardisla, quai dad oz 28 tonnas sin nov 40/44 tonnas. Ils ultims onns èn las construcziuns artifizialas sin quest traject da via vegnidas renovadas e collaudadas per quests pais. Dal rest vegn la via da la Chlus gia oz duvrada da vehichels cun in pais total da 40/44 tonnas sco sviament en cas da nettegiaments dal tunnel u en cas d'accidents sin la via naziunala.

En il rom da la nova politica regiunala (NPR) ha la Regenza concedì a la secziun Rätia dal Club alpin svizzer (CAS) ina contribuziun chantunala da circa 111 400 francs per renovar la Chamanna Coaz CAS a Samedan. La contribuziun vegn concedida en connex cun in emprest NPR da 480 000 francs. Per quest project conceda la Regenza supplementarmain ina contribuziun chantunala ord la finanziaziun speziala «sport» en l'autezza da 100 000 francs.

Cun la renovaziun da la Chamanna Coaz sin 2610 meters sur mar duai vegnir cuntanschida ina gestiun moderna dals giasts che pernotteschan e dals giasts dal di. A favur da la qualitad vegn il dumber da plazzas da durmir (da nov var 55) reducì, cumpareglià cun la purschida vertenta. La finamira da la renovaziun architectonica è da metter a disposiziun in alloschi attractiv da muntogna als circa 3000 giasts che pernotteschan mintga onn en la chamona. Plinavant duai la chamona renovada er attrair var 2500 giasts dal di per onn. Sin basa da sia posiziun tranter Puntraschigna, Silvaplauna ed il Corvatsch è la Chamanna Coaz er ina destinaziun d'excursiun ideala en l'Engiadin'Ota.

©Chamanna Coaz